ចិន រំពឹងលើអាពាហ៍ពិពាហ៍នៃគូស្នេហ៍ថ្មី ដើម្បីផ្តល់សន្ទុះដល់សេដ្ឋកិច្ចជាតិ
17-កុម្ភៈ-2025
ថ្ងៃទី១៤កុម្ភៈ ជាទិវានៃក្តីស្រឡាញ់។ នៅលើពិភពលោក ប្រទេសជាច្រើនចាត់ទុកថ្ងៃនេះ ជាថ្ងៃបុណ្យស្នេហា និងជាឱកាសក្រឡេកមើលស្ថានភាពស្នេហានៅក្នុងប្រទេសចិន ដែលចំនួនអាពាហ៍ពិពាហ៍បានធ្លាក់ចុះ២០% នៅឆ្នាំ២០២៤។ ស្ថានភាពបែបនេះមិនល្អទេ សម្រាប់សេដ្ឋកិច្ចជាតិ។ ហេតុដូច្នេះហើយបានជា អាជ្ញាធរចិនប្រើគ្រប់មធ្យោបាយ ដើម្បីជំរុញប្រជាពលរដ្ឋឱ្យគិតរកគូស្រករនិងរៀបការ។
ដើម្បីជំរុញអត្រាកំណើត ចិនផ្តល់ប្រាក់រង្វាន់១៥០០យ៉ន់ដល់គូស្វាមីភរិយាថ្មីក្នុងថ្ងៃចុះលិខិតអាពាហ៍ពិពាហ៍ © rfi khmer
មិនខ្វល់រឿងរៀបការ និងបង្កើតគ្រួសារ កំពុងក្លាយជាបញ្ហាយ៉ាងពិតៗជាក់ស្តែងនៅក្នុងប្រទេសចិន។ ចំនួនអាពាហ៍ពិពាហ៍បានធ្លាក់ចុះអស់២០% ក្នុងអំឡុងពេលតែមួយឆ្នាំ នៅឆ្នាំ២០២៤។ គ្រាន់តែពលរដ្ឋមិនសូវចង់រៀបការ ក៏រដ្ឋាភិបាលបារម្ភដែរ ស្តាប់ទៅហាក់ដូចជាកំប្លែងជ្រុលពេកហើយ។ ប៉ុន្តែបញ្ហានេះ ជះឥទ្ធិពលខ្លាំងណាស់ដល់សេដ្ឋកិច្ចជាតិខ្លាំងណាស់ ព្រោះបើមិនសូវមានអាពាហ៍ពិពាហ៍ មានន័យថាមិនសូវមានកំណើតកូន និងមិនសូវមានកម្លាំងពលកម្ម នៅ២០ឆ្នាំខាងមុខ។ កម្លាំងពលកម្មច្រើន និងក្នុងតម្លៃថោក ជាចំណែកមួយ ដែលរុញច្រានឱ្យចិនមានកំណើនសេដ្ឋកិច្ចល្អកន្លងមក។
កម្លាំងពលកម្មថយចុះអាចពន្យឺតមហិច្ឆតាសេដ្ឋកិច្ចចិន និងដំឡើងបន្ទុកសម្រាប់ក្មេងជំនាន់ក្រោយក្នុងការទ្រទ្រង់ចិញ្ចឹមមនុស្សចាស់។ ជាងនេះទៅទៀត ចំនួនប្រជាពលរដ្ឋចិន បានថយចុះជាគម្រប់បីឆ្នាំជាប់គ្នា ដែលមានន័យថា ចិនមានប្រជាជនចាស់កាន់តែច្រើន តម្រូវការថវិកាសម្រាប់បើកប្រាក់និវត្តន៍ក៏កាន់តែធំ។
ហេតុដូច្នេះបានជាអាជ្ញាធរចិន ប្រឹងប្រើគ្រប់មធ្យោបាយ ដើម្បីជំរុញប្រជាពលរដ្ឋឱ្យរៀបអាពាហ៍ពិពាហ៍ និងបង្កើតកូន ហើយរឹតបន្តឹងនីតិវិធីលែងលះ។ ចិនបានលើកទឹកចិត្តឱ្យសាលាថ្នាក់អនុវិទ្យាល័យ និងវិទ្យាល័យផ្តល់ការសិក្សាផ្នែកស្នេហា ដើម្បីឱ្យក្មេងមានទស្សនៈវិស័យវិជ្ជមានចំពោះអាពាហ៍ពិពាហ៍ និងការបង្កបង្កើតគ្រួសារ។ នៅក្រុងខ្លះ អាជ្ញាធរបានផ្តល់រង្វាន់ជាថវិកា ១៥០០យ៉ន់ចិន ដល់គូស្រករថ្មីថ្មោងក្នុងថ្ងៃចុះលិខិតរៀបអាពាហ៍ពិពាហ៍។ ១៥០០យ៉ន់ ឬស្មើនឹងប្រមាណ២០០ដុល្លារអាមេរិក តិចមែន តែតំណាងឱ្យដល់ទៅពាក់កណ្តាលនៃប្រាក់ខែមធ្យមរបស់ប្រជាពលរដ្ឋចិន។ វិធានការនេះទើបចូលជាធរមាននៅថ្ងៃទី១មករា ២០២៥ និងបានទទួលជោគជ័យយ៉ាងខ្លាំង។ ក្រុងខ្លះទៀត ផ្តល់រង្វាន់ជាលុយដល់គូស្វាមីភរិយានៅពេលបង្កើតកូនទីពីរ ឬទីបី។ ចំណាត់ការនេះបានទទួលជោគជ័យដែរ ព្រោះក្រុងណាមានជំនួយហិរញ្ញវត្ថុក្រុងនោះមានអត្រាកំណើតកើនឡើងនៅឆ្នាំ២០២៤។ នៅតំបន់ខ្លះទៀត រដ្ឋបាលខេត្តក្រុងរៀបចំពិធីជួបជុំផ្គូផ្គងគ្នា ជាផ្លូវការតែម្តងផង។ ស្នេហាជាប្រធានបទដែលប៉េកាំងគិតគូរយ៉ាងហ្មត់ចត់ ដោយចង់ចាត់ទុកអាពាហ៍ពិពាហ៍ជាជន្ទល់សេដ្ឋកិច្ចដ៏ចម្បងមួយផង។
សូមបញ្ជាក់ថា ជាមួយអត្រាយុវជនអត់ការងារ ធ្វើបានឡើងដល់១៥,៧% និងទីផ្សារការងារកាន់តែចង្អៀត ក្មេងសម័យថ្មីភាគច្រើន គិតគូរដល់សុខុមាលភាពផ្ទាល់ខ្លួន ជាជាងគិតគូររៀបការ បង្កើតគ្រួសារដែលត្រូវចំណាយច្រើន ជាពិសេសការចំណាយលើផ្នែកសិក្សាអប់រំកូន។ ក្រៅអំពីលក្ខខណ្ឌសេដ្ឋកិច្ចផុយស្រួយសម្រាប់រស់ជាគូ ខ្លះយល់ថានៅលីវ មិនសូវស្ត្រេស។ មូលហេតុមួយទៀតគឺ ស្ត្រីចិនកាន់តែរឹងមាំ មានចំណូលថេរ ដែលរស់តែម្នាក់ឯងដោយមិនចាំបាច់ត្រូវគិតគូររកប្តី។
នៅឆ្នាំ២០២៤ ចិនមានប្រជាពលរដ្ឋសរុបប្រមាណ១៤០៨លាននាក់ ទល់នឹង១៤១០លាននាក់ កាលពីមួយឆ្នាំមុន៕
ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh
អត្ថបទពាក់ព័ន្ធ
