ក្រុមហ៊ុនប្រេងCNOOC របស់ចិន បានប្រកាស នៅថ្ងៃចន្ទ ទី៣១ មីនា ២០២៥ រកឃើញកំណប់អណ្តូងប្រេងដ៏ធំមួយ នៅតំបន់ប៉ែកខាងកើតនៃសមុទ្ទចិនខាងត្បូង។ បើតាមទីភ្នាក់ងារសារព័ត៌មានផ្លូវការចិន អណ្តូងរកឃើញថ្មីមានកប់ប្រេងក្នុងបរិមាណដល់ទៅជាង១០០លានតោន។
ប្រជុំកូនកោះក្នុងសមុទ្ទចិនខាងត្បូង © AFP
កំណប់អណ្តូងប្រេងទើបរកឃើញថ្មី ដែលគេប្រសិទ្ធនាមថា Huizhou19-6 មានទីតាំងស្ថិតនៅចម្ងាយប្រមាណ១៧០គីឡូម៉ែត្រ ពីឆ្នេរខាងត្បូងរបស់តំបន់Shenzhen។ ការខួងសាកល្បងបានទទួលផលជាប្រេងឆៅចំនួន ៤១៣ធុងបារីល និងឧស្ម័នធម្មជាតិ ៦៨០០០ម៉ែត្រគូប ក្នុងមួយថ្ងៃៗ។ នេះបើតាមការគូសបញ្ជាក់របស់ក្រុមហ៊ុនCNOOC ដែលជាអ្នករកឃើញអណ្តូងប្រេងថ្មី។
ទីភ្នាក់ងារសារព័ត៌មានផ្លូវការចិន បានបន្ថែមទៀតថា ជាមួយនឹងបច្ចេកវិទ្យាបច្ចុប្បន្ន ចិនប៉ាន់ស្មាន ប្រកបដោយភាពប្រាកដប្រជាខ្លាំងថា នឹងអាចបូមយកប្រេងបានដល់ទៅជាង ១០០លានតោន ពីកំណប់អណ្តូងប្រេង ដែលចិនបានចាត់ទុកជាអណ្តូងមានធនធានបម្រុងខ្ពស់។
ការរកឃើញកំណប់ប្រេងជាបន្តបន្ទាប់នៅភាគខាងកើតនៃសមុទ្ទចិនខាងត្បូង ក្នុងរយៈពេលពីរឆ្នាំចុងក្រោយមកមនេះ បានកំពុងបង្កើតប៉ូលវឌ្ឍនភាពថ្មី ក្នុងវិស័យផលិតកម្មឧស្ម័ននិងប្រេង។ នេះជាប្រសាសន៍អបអរស្វាគមន៍របស់អគ្គនាយកក្រុមហ៊ុនប្រេងឥន្ធនៈរដ្ឋ នៅក្នុងសេចក្តីថ្លែងការណ៍។ ចំណែកប្រមុខភូគព្ភវិទូ Xu Changgui របស់ក្រុមហ៊ុន Cnooc បានបញ្ចេញប្រតិកម្មប្រកបដោយមោទនភាពថា ការរកឃើញអណ្តូងHuizgou19-6 ជាការបោះជំហានទៅមុខដ៏សំខាន់មួយ នាំឆ្ពោះទៅរកឃើញកំណប់ប្រេងធំៗ កប់ក្រោមបំណែកផ្ទាំងថ្មផ្សេងទៀត នៅភាគខាងជើងនៃសមុទ្ទចិនខាងត្បូង។
បើតាមទីភ្នាក់ងារផ្តល់ព័ត៌មានផ្នែកថាមពលអាមេរិក ដោយហេតុតែជាប់ជម្លោះជាមួយប្រទេសជិតខាង ផ្ទៃដីក្រោមសមុទ្ទចិនខាងត្បូងមួយភាគធំពុំទាន់ទទួលការសិក្សារុករកមើលធនធានធម្មជាតិក្រោមដីឱ្យបានត្រឹមត្រូវទេ។ ប៉ុន្តែកំណប់អណ្តូងប្រេង និងឧស្ម័នធម្មជាតិរកឃើញកន្លងមកច្រើនមានទីតាំងស្ថិតនៅក្នុងតំបន់គ្មានជម្លោះ។ សម្រាប់ពេលនេះ ទោះបីចិនមានធនធានប្រេងបម្រុងក្រោមដីទំហំប៉ុនណាក៏ដោយ ក៏រដ្ឋាភិបាលអាមេរិកវិភាគឃើញថា ចិននៅតែជាប្រទេសនាំចូលប្រេងឆៅដ៏ធំជាងគេបំផុតនៅលើពិភពលោក។ កាលពីឆ្នាំកន្លងទៅ ចិននាំចូលប្រេង ក្នុងចំនួន ១១,១លានធុង ក្នុងមួយថ្ងៃ៕
ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh
