ក្នុងរយៈពេល ៦ខែ ឆ្នាំ២០២៥ កម្ពុជារកចំណូលពីការលក់សំបុត្រដល់ភ្ញៀវទេសចរបរទេសចូលទស្សនាតំបន់អង្គរបានជាង ២៦លានដុល្លារ កើនជាង ៨ភាគរយ ធៀបនឹងរយៈពេលដូចគ្នាក្នុងឆ្នាំ២០២៤។ យ៉ាងណា មិញ ស្ថិតិរបស់គ្រឹះស្ថានអង្គរចេញផ្សាយថ្ងៃទី១ ខែមិថុនា ឆ្នាំ២០២៥ កត់សម្គាល់ថា​ ចំណូលពីការលក់សំបុត្រចូលរមណីដ្ឋានអង្គរក្នុង​ខែ​មិថុនា ​មាន​ការ​ថយ​ចុះ​ជិត ១៩ភាគរយ បើធៀបនឹងខែមិថុនា ឆ្នាំ២០២៤។ តាម​គ្រឹះស្ថានអង្គរ ការ​ថយ​ចុះ​ចំណូលពីភ្ញៀវទេសចរគឺបណ្តាលមកពីវិបត្តិពិភពលោកក្នុងពេលបច្ចុប្បន្ន។

ភ្ញៀវ​ទេសចរ​ទស្សនាប្រាសាទអង្គរវត្ត © ក្រសួង​ទេសចរណ៍

ក្នុងសេចក្តីប្រកាសព័ត៌មានរបស់គ្រឹះស្ថានអង្គរស្តីពី ស្ថិតិភ្ញៀវទេសចរបរទេស និងចំណូលដែលទទួលបានពីការលក់សំបុត្រចូលទស្សនារមណីដ្ឋានអង្គរ ប្រាសាទកោះកែរ និងកំពង់ផែចុងឃ្នៀស ប្រចាំខែមិថុនា ឆ្នាំ២០២៥ បង្ហាញថា កម្ពុជាទទួលភ្ញៀវទេសចរបរទេសចូលទស្សនារមណីដ្ឋានអង្គរសរុបចំនួន ៤០ ០៩៦ នាក់ និង​ផ្តល់​ឱ្យកម្ពុជារកចំណូលបាន ១,៧លានដុល្លារ ពីការលក់សំបុត្រ។ ជាការកត់សម្គាល់ ចំនួនទេសចរបរទេសក្នុងខែមិថុនា ហាក់មានការធ្លាក់ចុះបើធៀបនឹងរយៈពេលដូចគ្នាក្នុងឆ្នាំ២០២៤ ពោលធ្លាក់ចុះរហូតដល់ ១៨,៣១ភាគរយ។

ដោយឡែក ចំនួនទេសចរបរទេសសរុបក្នុងរយៈ ៦ខែចុងក្រោយ បាន​ហក់ឡើងខ្ពស់ជាងឆ្នាំ២០២៤ ពោលមានការកើនឡើងចំនួនភ្ញៀវទេសចរចំនួនជាង ៥៦ម៉ឺននាក់ ឬស្មើ ៨,៧៦ភាគរយ និងបានរកចំណូលពីការលក់សំបុត្រប្រមាណ ២៦លានដុល្លារ ឬស្មើនឹង ៨,០៤ភាគរយ។ នេះបើតាមគ្រឹះស្ថានអង្គរ។

ទន្ទឹមគ្នានេះ លោក លី សែ នាយកប្រតិបត្តិគ្រឹះស្ថានអង្គរបញ្ជាក់ប្រាប់វិទ្យុបារាំងអន្តរជាតិ RFI នៅថ្ងៃទី២ កក្កដា ថា តំហយចំនួនទេសចរមកកាន់កម្ពុជាបណ្តាលមកពីវិបត្តិសេដ្ឋកិច្ច និងជម្លោះពិភពលោក ខណៈជម្លោះព្រំដែនរវាងកម្ពុជា-ថៃប៉ះពាល់បន្តិចបន្តួចប៉ុណ្ណោះទៅលើវិស័យទេសចរណ៍នៅកម្ពុជា។ បើតាមលោក លី សែ ស្របពេលពិភពលោកកំពុងជួបប្រទះភាពតានតឹង គោលនយោបាយសហរដ្ឋអាមេរិកថ្មីគឺជាកត្តាចម្បងដែលនាំឱ្យមានការប៉ះពាល់ដល់វិស័យទេសចរណ៍កម្ពុជាផងដែរ។

នាយកប្រតិបត្តិរូបនេះរំពឹងថា ខែកក្កដានឹងមានការងើបឡើងវិញនៃកំណើនទេសចរបរទេស ជាងខែមិថុនា។ ប៉ុន្តែលោកមិនអាចបញ្ជាក់ពីសន្ទុះនៃការកើនឡើងនៅឡើយ ត្បិតបច្ចុប្បន្នស្ថានភាពសេដ្ឋកិច្ចមិនទាន់មានភាពប្រសើរឡើងដោយសារការអនុវត្តពន្ធគយពាណិជ្ជកម្មថ្មីរបស់រដ្ឋបាលប្រធានាធិបតីអាមេរិកលោកដូណាល់ ត្រាំ។ ក្នុងន័យនេះលោកបញ្ជាក់ថា វិស័យទេសចរណ៍នៅកម្ពុជាឆ្នាំ២០២៥ អាចនឹងពុំមានកំណើនខ្ពស់ ប៉ុន្តែអាចមានកំណើនជាងឆ្នាំ២០២៤។

គួរជ្រាបថា កម្ពុជាទទួលបានភ្ញៀវទេសចរបរទេសចូលទស្សនាតំបន់អង្គរចំនួនជាង ៩៨ម៉ឺននាក់ ក្នុងឆ្នាំ២០២៤ និង​រកចំណូលបានប្រមាណ ៤៨លានដុល្លារ ពីការលក់សំបុត្រ។ នេះបើតាមស្ថិតិរបស់គ្រឹះស្ថានអង្គរ និងថាចិនជាគោលដៅទេសចរណ៍របស់កម្ពុជាបន្ទាប់ពីអាមេរិក៕

ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh