ជប៉ុនបញ្ចេញអង្ករពីស្តុក យុទ្ធសាស្ត្រដើម្បីទប់តម្លៃដែលហក់ឡើងខ្លាំង
10-មេសា-2025
តាំងពីបង្កើតជង្រុកយុទ្ធសាស្ត្រ ស្តុកអង្ករទុកមក នេះជាលើកទីមួយ ដែលរដ្ឋាភិបាលជប៉ុន សម្រេចបញ្ចេញអង្ករមកលក់វិញ ដើម្បីទប់ស្កាត់តម្លៃអង្ករដែលឡើងថ្លៃខ្លាំងជាគំហុក។ បើតាមសេចក្តីប្រកាសនាថ្ងៃពុធ ទី៩ មេសា ២០២៥នេះ រដ្ឋាភិបាលជប៉ុនគ្រោងបញ្ចេញស្តុកអង្ករ រហូតដល់រដូវច្រូតកាត់ថ្មី។ 
អង្ករក្នុងស្តុកយុទ្ធសាស្ត្រជប៉ុន ក្នុងឃ្លាំងនៃខេត្ត Kanagawa. © KAZUHIRO NOGI / AFP
ដើម្បីរក្សាស្ថិរភាពតម្លៃអង្ករឱ្យមានលំនឹងល្អ នៅលើទីផ្សារ រដ្ឋាភិបាលជប៉ុននឹងបន្តបញ្ចេញអង្ករក្នុងស្តុកយុទ្ធសាស្ត្រមកដាក់លក់ដេញថ្លៃ ជារៀងរាល់ខែរហូតដល់ខែកក្កដា ដែលជារដូវប្រមូលផលថ្មី។ តាមគម្រោង រដ្ឋាភិបាលជប៉ុននឹងបញ្ចេញស្តុកអង្ករយុទ្ធសាស្ត្រសរុបប្រមាណ ២សែន១ម៉ឺនតោន។ ការដេញថ្លៃលក់នឹងចាប់ផ្តើមធ្វើ នៅថ្ងៃទី ២១ មេសាខាងមុខ ក្នុងបរិមាណអង្ករប្រមាណ១សែនតោន។ នេះបើតាមសេចក្តីប្រកាសរបស់រដ្ឋមន្ត្រីក្រសួងកសិកម្ម លោកតាគុ អេតូ Taku Eto ដោយពន្យល់បន្ថែមថា ការបញ្ចេញស្តុកយុទ្ធសាស្ត្រ ជាលើកទីមួយគិតចាប់តាំងពីឆ្នាំ១៩៩៥មក ធ្វើឡើងដើម្បីសាកល្បងទប់ស្កាត់តម្លៃអង្ករដែលហក់ឡើងខ្លាំង។
ក្នុងរយៈពេលមួយឆ្នាំចុងក្រោយមកនេះ អង្ករជប៉ុនបានឡើងថ្លៃជាលំដាប់ ស្ទើរមួយជាពីរទៅហើយ។ កាលពីសប្តាហ៍មុន តម្លៃអង្ករលក់រាយ ៥គីឡូថ្លៃជាង៤២០៦យ៉េន ឬស្មើនឹងប្រមាណ២៦អឺរ៉ូ២កាក់ ពោលគឺថ្លៃជាងឆ្នាំទៅដល់ទៅ១០៤,៥%។ មានកត្តាច្រើនដែលជំរុញឱ្យអង្ករឡើងថ្លៃខ្លាំង។
ទីមួយ កាលពីឆ្នាំ២០២៣ ជប៉ុនរងរលកកម្តៅខ្ពស់ ជាហេតុធ្វើឱ្យស្រូវផ្តល់ទិន្នផលទាប និងជាហេតុធ្វើឱ្យជប៉ុនមានបរិមាណអង្ករតិចនៅឆ្នាំបន្ទាប់។ ម្យ៉ាងវិញទៀត សេចក្តីត្រូវការផ្នែកអង្ករបានស្ទុះឡើងខ្លាំង បន្ទាប់ពីអាជ្ញាធរជប៉ុនបានចេញសារអាសន្ននៅខែសីហា ២០២៤ ណែនាំឱ្យប្រជាពលរដ្ឋត្រៀមលក្ខណៈប្រឈមនឹងគ្រោះធម្មជាតិរញ្ជួយដីដ៏ធ្ងន់ធ្ងរខ្លាំង។ សារអាសន្ននេះបានជំរុញឱ្យពលរដ្ឋភ័យស្លន់ស្លោស្ទុះរកទិញអង្ករទុក។ ហើយកាន់តែធ្ងន់ធ្ងរខ្លាំងបន្ថែមទៀត ក្រុមឈ្មួញកណ្តាលបានឆ្លៀតប្រមូលទិញអង្ករស្តុកទុក ចាំបញ្ចេញលក់យកចំណេញពេលឱកាសហុចឱ្យ។ នេះបើតាមការលម្អិតរបស់អាជ្ញាធរដដែល។
ទាក់ទងនឹងនយោបាយនាំចេញអង្ករវិញ រដ្ឋាភិបាលជប៉ុនក៏បានប្រកាសចង់បង្កើនការនាំចេញអង្ករឱ្យបានច្រើនជាងមុន៨ដង។ កម្មវត្ថុថ្មីចង់នាំចេញអង្ករឱ្យបានដល់ ៣៥ម៉ឺនតោន នៅឆ្នាំ២០៣០ ជាផ្នែកមួយនៃនយោបាយជាតិ ដែលមានទិសដៅចង់ពង្រឹងការនាំចេញអង្ករផង និងពង្រឹងពង្រីកវិស័យកសិកម្មដាំស្រូវ ឱ្យស្របទៅតាមស្ថានភាពប្រជាពលរដ្ឋដែលកាន់តែចាស់ជរាផង។
ចំណែកសេចក្តីត្រូវការក្នុងស្រុកវិញ ពលរដ្ឋជប៉ុនបានប្តូរទម្លាប់ទទួលទាន ដោយងាកទៅពិសានំប៉័ង ឬមី និងបរិភោគបាយកាន់តែតិចទៅៗ។ ការបរិភោគបាយបានថយចុះអស់ពាក់កណ្តាល បើប្រៀបទៅនឹង៦០ឆ្នាំមុន៕
ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh
អត្ថបទពាក់ព័ន្ធ
