នៅថ្ងៃអាទិត្យ ទី៣០ មីនានេះ កម្ពុជាក្នុងនាមជាប្រទេសសមាជិកអាស៊ានម្នាក់បានផ្តល់ជំនួយបន្ទាន់ដំបូងចំនួន ១០ម៉ឺនដុល្លារ ឲ្យប្រទេសភូមា ដែលបានរងគ្រោះដោយហេតុការណ៍រញ្ជួយដីកាលពីថ្ងៃសុក្រ ទី២៨ មីនា។ ជំនួយនេះធ្វើឡើងតាមរយៈបទអន្តរាគមន៍របស់លោក ប្រាក់ សុខុន ប្រមុខការទូតកម្ពុជា នាពេលដែលលោកចូលរួមកិច្ចប្រជុំពិសេសបន្ទាន់របស់រដ្ឋមន្ត្រីការបរទេសអាស៊ានស្តីពី គ្រោះរញ្ជួយដីនៅភូមា។

តាមរយៈកិច្ចប្រជុំបន្ទាន់របស់ប្រមុខការទូតអាស៊ាន ភាគីកម្ពុជាបានសម្រេចផ្តល់ប្រាក់ជំនួយចំនួន ១០ម៉ឺនដុល្លារ ឲ្យប្រទេសភូមាដែលបានជួបគ្រោះថ្នាក់រញ្ជួយដី កាលពីថ្ងៃសុក្រ ទី២៨ មីនា។ លោក ប្រាក់ សុខុន រដ្ឋមន្ត្រីការបរទេសកម្ពុជាបានអះអាងថា កម្ពុជានឹងពិនិត្យមើលលទ្ធភាពរួមចំណែកដល់កិច្ចខំប្រឹងប្រែងសង្គ្រោះក្នុងតំបន់ តាមរយៈការផ្តល់ថ្នាំពេទ្យ និងការផ្គត់ផ្គង់សំខាន់ៗផ្សេងទៀត។ ក្នុងបទអន្តរាគមន៍ដែលមាន ៩ចំណុច ប្រមុខការទូតកម្ពុជាបានរំលេចឲ្យដឹងថា ស្ថានទូតកម្ពុជាដែលប្រចាំនៅប្រទេសថៃ និងភូមាបានធ្វើការយ៉ាងជិតស្និទ្ធជាមួយក្រុមជួយសង្រ្គោះ ដើម្បីរំដោះជីវិតមនុស្សឲ្យបានច្រើនតាមដែលអាចធ្វើទៅបាន។

តាមលោក ប្រាក់ សុខុន រាល់នាទីមួយៗមានសារៈសំខាន់ខ្លាំងណាស់ ដ្បិតមានមនុស្សជាច្រើនបានជាប់ក្រោមគំនរអគារបាក់បែកក្នុងហេតុការណ៍គ្រោះរញ្ជួយដី។ ក្នុងនាមជាប្រទេសសមាជិកអាស៊ានម្នាក់ លោក ប្រាក់ សុខុន បានគូសបញ្ជាក់ថា កម្ពុជានៅតែប្រកាន់ការបេ្តជ្ញាចិត្តក្នុងស្មារតីសាមគ្គីភាពជាមួយភូមា ថៃ និងគ្រួសារអាស៊ានទាំងមូលក្នុងពេលវេលាដ៏លំបាកនេះ។ សូមរំឭកថា គ្រោះរញ្ជួយដីដែលបានកើតឡើងក្នុងប្រទេសភូមា និងថៃកាលពីថ្ងៃសុក្រ ទី២៨ មីនា បានបណ្តាលឲ្យមានស្លាប់ជាច្រើនរាប់រយនាក់ និងខូចខាតទ្រព្យសម្បត្តិជាច្រើន ពិសេសការបាក់រលំអគារ។

តួលេខចុងក្រោយគិតត្រឹមថ្ងៃទី២៩ មីនា ផ្តល់ដោយនាយកដ្ឋានបង្ការ និងគ្រប់គ្រងគ្រោះមហន្តរាយរបស់ថៃបានឲ្យដឹងថា មានមនុស្សស្លាប់៩នាក់ របួស ៩នាក់ និងបាត់ខ្លួនជាង ១០០នាក់។ លោក ឡឹង សុផុន មន្ត្រីអង្គការសង់ត្រាល់ប្រចាំប្រទេសថៃបានប្រាប់វិទ្យុបារាំងអន្តរជាតិនៅថ្ងៃអាទិត្យ ទី៣០ មីនានេះថា អាជ្ញាធរថៃនៅតែបន្តប្រតិបត្តិការជួយសង្រ្គោះជីវិតមនុស្ស ដែលជាកម្មករសំណង់ក្នុងអគារ។ តែអត្តសញ្ញាណអ្នកទាំងនោះនៅតែមិនទាន់មានការកំណត់ច្បាស់លាស់នៅឡើយ៕

ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh