ក្រុមប្រឹក្សាជាតិតស៊ូរបស់ លោក សម រង្ស៊ី សរសេរលិខិតមួយនៅថ្ងៃទី៦ ខែមេសា ឆ្នាំ២០២៥ ដោយស្នើឲ្យ លោក ដូណាល់ ត្រាំ ប្រធានាធិបតីអាមេរិកបញ្ចុះការយកពន្ធទំនិញរបស់កម្ពុជា ដែលនាំទៅទីផ្សារអាមេរិកឲ្យបានទាបបំផុតតាមដែលអាចធ្វើទៅបាន។ បើតាមក្រុមប្រឹក្សាជាតិតស៊ូ ការតម្លើងពន្ធរបស់រដ្ឋបាលអាមេរិកចំនួន ៤៩ភាគរយ លើទំនិញរបស់កម្ពុជា ដែលត្រូវអនុវត្តចាប់ពីថ្ងៃទី៩ មេសា ខាងមុខនឹងធ្វើឲ្យសេដ្ឋកិច្ចកម្ពុជា ប្រឈមវិបត្តិដួលរលំ បណ្តាលឲ្យពលរដ្ឋខ្មែររាប់សែននាក់បាត់បង់ការងារ និងមនុស្សរាប់សែនគ្រួសារជួបគ្រោះទុរភិក្ស។
ទំនិញនៅកំពង់ផែក្រុងព្រះសីហនុ © AKP
នៅក្នុងលិខិតចុះថ្ងៃទី៦ ខែមេសា ពីទីក្រុងប៉ារីស ប្រទេសបារាំង ក្រុមប្រឹក្សាជាតិតស៊ូ បានរំឭកថា នៅក្រោមជំនួយរបស់អាមេរិក ដែលបង្ហូរចូលមកកម្ពុជាជាង៣០ឆ្នាំ ទាំងប្រព័ន្ធអនុគ្រោះពន្ធ(GSP) និងជំនួយឥតសំណងប្រមាណ ១០០លានដុល្លារ ក្នុងមួយឆ្នាំ ប្រជាពលរដ្ឋខ្មែរគួរតែមានជីវភាពធូរធា ប៉ុន្តែបែរជានៅតែយ៉ាប់យឺនទៅវិញ ក្រោមការដឹកនាំរបស់នាយករដ្ឋមន្រ្តី គ្រួសារបក្ខពួកនិយមដែលធ្វើឲ្យប្រជាពលរដ្ឋខ្មែរជាង ៩០% កាន់តែធ្លាក់ខ្លួន ជំពាក់បំណុលវ័ណ្ឌក បន្ទាប់ពីគណបក្សប្រឆាំងដែលជាកម្លាំងនយោបាយតាមដានការប្រតិបត្តិរបស់រដ្ឋាភិបាល ត្រូវបានរំលាយតាំងពីឆ្នាំ២០១៧ ។
ដោយទទូចសុំឲ្យរដ្ឋបាលអាមេរិកបញ្ចុះពន្ធលើទំនិញនាំចូលពីកម្ពុជា ក្រុមប្រឹក្សាជាតិតស៊ូរបស់ លោក សម រង្ស៊ី ក៏ឆ្លៀតភ្ជាប់រឿងនេះទៅនឹងបញ្ហានយោបាយនៅកម្ពុជាផងដែរ។ ក្រុមប្រឹក្សាជាតិតស៊ូ បានទទូចឲ្យរដ្ឋបាល លោក ដូណាល់ ត្រាំ អាណិតស្រឡាញ់ដល់ពលរដ្ឋខ្មែរ ហើយថាសហរដ្ឋអាមេរិកគួរតែដាក់លក្ខខណ្ឌជាអាទិភាពដល់រដ្ឋាភិបាលកម្ពុជា ឲ្យស្តារលទ្ធិប្រជាធិបតេយ្យឡើងវិញ ដោយដោះលែងអ្នកនយោបាយទាំងអស់ និងអនុញ្ញាតឲ្យពួកគេចូលរួមបោះឆ្នោតឃុំ សង្កាត់ នៅឆ្នាំ២០២៧ និងបោះឆ្នោតថ្នាក់ជាតិនៅឆ្នាំ២០២៨។ អវត្តមានរបស់គណបក្សប្រឆាំងតាំងពីត្រូវបានរំលាយកាលពីឆ្នាំ២០១៧ បានធ្វើឲ្យពលរដ្ឋខ្មែរប្រមាណ៩០% ជំពាក់បំណុល អាចឈានទៅវណ្ឌករ ដោយសារតែគ្មានសំឡេងរបស់បក្សប្រឆាំងនៅក្នុងសភា។ នេះបើតាមសេចក្តីថ្លែងការណ៍របស់ក្រុមប្រឹក្សាជាតិតស៊ូ ដែលរអ៊ូប្រាប់ លោក ដូណាល់ ត្រាំ។
នៅមុនលិខិតរបស់ក្រុមប្រឹក្សាជាតិតស៊ូរបស់លោក សម រង្ស៊ី ប្រមុខរដ្ឋាភិបាលកម្ពុជា លោក ហ៊ុន ម៉ាណែត បានផ្ញើលិខិតរួចហើយទៅកាន់រដ្ឋបាល លោក ដូណាល់ ត្រាំ កាលពីថ្ងៃទី៤ ខែមេសា ដោយសុំបើកការចរចាជាមួយសហរដ្ឋអាមេរិកលើការតម្លើងពន្ធ ៤៩% លើទំនិញរបស់កម្ពុជានាំចូលអាមេរិក ដែលជាពន្ធខ្ពស់ជាងគេ នៅតំបន់អាស៊ាន។ នៅក្នុងពិធីសម្ពោធស្ពានអាកាសក្បាលថ្នល់ នៅព្រឹកថ្ងៃចន្ទទី៧ ខែមេសា លោក ហ៊ុន ម៉ាណែត បានថ្លែងថា កម្ពុជាមិនបាននៅស្ងៀមចំពោះរឿងនេះទេ គ្រាន់តែមិនបានផ្សាយតាមហ្វេសប៊ុកតែប៉ុណ្ណោះ។ ដោយឆ្លើយតបទៅកាន់អ្នកនយោបាយប្រឆាំង នៅក្រៅប្រទេស ប្រមុខរដ្ឋាភិបាលកម្ពុជា បានអះអាងថា ក្រុមការងាររដ្ឋាភិបាលបានកោះប្រជុំគ្នា និងធ្វើការងារនេះ អស់រយៈពេល ៤១ម៉ោង មុនពេលដាក់លិខិតទៅ លោក ដូណាល់ ត្រាំ ដើម្បីសុំការចរចា៕
ប្រភពព័ត៌មាន ៖ វិទ្យុបារាំងអន្តរជាតិ RFIwww.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
