សហព័ន្ធស្រូវអង្ករកម្ពុជា បានចេញមកបដិសេធចំពោះសម្បកវេចខ្ចប់អង្ករមួយប្រភេទ ដែលមានមានរូបដូចទៅនឹងទង់ជាតិរបស់ប្រទេសថៃ។ ការចេញមកអះអាងយ៉ាងដូច្នេះរបស់សហព័ន្ធស្រូវអង្ករកម្ពុជា គឺក្រោយមានការបង្ហោះលក់រាយជាប្រភេទអង្ករវេចខ្ចប់ទម្ងន់៥គីឡូក្រាម តាមបណ្តាញអនឡាញនៅទីផ្សារប្រទេសចិន ដែលបានសរសេរជាភាសាថៃ និងបោះពុម្ពនៅលើកញ្ចប់ដោយមានសញ្ញាស្រដៀងទៅនឹងទង់ជាតិប្រទេសថៃ ព្រមទាំងបង្ហាញអំពីប្រភពដើមថា ជាអង្កររបស់កម្ពុជា។

អង្ករខ្មែរ ដែលមានរូបទង់ជាតិថៃទៅបានដាក់លក់លើទីផ្សារអនឡាញរបស់ចិន © CRF

សេចក្តីជូនដំណឹងរបស់សហព័ន្ធស្រូវអង្ករកម្ពុជាចេញផ្សាយថ្ងៃទី២៩ មិថុនាបញ្ជាក់ថា ក្រោយបានសិក្សាស្រាវជ្រាវ និងស៊ើបអង្កេតជាមួយសមាជិកសហព័ន្ធស្រូវអង្ករកម្ពុជាទាំងអស់ ដែលបាននាំចេញអង្ករទៅប្រទេស ចិន និងក្រុមហ៊ុនត្រួតពិនិត្យគុណភាពនាំចេញរបស់ប្រទេសចិន សហព័ន្ធស្រូវអង្ករកម្ពុជារកឃើញថា ប្រភេទអង្ករវេចខ្ចប់ទម្ងន់ ៥គីឡូក្រាម ភ្ជាប់ជាមួយរូបទង់ជាតិប្រទេសថៃ ដែលត្រូវដាក់លក់តាមបណ្តាញសង្គម ចិននោះ មិនមែនមានប្រភពពីប្រទេសកម្ពុជានោះទេ។ សហព័ន្ធស្រូវអង្ករកម្ពុជាអះអាងថា ការនាំចេញអង្ករពីកម្ពុជាទៅប្រទេសចិន ស្ទើរតែទាំងស្រុងជាប្រភេទអង្ករច្រកក្នុងបាវដែលមានទម្ងន់ ២៥គីឡូក្រាម និង ៥០គីឡូក្រាម។

ក្នុងន័យនេះ​ សហព័ន្ធស្រូវអង្ករកម្ពុជាពន្យល់ថា ប្រទេសកម្ពុជាប្រកាន់យ៉ាងខ្ជាប់ខ្ជួនទៅនឹងច្បាប់ម៉ាកពាណិជ្ជនាម និងអំពើនៃការប្រកួតប្រជែងមិនស្មោះត្រង់ ដែលបានហាមឃាត់លើការប្រើប្រាស់និមិត្តសញ្ញាដែលដូច ឬ ស្រដៀង ឬ មានផ្នែកណាមួយដូចទៅនឹងទង់ជាតិរបស់ប្រទេសនានានៅលើពិភពលោក។ របាយការណ៍របស់សហព័ន្ធស្រូវអង្ករកម្ពុជាបង្ហាញថា ក្នុងឆ្នាំ២០២៤ កម្ពុជាបាននាំចេញអង្ករប្រមាណ ៦៥ម៉ឺន តោនទៅកាន់ទីផ្សារអន្តរជាតិ ដែលគិតជាទឹកប្រាក់ប្រមាណ ៤៩១លានដុល្លារអាមេរិក។ សហភាពអឺរ៉ុបជាទីផ្សារនាំមុខគេរបស់កម្ពុជា ដែលបានទទួលទិញអង្ករខ្មែរចំនួនជាង ៣២ម៉ឺនតោន ក្នុងទំហំទឹកប្រាក់សរុប ២៥៣លានដុល្លារ។

ដោយឡែក ទិន្នន័យ​រយៈពេល៥ខែ​ ចាប់​ពី​ខែ​មករា ដល់​ខែ​ឧសភា ឆ្នាំ​២០២៥ របស់សហព័ន្ធស្រូវអង្ករកម្ពុជា បង្ហាញថា កម្ពុជា​បាន​​នាំ​ចេញ​អង្ករ​ទៅទីផ្សារ​អន្តរជាតិ​សរុប​​ ៣៤៤ ១៩៩​តោន កើន​ឡើង ១៣,៧​ភាគរយ បើ​ធៀប​​រយៈពេលដូចគ្នាឆ្នាំ២០២៤។ ក្នុងនោះអង្ករ​ដែល​កម្ពុជា​នាំ​ទៅ​ប្រទេស​ចិន និង​តំបន់​រដ្ឋបាលស្វយ័ត​ មាន​ចំនួន​ជាង៩ ម៉ឺន​តោន ស្មើ​នឹង​​ទឹក​ប្រាក់ ៥៣,២៥​លាន​ដុល្លារ៕

ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh