អង់គ្លេសគ្រោងកាត់បន្ថយបុគ្គលិករដ្ឋ ១ ម៉ឺននាក់
25-មីនា-2025
រដ្ឋាភិបាលអង់គ្លេស ប្រកាសថា នឹងកាត់បន្ថយចំណាយសាធារណៈ ឲ្យបាន ១៥% ចាប់ពីពេលនេះ រហូតដល់ ៤ ឆ្នាំទៀត។ នេះជាវិធានការថ្មីរបស់រដ្ឋមន្ត្រីក្រសួងហិរញ្ញវត្ថុអង់គ្លេស ដែលទើបតែប្រកាសចេញនៅថ្ងៃអាទិត្យ ទី២៣មីនា។ ដើម្បីសម្រេចចំណាត់ការកាត់បន្ថយចំណាយរដ្ឋដូចតាមគម្រោង រដ្ឋាភិបាលទីក្រុងឡុងដ្រ៍នឹងត្រូវជម្រុះមន្ត្រីរដ្ឋបាលស៊ីវិល ជាច្រើនពាន់នាក់។
លោកស្រី Rachel Reeves រដ្ឋមន្ត្រីក្រសួងហិរញ្ញវត្ថុអង់គ្លេស ប្រកាសកាត់បន្ថយចំណាយរដ្ឋ ១៥%។ AP – Peter Cziborra
ប្រឈមមុខនឹងវិបត្តិថវិកា សេដ្ឋកិច្ចជាតិមិនសូវស្ទុះបោះពួយលឿនខ្លាំង និងវិបត្តិអតិផរណាទំនិញផង រដ្ឋាភិបាលអង់គ្លេសត្រូវតែធ្វើកំណែទម្រង់ជាចាំបាច់។ វិធានការថ្មីរបស់រដ្ឋអំណាចអង់គ្លេស គឺត្រូវកាត់បន្ថយចំនួនមន្ត្រីបុគ្គល ដែលកាន់តួនាទីផ្នែករដ្ឋបាល និងផ្នែកការិយាធិបតេយ្យ។ រដ្ឋមន្ត្រីក្រសួងហិរញ្ញវត្ថុអង់គ្លេស លោកស្រី Rachel Reeves បានប្រកាសអំពីគម្រោងកែសម្រួលថវិកាជាតិ ដែលតម្រូវកាត់បន្ថយចំណាយរដ្ឋាភិបាល ឲ្យបានចំនួន ១៥% ចាប់ពីពេលនេះ រហូតដល់ដាច់អាណត្តិដឹកនាំ ឆ្នាំ២០២៩។ នេះបើតាមបណ្តាប្រព័ន្ធផ្សព្វផ្សាយព័ត៌មានអង់គ្លេស BBC នៅថ្ងៃអាទិត្យ ទី២៣ មីនា ដោយបញ្ជាក់ទៀតថា លោកស្រីរដ្ឋមន្ត្រីនឹងត្រូវបង្ហាញផែនការលម្អិតនៅចំពោះសភាអង់គ្លេស នាថ្ងៃពុធ ទី២៦ មីនា ខាងមុខនេះ។ ផែនការនោះ ត្រូវគេប្រសិទ្ធនាមយ៉ាងល្អឆើតថា «សេចក្តីប្រកាសនៃរដូវផ្ការីក»។
រដ្ឋាភិបាលអង់គ្លេស មានបុគ្គលិកក្របខ័ណ្ឌរដ្ឋ ប្រមាណ ៥០០ ០០០ នាក់។ បើតាមប្រភពពីប្រព័ន្ធផ្សព្វផ្សាយ BBC លោកស្រីរដ្ឋមន្ត្រីហិរញ្ញវត្ថុអង់គ្លេសមានជំនឿជាក់ថានឹងអាចកាត់បន្ថយចំនួនមន្ត្រីរដ្ឋបាល ឲ្យបានយ៉ាងហោច ១ម៉ឺននាក់។ ការធ្វើដូច្នេះនឹងធ្វើឲ្យរដ្ឋាភិបាលអង់គ្លេស អាចសន្សំសំចៃថវិកាជាតិ ចំនួន ២,២ ពាន់លាន លីវ្រស្ទែរលីង (ប្រហែលជាស្មើនឹង ២,៦ ពាន់លានអឺរ៉ូ)។
នៅតាមកញ្ចក់ទូរទស្សន៍ Sky News លោកស្រីរដ្ឋមន្ត្រី Rachel Reeves ក៏លាតត្រដាងថា លោកស្រីសុទ្ធចិត្តផ្តល់ឱកាសការងារឲ្យមន្ត្រីបុគ្គលិករដ្ឋជួរមុខ នៅសាលារៀន មន្ទីរពេទ្យ និងប៉ុស្តិ៍នគរបាល ជាជាងទុកមនុស្សឲ្យធ្វើការងារផ្នែករដ្ឋបាលស៊ីវិល។
កាលពីពាក់កណ្តាលខែមីនា នេះ រដ្ឋាភិបាលអង់គ្លេសបានសម្រេចលុបចោលទីភ្នាក់ងារ NHS England ដែលគ្រប់គ្រងសេវាកម្មប្រព័ន្ធសុខាភិបាលអង់គ្លេស និងបណ្តាលឲ្យបុគ្គលរាប់ពាន់នាក់បាត់បង់ការងារធ្វើ។ រដ្ឋាភិបាលអង់គ្លេសដឹកនាំដោយគណបក្សពលករ ក៏បានកាត់ផ្តាច់ជំនួយចំពោះជនពិការ ដែលរងគ្រោះព្រោះជំងឺរ៉ាំរ៉ៃរយៈពេលយូរ ហើយកាត់ផ្តាច់ជំនួយបង់ថ្លៃភ្លើងអគ្គិសនីម៉ាស៊ីនកម្តៅសម្រាប់មនុស្សចាស់ចូលនិវត្តន៍។ ចំណាត់ការទាំងនេះ បានត្រូវរងការរិះគន់ជាខ្លាំង និងធ្វើឲ្យប្រឡាក់ប្រឡូកប្រជាប្រិយភាពរដ្ឋាភិបាលមិនតិចឡើយ។
នាយករដ្ឋមន្ត្រីអង់គ្លេស លោក គៀរ ស្តារមឺ បានឡើងកាន់អំណាចនៅខែកក្កដា ឆ្នាំ២០២៤ ក្នុងស្ថានភាពសេដ្ឋកិច្ចជាតិជួបវិបត្តិ។ សន្ទុះវឌ្ឍនភាពសេដ្ឋកិច្ចទាបខ្លាំង និងចុះថយ ០,១% រួមនឹងអតិផរណា ៣% នៅខែមករា។ ទោះបីជាម្តេចក្តី ប្រឈមមុខនឹងបរិបទសង្គ្រាមនៅអ៊ុយក្រែន ប្រមុខដឹកនាំអង់គ្លេសរូបនេះ បានប្តេជ្ញាចិត្តជំរុញកំណើនថវិកាវិស័យការពារជាតិ ជាលំដាប់៕
ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh
អត្ថបទពាក់ព័ន្ធ
