បន្ទាប់ពីបាន​យល់ព្រម​ ផ្អាក​មិនអនុវត្ត​អត្រាពន្ធថ្មីរយៈពេល​៩០ថ្ងៃ សម្រាប់ប្រទេសជាង​៦០ ពេលនេះ រដ្ឋបាល​របស់​លោក ដូណាល់ ត្រាំ​ បានដកថយ​មួយជំហានទៀតហើយ។ ផ្អែកតាម​លិខិត​ជូនដំណឹងមួយ របស់ការិយាល័យពន្ធគយសហរដ្ឋអាមេរិក​ ចុះថ្ងៃទី​១១ មេសា គឺអាមេរិក​នឹងលើកលែង ​មិនអនុវត្ត​អត្រាពន្ធថ្មីនេះ​ ទៅលើទំនិញ​បច្ចេកវិទ្យាទំនើបមួយចំនួន ដូចជាទូរស័ព្ទ​ កុំព្យូទ័រ និងឧបករណ៍អេឡិកត្រូនិក​ច្រើនប្រភេទ​​ទៀត​ ដែលភាគច្រើនលើសលប់​ គឺសុទ្ធតែផលិតនៅចិន​។​ នេះអាចចាត់ទុកបានថា ជាការបន្ទន់ជំហរ​របស់​វ៉ាស៊ីនតោន ​ប្រឈមនឹង​ការប្តេជ្ញា​ចិត្តមិនចុះចាញ់របស់​ចិន។

ទូរស័ព្ទ​ iPhone តាំងបង្ហាញនៅ​​ Apple Store ក្នុងទីក្រុង​ Pittsburgh ថ្ងៃទី ១២មេសា​២០២៥ AP – Gene J. Puskar

ប្រឈមនឹងការប្តេជ្ញាចិត្តមិនចុះចាញ់របស់ចិន លោក ដូណាល់ ត្រាំ បានដកថយស្ងាត់ៗ។ ផ្អែកតាម​លិខិត​ជូនដំណឹងមួយ​របស់ការិយាល័យពន្ធគយ​សហរដ្ឋអាមេរិក ចេញផ្សាយ​នៅល្ងាចថ្ងៃសុក្រ ទី១១ មេសា គឺអត្រាពន្ធនាំចូលថ្មី នឹងមិនត្រូវអនុវត្ត​ទេ ទៅលើទំនិញ​ឧបករណ៍អេឡិកត្រូនិក ដែល​នាំចូលពីចិន​មកកាន់សហរដ្ឋអាមេរិក​។ នៅក្នុងលិខិតនេះ គេឃើញមាន​ទំនិញជាង២០មុខ ដែលរួចខ្លួនពីអត្រាពន្ធកប់ពពកនេះ ក្នុងនោះមានដូចជា ទូរស័ព្ទដៃ កុំព្យូទ័រ កញ្ចក់អេក្រង់ រួមទាំង​ឧបករណ៍​ស្តុកទិន្នន័យគ្រប់ប្រភេទ ដូចជា Hard disk, USB Flash, Memory Card ជាដើម​។ល។​

ដោយឡែក ចំពោះឧបករណ៍ សឺមីកុងឌុកទ័រវិញ គឺបានរួចខ្លួន​រួចហើយ ពីអត្រាពន្ធ​១០%ជាទូទៅ ដែលសហរដ្ឋបាន​ប្រកាសអនុវត្ត​ទៅលើប្រទេសដៃគូពាណិជ្ជកម្មទាំងអស់​។ គិតត្រឹមពេលនេះ លោក ដូណាល់ ត្រាំ នៅមិនទាន់សម្រេចអ្វី​ថ្មី​បន្ថែមទៀតទេ ទាក់ទិននឹងអត្រាពន្ធ​លើឧបករណ៍សឺមីកុងឌុកទ័រ។

គួរកត់សំគាល់ថា ការ​លើកលែងមិនអនុវត្តអាត្រាពន្ធ​ថ្មី​ ទៅលើទំនិញឧបករណ៍អេឡិកត្រូនិកនេះ គឺជាដំណឹងមួយដ៏ល្អ ជាពិសេសសម្រាប់​​អ្នកប្រើប្រាស់ជនជាតិអាមេរិក។ ប្រជាជនអាមេរិក​និយមប្រើប្រាស់ឧបករណ៍​អេឡិកត្រូនិកខ្លាំងណាស់ ហើយ​ដែល​ភាគច្រើនលើសលប់នៃឧបករណ៍ទាំងនោះ សុទ្ធតែផលិត​នៅចិន​ ឬក៏មានគ្រឿងផ្សំមួយផ្នែក​ផលិត​នៅចិន​។ ផ្អែកតាម​លោក Pascal de Lima ប្រធាន​ផ្នែក​សេដ្ឋកិច្ច​នៅ Business Knowledge Management Consulting BKMC អត្រាពន្ធថ្មីរបស់លោកដូណាល់ ដាក់ទៅលើទំនិញចិន​១៤៥% គឺអាចធ្វើ​ឲ្យ​ទំនិញ​ឧបករណ៍អេឡិកត្រូនិក​នាំចូលពីចិន ត្រូវឡើងថ្លៃដល់ទៅ​២០%យ៉ាងហោច។ ការឡើងថ្លៃដែលមក​ធ្វើបាប​ជីវភាព​ប្រជាជន​អាមេរិក​ខ្លួនឯង។

ទន្ទឹមគ្នានេះ ក្រុមហ៊ុន​បច្ចេកវិទ្យាធំៗរបស់អាមេរិក ដូចជា Apple, Dell, Microsoft និង Nvidia ជាដើម ក៏បានធូរទ្រូង​បន្តិចដែរ។ ទូរស័ព្ទiPhone របស់ Apple ភាគច្រើនលើសលប់ គឺផលិត​នៅចិន​។ គ្រាន់តែលោកដូណាល់ ត្រាំប្រកាសថានឹងដំឡើងពន្ធ​លើទំនិញចិន​ដល់ ១៤៥%  Apple បានខាតតម្លៃភាគហ៊ុន​នៅផ្សារមូលបត្រដល់ទៅ​ ៦៤០ពាន់លានដុល្លារ​។

សូមបញ្ជាក់ថា ទីផ្សារអាមេរិក​បានស្រូប​យក​ទំនិញ​ផលិត​នៅចិន ចំនួន​ប្រមាណ​១៦,៤% ដែលគិតជាទឹកប្រាក់ប្រមាណ​ ៥០០ពាន់លានដុល្លារ ​ក្នុងមួយឆ្នាំ​។ ចំពោះទំនិញឧបករណ៍អេឡិកត្រូនិកចិន ដែលរួចខ្លួន មិនជាប់អត្រាពន្ធថ្មីនេះ គឺមានប្រមាណ​ជា​២០% នៃការនាំចូលសរុបទៅកាន់ទីផ្សារ​អាមេរិក​។ លោក Daniel Ives អ្នកវិភាគ​ហិរញ្ញវត្ថុនៅ Wedbush Securities បានលើកឡើងថា ប្រសិនបើគ្មាន​ការ​លើកលែងនេះទេ ឧស្សាហកម្ម​បច្ចេកវិទ្យា​ទំនើបរបស់អាមេរិក អាចនឹងដើរថយ​ក្រោយដល់ទៅ​១០ឆ្នាំឯនោះ ពោលគឺវា​នឹងមកបង្អាក់យ៉ាងខ្លាំង ដល់​បដិវត្ត​បច្ចេកវិទ្យាបញ្ញាសិប្បនិម្មិត​ ដែលកំពុងតែស្ទុះឡើង​។

ជាមួយ​នឹងការដកថយជំហាននេះ លោកស្រី Karoline Leavitt អ្នកនាំពាក្យសេតវិមាន បានអះអាងថា ក្រុមហ៊ុនទាំងអស់ដែលបានរួចខ្លួន​ មិនទាន់ជាប់ក្នុងអត្រាពន្ធ​ថ្មី​ កំពុងតែប្រញេបប្រញាប់ ដើម្បីរើ​បណ្តាញ​ផលិតកម្ម​របស់ខ្លួន​ មកកាន់សហរដ្ឋអាមេរិក​វិញ​។

គួរ​រំលឹកដែរថា ហេតុផល​ធំចម្បង ដែលញ៉ាំង​ឲ្យ​លោកដូណាល់ ត្រាំដាក់​ពន្ធ​កប់ពពកទៅលើទំនិញនាំចូល​ពីបរទេស គឺលោកត្រាំចង់​ឲ្យ​ក្រុមហ៊ុនទាំងអស់ រើរោងចក្រមកផលិតនៅលើទឹកដីអាមេរិក​។ តែយ៉ាងណាក៏ដោយ លោក Nouriel Roubini អ្នកជំនាញសេដ្ឋកិច្ច​នៅ​សកលវិទ្យាល័យញូយ៉ក បាន​លើកឡើងថា អត្រាពន្ធ​ខ្ពស់ខ្លាំង ​ដែល​នៅជាធរមាន​លើទំនិញ​ផ្សេងៗទៀត វានឹងគ្មានឥទ្ធិពលអ្វី ​ធ្វើ​ឲ្យ​ក្រុមហ៊ុនសហគ្រាសទាំងអស់ រើរោងចក្រ​ត្រលប់មកសហរដ្ឋអាមេរិកវិញ ដើម្បី​ផលិត ​iPhone ឧបករណ៍​បច្ចេកវិទ្យាទំនើប ឬក៏ទំនិញ​ថោកៗគ្រប់មុខផ្សេងទៀតនោះទេ។ សម្រាប់អ្នកជំនាញរូបនេះ វិធានការពន្ធដ៏កម្រោលរបស់​លោកដូណាល់ ត្រាំ គឺជា​វិធានការប្រហោងក្នុង​ រវើរវាយ បែបលេងសើច​តាមតែចិត្តនឹកឃើញ៕

ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh