លោក អ៊ាង សុផល្លែត រដ្ឋមន្រ្តីក្រសួងបរិស្ថានបានលើកឡើងថា កម្ពុជានឹងទទួលបានការគាំទ្រពីមូលនិធិអាកាសធាតុបៃតងសកល ឬ Green Climate Fund ក្នុងទំហំទឹកប្រាក់ ៤០លានដុល្លារ សម្រាប់ការអនុវត្តកម្មវិធីរេដបូកជាតិ។ ការលើកឡើងរបស់លោករដ្ឋមន្ត្រីក្រសួងបរិស្ថានដូច្នេះ ធ្វើឡើងនៅក្នុងជំនួបជាមួយតំណាងធនាគារពិភពលោកនាថ្ងៃទី២៦ មីនា។

ក្រសួងបរិស្ថានថា មូលនិធិអាកាសធាតុបៃតងសកលគ្រោងផ្តល់ជំនួយ ៤០លានដុល្លារក្នុងគម្រោងរេដបូក © ក្រសួងបរិស្ថាន

នៅក្នុងជំនួបជាមួយលោកស្រី Salimata D. Follea តំណាងធនាគារពិភពលោកនាថ្ងៃទី២៦ មីនា លោក អ៊ាង សុផល្លែត រដ្ឋមន្រ្តីក្រសួងបរិស្ថានបានឲ្យដឹងថា កម្ពុជានឹងទទួលបានការគាំទ្រពីមូលនិធិអាកាសធាតុបៃតង ឬ Green Climate Fund ដែលគ្រោងផ្តល់ទឹកប្រាក់ឲ្យកម្ពុជាចំនួន ៤០លានដុល្លារ សម្រាប់ការអនុវត្តកម្មវិធីគម្រោងរេដបូកជាតិ។ ការណ៍នេះនាំឲ្យលោក អ៊ាង សុផល្លែត មានសុទិដ្ឋិនិយមថា កម្ពុជានឹងទទួលបានចំណាត់ថ្នាក់ឈានមុខគេក្នុងការអនុវត្តគម្រោងរេដបូកនៅលើពិភពលោក និងថា កម្ពុជាពិតជាមានមោទនភាពខ្លាំងណាស់ ដែលសហគមន៍អន្តរជាតិបានគាំទ្រគម្រោងរេដបូកកម្ពុជានៅក្នុងទីផ្សារកាបូនស្ម័គ្រចិត្ត។

តាមរដ្ឋមន្ត្រីបរិស្ថានរូបនេះដដែល សហគមន៍អន្តរជាតិបានជួយទាក់ទាញក្រុមហ៊ុនអន្តរជាតិធំៗមកទិញឥណទានកាបូននៅកម្ពុជា និងជួយឲ្យកម្ពុជាទទួលបានថវិកាពីការលក់ឥណទានកាបូនមកអភិរក្សព្រៃ ឈើ និងអភិវឌ្ឍជីវភាពសហគមន៍ ក៏ដូចជាសម្រាប់បញ្ចូលទៅក្នុងផែនការនៃការកាត់បន្ថយការបំភាយ (NDC) សំដៅសម្រេចបាននូវចក្ខុវិស័យ «កម្ពុជាជាប្រទេសអព្យាក្រឹតកាបូនត្រឹមឆ្នាំ២០៥០»។ សូមបញ្ជាក់ថាកន្លងមក គម្រោងរេដបូកនៅកម្ពុជាតែងអនុវត្តដោយមានជំនួយបច្ចេកទេសពីអង្គការអន្តរជាតិពាក់ព័ន្ធ។

តែក្រសួងបរិស្ថានបានអះអាងថា នៅក្នុងជំហានបន្ទាប់នាពេលអនាគតដ៏ខ្លី កម្ពុជានឹងពង្រឹងសមត្ថភាពមន្ត្រីថ្នាក់ជាតិ ពិសេសមន្ត្រីថ្នាក់ក្រោមជាតិប្រជាសហគមន៍ ដើម្បីអាចគ្រប់គ្រងការអនុវត្តគម្រោង រេដ បូក ទាំងស្រុងដោយខ្លួនឯង។ ជាងនេះទៅទៀត ក្រសួងបរិស្ថានក៏បានប្តេជ្ញាកសាងសមត្ថភាពខ្លួនឲ្យក្លាយទៅជា «ស្ថាប័នមានសម្បទា Accredited Entity» ដើម្បីទទួលបានថវិកាដោយផ្ទាល់ពីមូលនិធិអាកាសធាតុបៃតងផងដែរ។ តាមក្រសួងបរិស្ថាន គម្រោងរេដបូកជាតិកម្ពុជាបានចូលរួមកាត់បន្ថយឧស្ម័នផ្ទះកញ្ចក់ដែលបានចេញវិញ្ញាណបនបត្របញ្ជាក់រួចពីឆ្នាំ ២០១៣ ដល់ឆ្នាំ ២០១៧ ក្នុងបរិមាណជាង ២០លានតោនឧស្ម័នកាបូនិក (tCO2e)។

គិតត្រឹមពេលនេះ កម្ពុជាមានគម្រោងរេដបូក ដែលបានចុះបញ្ជីរួចនៅក្នុងប្រព័ន្ធទិន្នន័យនៃគម្រោងរេដបូកជាតិចំនួន ៣គម្រោង និង៩គម្រោងទៀតកំពុងរៀបចំចុះបញ្ជី។ គម្រោងរេដបូកជាតិ ដែលបានចុះបញ្ជីរួចរាល់ចំនួន ៣គម្រោងរួមមាន គម្រោងរេដបូកកម្ពុជា-កូរ៉េ (រេដបូកទំរីង) គម្រោងរេដបូកកែវសីមា និងគម្រោងរេដបូកជួរភ្នំក្រវាញខាងត្បូង។ គម្រោងរេដបូកជួរភ្នំក្រវាញខាងត្បូងត្រូវបានកាសែតបរទេសចុះផ្សាយដោយចោទប្រកាន់ថាបានរំលោភបំពានសិទ្ធិដីធ្លី និងគំរាមកំហែងដល់ជីវភាពរស់នៅរបស់សហគមន៍ជនជាតិដើមភាគតិចរហូតដល់គម្រោងនេះត្រូវបានផ្អាកដំណើរការជាង ១ឆ្នាំ។

គឺទើបនៅថ្ងៃទី ១០ កញ្ញា ឆ្នាំ២០២៤ Verra ដែលជាអង្គការអន្តរជាតិមួយគ្រប់គ្រងគម្រោងអភិរក្សព្រៃឈើពិភពលោកបានសម្រេចលើកលែងការព្យួរលើការចេញលិខិតបញ្ជាក់ឲ្យគម្រោងរេដបូកជួរភ្នំក្រវាញខាងត្បូងនៅប្រទេសកម្ពុជា បន្ទាប់ពីត្រួតពិនិត្យឃើញថា ការអនុវត្តគម្រោងរេដបូកជួរភ្នំក្រវាញខាងត្បូងដោយអង្គការសម្ព័ន្ធមិត្តសត្វព្រៃ Wildlife Alliance កន្លងមកមិនបានរំលោភសិទ្ធិមនុស្សធ្ងន់ធ្ងរដូចការចោទប្រកាន់នោះទេ៕

ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh