រដ្ឋមន្ត្រីក្រសួងការងារ លោក ហេង សួរ បានថ្លែងថា ប្រទេសកម្ពុជានឹងក្លាយជាគោលដៅទាក់ទាញបន្ថែមទៀតទាំងអាជីវកម្ម និងវិនិយោគទុន។ ការថ្លែងដូចនេះធ្វើឡើង អំឡុងពេលនៃកិច្ចប្រជុំកំពូលវាយនភណ្ឌ សកលនៅកម្ពុជានាថ្ងៃទី៣១ ខែមីនា ឆ្នាំ២០២៥។ កិច្ចប្រជុំក្រោមប្រធានបទ «កសាងអនាគត៖ បង្កើនភាពប្រកួតប្រជែង និងចីរភាព» បានចូលរួមដោយសមាគមរោងចក្រកាត់ដេរ អង្គការ ILO សភាពាណិជ្ជកម្មអឺរ៉ុបប្រចាំកម្ពុជា តំណាងម៉ាកយីហោអន្តរជាតិធំៗ និងអង្គការអន្តរជាតិមួយចំនួនទៀត។ កម្មការិនី​ជា​ច្រើន​កំពុង​តែ​កាត់ដេរ​នៅ​រោងចក្រ​ក្នុង​ស្រុក។​ សហការី

នៅក្នុងកិច្ចប្រជុំកំពូលវាយនភណ្ឌសកលលើកដំបូងនៅកម្ពុជា លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានថ្លែងថា កិច្ចប្រជុំកំពូលនេះ គឺជាការពិភាក្សាស្វែងរកផ្លូវដើម្បីកែលម្អស្តង់ដារការងារ ការគ្រប់គ្រងបរិស្ថាន ការអនុវត្តសេដ្ឋកិច្ចចក្រា និងការត្រៀមខ្លួនដើម្បីឆ្លើយតបទៅនឹងការរំពឹងទុកជាសកលក្នុងការពង្រឹងសមត្ថភាពរបស់វិស័យវាយនភណ្ឌឲ្យមានភាពរីកចម្រើន។ ម្យ៉ាងទៀត វាក៏ចំពេល ដែលមានការផ្លាស់ប្តូរសេដ្ឋកិច្ចសកល និងការចាកចេញរបស់កម្ពុជាពីស្ថានភាពប្រទេសអភិវឌ្ឍន៍តិចតួច (LDC) នាពេលខាងមុខដែរ។

ចំណែក លោក ស៊ុន ចាន់ថុល ឧបនាយករដ្ឋមន្ត្រីបានលើកឡើងនូវចំណុចគន្លឹះមួយចំនួនទាក់ទងនឹងការវិនិយោគលើវិស័យកាត់ដេរនៅកម្ពុជា ដែលរួមមាន សក្តានុពលដែលធ្វើឲ្យកម្ពុជាមានភាពប្រកួតប្រជែងខ្ពស់នៅក្នុងតំបន់ គោលនយោបាយតម្រង់ទិសប្រកបដោយចក្ខុវិស័យរបស់រដ្ឋាភិបាលក្នុងការលើកកម្ពស់ការបណ្តុះបណ្តាលវិជ្ជាជីវៈ ស្តង់ដារការងារ និងការធ្វើពិពិធកម្មសេដ្ឋកិច្ច។ ទន្ទឹមគ្នានេះ លោក ស៊ុន ថាន់ថុល ក៏បានរំលេចថា ការអនុវត្តឌីជីថលូបនីយកម្មក្នុងស្ថាប័នរដ្ឋ និងឯកជនបានជំរុញល្បឿនការងារប្រកបដោយគុណភាព និងប្រសិទ្ធភាព។

យន្តការត្រៀមលក្ខណៈឲ្យរួចរាល់ គឺជាការច្បាមយកឱកាសនាពេលអនាគតស្របតាមរបត់សេដ្ឋកិច្ចជាសកលដោយពង្រឹងសមត្ថភាពវិស័យវាយនភណ្ឌ និងកាត់ដេរឲ្យមានភាពរីកចម្រើន ទំនើបទាន់សម័យ និងបន្ថែមការយកចិត្តទុកដាក់ទៅលើបទប្បញ្ញត្តិអន្តរជាតិថ្មីៗស្តីពីសិទ្ធិមនុស្ស ការងារ និងបរិស្ថាន។ លោក អាត់ ធន់ អតីតប្រធានសហភាពការងារកម្ពុជាបានសម្តែងការសាទរចំពោះជំនួបកំពូលរវាងភាគីពាក់ព័ន្ធក្នុងវិស័យកាត់ដេរ វាយនភណ្ឌនៅកម្ពុជា។

តែលោក អាត់ ធន់មិនភ្លេចបញ្ជាក់ថា ដើម្បីទទួលបានជំនឿទុកចិត្តវិវិនិយោគិនទៅថ្ងៃអនាគត កម្ពុជាត្រូវពង្រឹងសមត្ថភាពធនធានមនុស្ស ជំនាញបច្ចេកទេស កាត់បន្ថយការិយាធិបតេយ្យ ទម្លាក់តម្លៃទឹក អគ្គិសនី មធ្យោបាយធ្វើដំណើរ បន្តការគោរពច្បាប់ និងមានស្តង់ដារសកល។

សូមបញ្ជាក់ថា ការនាំចេញសម្លៀកបំពាក់ ស្បែកជីង ការបូប និងផលិតផលធ្វើដំណើរនៅក្នុងឆ្នាំ២០២៤ កម្ពុជាសម្រេចបានទំហំទឹកប្រាក់ជាង ១៣ពាន់លានដុល្លា ពោលកើនឡើង ២៣,៥% ធៀបនឹងឆ្នាំ២០២៣ ក្នុងនោះ ការនាំចេញទៅអាមេរិកកើនឡើង ២៣,៧% អឺរ៉ុប២៧,៧% ជប៉ុន ២០,៧% អង់គ្លេស ១៩,៩% និងអាស៊ាន១៦,៥%៕

ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh