នៅថ្ងៃទី២៦ ខែមីនា ក្រុមហ៊ុនកាស៊ីណូ NagaCorp បានប្រកាសថា ក្នុងឆ្នាំ២០២៤ ប្រាក់ចំណូលរបស់ក្រុមហ៊ុនបានកើនឡើងចំនួន ៥.៥% តែប្រាក់ចំណេញវិញ ធ្លាក់ចុះចំនួន ៣៨.៣%។​ ការកើនឡើងនៃប្រាក់ចំណូលរបស់ក្រុមហ៊ុន គឺដោយសារការកើនឡើងនៃវិស័យទេសចរណ៍របស់កម្ពុជា។ ក៏ប៉ុន្តែចំពោះការធ្លាក់ចុះនៃប្រាក់ចំណេញវិញ ត្រូវបានភាគីក្រុមហ៊ុនអះអាងថា មកពីការខាតបង់លើគម្រោងសាងសង់កាស៊ីណូមួយកន្លែងជិតទីក្រុងកំពង់ផែ Vladivostok ប៉ាស៊ីហ្វិករបស់រុស្ស៊ីប្រមាណជាង ៨៩លានដុល្លារអាមេរិក។

ក្នុងរបាយការណ៍ចេញផ្សាយនាថ្ងៃទី២៦ ខែមីនា ឆ្នាំ២០២៥ ក្រុមហ៊ុនមេ NagaCorp ដែលមានមូលដ្ឋានធំក្នុងទីក្រុងហុងកុងបានឱ្យដឹងថា ប្រាក់ចំណូលរបស់ក្រុមហ៊ុនសម្រាប់ឆ្នាំ២០២៤ ទទួលបានចំនួនជាង ៥៦២លានដុល្លារអាមេរិក កើនឡើង៥.៥% បើធៀបនឹងប្រាក់ចំណូលឆ្នាំ២០២៣​ ដែលមានចំនួនជាង ៥៣៣លានដុល្លារអាមេរិក។

តែយ៉ាងណា ក្រុមហ៊ុនបានរាយការណ៍ថា ប្រាក់ចំណេញក្នុងឆ្នាំចាស់ធ្លាក់ចុះយ៉ាងគំហុកប្រមាណ៣៨.៣% ដោយគិតជាទឹកប្រាក់មានចំនួន១០៩.៦លានដុល្លារអាមេរិក ខណៈកាលពីឆ្នាំ២០២៣ ប្រាក់ចំណេញ ដែលក្រុមហ៊ុនរកបាន គឺមានចំនួន១៧៧.៧លានដុល្លារអាមេរិក។

បើតាមរបាយការណ៍ដដែលខាងលើ  ការធ្លាក់ចុះនៃប្រាក់ចំណេញ​អាចនឹងប៉ះពាល់ដល់គម្រោងសាងសង់អគារណាហ្គាវើលដ៍៣ក្នុងទីក្រុងភ្នំពេញ និងគម្រោងសាងសង់កាស៊ីណូដែលជាប់គាំងនៅប្រទេសរុស្ស៊ី ដ្បិតថា កន្លងមក ក្រុមហ៊ុនធ្លាប់បញ្ជាក់ថា គម្រោងសាងសង់អគារណាហ្គាវើលដ៍៣ អាចប្រឈមការកាត់បន្ថយខ្ទង់ចំណាយ និងទំហំគម្រោងផង។

លោកស្រី អ៊ូ ទេពផល្លីន ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជាមិនចម្លែកចិត្តចំពោះកំណើននៃប្រាក់ចំណូលរបស់ក្រុមហ៊ុនកាស៊ីណូណាហ្គាវើលដ៍នោះទេ។ តែអ្វីដែលលោកស្រីចម្លែកចិត្ត គឺក្រុមហ៊ុននៅតែមិនព្រមទទួលយកកូដករ ដែលកំពុងតវ៉ាឱ្យចូលធ្វើការវិញ។

តាមការបញ្ជាក់មកវិទ្យុបារាំងអន្តរជាតិRFIនៅព្រឹកថ្ងៃទី២៦​ ខែមីនា លោកស្រី អ៊ូ ទេពផល្លីន ស្នើឱ្យភាគីថៅកែក្រុមហ៊ុន ដោះស្រាយវិវាទការងារដែលបានអូសបន្លាយអស់រយៈពេលជាង៣ឆ្នាំមកនេះ ហើយត្រូវបញ្ឈប់រាល់ការលាបពណ៌ និងចោទប្រកាន់មកលើកូដករ ដែលកំពុងតវ៉ាទាមទារសិទ្ធិរបស់ពួកគេ។ មួយវិញទៀត និងបើតាមប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា ការទទួលយកកូដករឱ្យចូលធ្វើការវិញ មិនមែនជារឿងទាស់ខុសអ្វីឡើយ ព្រោះថាក្រុមហ៊ុនសព្វថ្ងៃមិនជួបប្រទះវិបត្តិហិរញ្ញវត្ថុដូចអំឡុងវិបត្តិជំងឺកូវីដ១៩ឡើយ។

សូមជម្រាបថា គិតត្រឹមដើមឆ្នាំ២០២៥នេះ កូដករណាហ្គាវើលដ៍ដែលនៅបន្តតវ៉ានៅពីមុខក្រុមហ៊ុន គឺមានជាង១០០នាក់។ ក្នុងចំណោមកូដករទាំងជាង១០០នាក់ ដែលមិនព្រមទទួលយកការទូទាត់សំណងពីក្រុមហ៊ុន គឺពួកគេបែងចែកវេនគ្នាមកធ្វើកូដកម្ម ដោយម្តងមានចំនួនប្រមាណ៣០នាក់៕

ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh