ដើម្បីកុំឱ្យរដ្ឋបាលលោក ត្រាំ រកលេសបង្កសង្គ្រាមពាណិជ្ជកម្មទាន់ វៀតណាមបានប្រកាសនៅថ្ងៃពុធទី២៦ មីនា ២០២៥ កាត់បន្ថយពន្ធនាំចូលផលិតផលមកពីអាមេរិកខ្លះ មានអាទិ៍រថយន្ត និងឧស្ម័នរាវ។ ហាណូយក៏នឹងអនុញ្ញាតឱ្យក្រុមហ៊ុន SpaceX របស់លោក Elon Musk បើកបណ្តាញអ៊ីនធ័រនែតផ្កាយរណប Starlink នៅវៀតណាមទៀត។
ជំហរចង់បញ្ចុះពន្ធនាំចូលផលិតផលមកពីអាមេរិក ដើម្បីបញ្ចៀសកុំមានសង្គ្រាមពាណិជ្ជកម្មជាមួយរដ្ឋបាល លោក ត្រាំ បានក្លាយជាការពិតជាក់ស្តែង។ នៅក្នុងសេចក្តីថ្លែងការណ៍របស់ក្រសួងហិរញ្ញវត្ថុចេញផ្សាយនាថ្ងៃពុធ ទី២៦ មីនា ២០២៥នេះ វៀតណាមបានសម្រេចកាត់បន្ថយពន្ធនាំចូលរថយន្តចំនួនពាក់កណ្តាល។ ចំណែកអត្រាពន្ធនាំចូលឧស្ម័នរាវធម្មជាតិ ត្រូវបញ្ចុះពី៥% មកត្រឹម ២%វិញ។ ពន្ធលើផលិតផលមួយចំនួនផ្សេងទៀត ដូចជាសាច់(ភ្លៅ)មាន់បង្កក គ្រាប់ធញ្ញជាតិ ផ្លែឈេរីស្រស់ ផ្លែទំពាំងបាយជូរក្រៀម និងឈើ ក៏ចុះទាបជាងមុនដែរ។
នយោបាយពន្ធគយថ្មី ដែលនឹងចូលជាធរមាននៅក្នុងខែនេះតែម្តង ធ្វើឡើងដើម្បីប្រឈមនឹងស្ថានភាពភូមិសាស្ត្រនយោបាយ និងស្ថានភាពសេដ្ឋកិច្ចពិភពលោក ដ៏ស្មុគស្មាញនិងពិបាកព្យាករ បណ្តាលជាពិសេសមកពីការប្តូរផ្លាស់នយោបាយសេដ្ឋកិច្ច ពាណិជ្ជកម្ម និងរនាំងពន្ធគយ។ នេះបើតាមសេចក្តីថ្លែងការណ៍របស់អាជ្ញាធរវៀតណាមដដែល ដោយបានបន្ថែមទៀតថា វៀតណាមចាំបាច់ត្រូវធានាគិតគូរឱ្យមានសមភាពជាមួយប្រទេសជាដៃគូយុទ្ធសាស្ត្រទូទៅរបស់ខ្លួន។ ហើយសហរដ្ឋអាមេរិក និងវៀតណាមបានក្លាយជាដៃគូយុទ្ធសាស្ត្រទូទៅនឹងគ្នាតាំងពីឆ្នាំ២០២៣មក។ ទាក់ទងនឹងក្រុមហ៊ុន SpaceX របស់លោកអេឡិនមឺស្ក៍វិញ វៀតណាមនឹងចាប់បើកទ្វារទទួល Starlink បណ្តាញអ៊ីនធ័រនែតតាមផ្កាយរណប ក្នុងក្របខ័ណ្ឌនៃកម្មវិធីមេ ដែលមានរយៈពេលរហូតដល់ឆ្នាំ២០៣០។ កម្មវិធីនេះមិនកំណត់ទឹកប្រាក់បរទេសដែលចង់មកចូលរួមបណ្តាក់ទុនទេ។ នេះបើតាមការបញ្ជាក់របស់រដ្ឋាភិបាលវៀតណាមនៅក្នុងសេចក្តីថ្លែងការណ៍ដដែល។
ជាកម្លាំងផលិតកម្មពិភពលោក សេដ្ឋកិច្ចវៀតណាមរំពឹងខ្លាំងណាស់លើការនាំចេញ ជាពិសេសការនាំចេញទៅអាមេរិក។ អាមេរិកជាទីផ្សារដ៏ធំជាងគេបង្អង់របស់វៀតណាម។ តែបើតាមក្រសួងពាណិជ្ជកម្មអាមេរិក ជញ្ជីងពាណិជ្ជកម្មមានឱនភាពផ្អៀងមកខាងវៀតណាមខ្លាំងណាស់ ដល់ទៅ ១២៣,៥ពាន់លានដុល្លារ នៅឆ្នាំ២០២៤ ពោលគឺការនាំចេញផលិតផលវៀតណាម ទៅអាមេរិក បានកើនឡើង១៨%បើប្រៀបទៅឆ្នាំ២០២៣។
វៀតណាម ជាប្រទេសដែលមានឱនភាពពាណិជ្ជកម្មជាមួយអាមេរិកខ្ពស់ខ្លាំងជាងគេលំដាប់ទីបី នៅលើពិភពលោក បន្ទាប់ពីចិន និងម៉ិកស៊ិក។ ហេតុដូច្នេះហើយបានជាហាណូយខ្លាចប្រទេសក្លាយជាអនាគតចំណុចដៅនៃនយោបាយដំឡើងពន្ធគយមិនរើសមុខរបស់លោកដូណាល់ត្រាំ៕
ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
