លោក អួន ស៊ីឡុត ប្រធានសមាគមស្វាយចន្ទីកម្ពុជាបានបញ្ជាក់មកវិទ្យុបារាំងអន្តរជាតិ RFI ថា តៃវ៉ាន់ត្រូវការគ្រាប់ស្វាយចន្ទីកែច្នៃរួចពីកម្ពុជា ដើម្បីបំពេញតម្រូវការក្នុងស្រុករបស់ខ្លួនប្រមាណ ៣០% ខណៈកាលពីថ្ងៃសុក្រ ទី២៨ មីនាកន្លងទៅ កម្ពុជាបាននាំចេញគ្រាប់ស្វាយចន្ទីកែច្នៃរួចទៅឱ្យក្រុមហ៊ុនតៃវ៉ាន់បាន ២ពាន់តោន រួចហើយ។ Ju Hu Chang International Co., LTD គឺជាក្រុមហ៊ុនបរទេសដំបូងគេ ដែលត្រូវបានលោក អួន ស៊ីឡុត មើលឃើញថា បានផ្តល់តម្លៃខ្ពស់ឲ្យគ្រាប់ស្វាយចន្ទីកែច្នៃរួចរាល់របស់កម្ពុជា។

ដោយមិនអាចបញ្ជាក់តម្លៃបាន ប្រធានសមាគមស្វាយចន្ទីកម្ពុជាដដែលរូបនេះបានត្រឹមបង្ហើបឱ្យដឹងបន្តិចថា ក្រុមហ៊ុនតៃវ៉ាន់ខាងលើនេះផ្តល់តម្លៃខ្ពស់ជាងក្រុមហ៊ុនមកពីអឺរ៉ុប។ ការបញ្ជាទិញរបស់ក្រុមហ៊ុនតៃវ៉ាន់ជាសញ្ញាវិជ្ជមានសម្រាប់វិស័យស្វាយចន្ទីកម្ពុជា តែសមាគមព្រួយបារម្ភខ្លាចឆ្នាំ ២០២៥ នេះ ការផ្គត់ផ្គង់គ្រាប់ស្វាយចន្ទីកែច្នៃរួចអាចនឹងខ្វះខាតដោយសារបញ្ហាអាកាសធាតុ។ ត្រង់ចំណុចនេះត្រូវបានលោក អួន ស៊ីឡុត បញ្ជាក់ថា នៅពេលទិន្នផលធ្លាក់ចុះ តម្លៃគ្រាប់ស្វាយចន្ទីនឹងឡើងថ្លៃ ដែលជាហេតុធ្វើឱ្យក្រុមហ៊ុនកែច្នៃក្នុងស្រុកពិបាកប្រមូលទិញ។

ម្យ៉ាងទៀត និងបើតាមលោក អួន ស៊ីឡុត ការធ្លាក់ចុះទិន្នផលគ្រាប់ស្វាយចន្ទីកម្ពុជា ដោយសារតែមានការប្រជែងទិញគ្រាប់ស្វាយចន្ទីរបស់កម្ពុជាពីបណ្តាឈ្មួញបរទេសផ្សេងៗទៀតដូចជា ចិន វៀតណាម និងឥណ្ឌាជាដើម។ តាមលោក អួន ស៊ីឡុត គិតមកទល់ពេលនេះ មានក្រុមហ៊ុនចំនួន៣ បានយល់ព្រមកែច្នៃគ្រាប់ស្វាយចន្ទី ដើម្បីនាំចេញទៅតៃវ៉ាន់ក្នុងកិច្ចព្រមព្រៀង ៣ពាន់តោន រយៈពេល៣ឆ្នាំ។

សមាគមនឹងបន្តស្វែងរកក្រុមហ៊ុនក្នុងស្រុកបន្ថែមទៀត ដើម្បីជួយកែច្នៃគ្រាប់ស្វាយចន្ទីនាំចេញទៅទីផ្សារតៃវ៉ាន់ ខណៈក្រុមហ៊ុនសន្យាជួយជាផ្នែកទុន ៥០% ក្នុងដំណើរប្រមូលទិញគ្រាប់ និងកែច្នៃ។ សូមជម្រាបថា បច្ចុប្បន្នកម្ពុជាមានសហគ្រាសកែច្នៃស្វាយចន្ទីចំនួន ៥២ ក្នុងនោះ ៦ ជារោងចក្រធុនមធ្យមមានសមត្ថភាពផលិតគ្រាប់ស្វាយចន្ទីបានចន្លោះពី ៧០០០តោន ទៅ ១៤ ០០០តោន ក្នុងមួយឆ្នាំ។ ចំណែក ៤៦សហគ្រាសផ្សេងទៀតជាសិប្បកម្មលក្ខណៈគ្រួសារតូចៗដោយមិនមានផលិតកម្មពេញ ១ឆ្នាំទេ៕