លោកប្រធានាធិបតី ត្រាំ ផ្តើមអាណត្តិថ្មី ដោយប្រកាសមហាគម្រោងវិនិយោគបញ្ញាសិប្បនិម្មិត
23-មករា-2025
គ្រាន់តែចាប់ផ្តើមបំពេញការងារនៅថ្ងៃទីមួយភ្លាម លោកប្រធានាធិបតីទី៤៧របស់សហរដ្ឋអាមេរិក ដូណាល់ ត្រាំ បានប្រកាសដំឡើងពន្ធលើផលិតផលនាំចូលពីចិន១០% ចាប់ពីថ្ងៃទី១កុម្ភៈ២០២៥ទៅ។ ២៥%លើផលិតផលម៉ិកស៊ិក និងកាណាដា។ ផលិតផលរបស់បណ្តាប្រទេសនៅអឺរ៉ុប ក៏ត្រូវរងរនាំងពន្ធគយដូចគ្នា។ នេះបើតាមប្រសាសន៍របស់លោកត្រាំ នៅថ្ងៃអង្គារទី២១មករា២០២៥។ ចំពោះនយោបាយសេដ្ឋកិច្ចក្នុងផ្ទៃប្រទេសវិញ លោក ដូណាល់ ត្រាំ បានប្រកាសគម្រោងវិនិយោគថ្មីផ្នែកបញ្ញាសិប្បនិម្មិត (AI) « Stargate » ដែលបង្កើតការងារជាងមួយសែនកន្លែង។ 
លោកប្រធានាធិបតី ត្រាំ ប្រកាសមហាគម្រោងវិនិយោគបញ្ញាសិប្បនិម្មិត © AP – Julia Demaree Nikhinson摄影
ពីសេតវិមាន ក្នុងថ្ងៃទីមួយនៃការចាប់ផ្តើមបំពេញតួនាទីពេញលេញជាប្រធានាធិបតី លោក ដូណាល់ ត្រាំ បានជ្រើសរើសប្រកាសគម្រោងទាក់ទងនឹងសេដ្ឋកិច្ចដំបូងគេ។ នោះគឺគម្រោងវិនិយោគថ្មីក្នុងផ្នែកបញ្ញាសិប្បនិម្មិត ដែលគេប្រសិទ្ធនាមថា គម្រោងStargate។
មានតម្លៃយ៉ាងហោច៥០០ពាន់លានដុល្លារអាមេរិក គម្រោងស្តារហ្កេត ជាការវិនិយោគ សាងសង់រចនាសម្ព័ន្ធបញ្ញាសិប្បនិម្មិត នៅក្នុងទឹកដីអាមេរិក។ មជ្ឈមណ្ឌលស្តុក និងវិភាគទិន្នន័យ ឬមជ្ឈមណ្ឌលដាតា ចំនួនប្រមាណ១០ដំបូង នឹងសាងសង់នៅរដ្ឋតិចសាស់សំណព្វចិត្ត និងបន្ទាប់មកនៅតាមរដ្ឋផ្សេងទៀត តែនៅក្នុងដែនសហរដ្ឋអាមេរិកជានិច្ច។ គម្រោងStargateនេះនឹងបង្កើតការងារបានស្ទើរភ្លាមមួយរំពេច ចំនួនជាង១សែនការងារដល់ពលរដ្ឋអាមេរិក។ នេះបើតាមការធានាអះអាងរបស់ លោក ដូណាល់ត្រាំ ដោយពន្យល់លម្អិតទៀតថា Stargate នឹងស្ថាបនារចនាសម្ព័ន្ធដែលមានរូបរាងពិតមើលឃើញនឹងភ្នែកផង និងរចនាសម្ព័ន្ធក្នុងលំហឌីជីថលផង សម្រាប់ជាប្រយោជន៍នៃផ្នែកបញ្ញាសិប្បនិម្មិតជំនាន់ក្រោយ។
លោក ដូណាល់ ត្រាំ ប្រកាសបង្ហាញមហាគម្រោងបញ្ញាសិប្បនិម្មិត នៅចំពោះមុខប្រធានក្រុមហ៊ុនយក្សផ្នែកបច្ចេកវិទ្យាទំនើបជាន់ខ្ពស់គ្រាក់ៗទាំងបីរូប គឺលោក Larry Ellison ម្ចាស់ក្រុមហ៊ុនOracle (អ័រឺហ្គឺល) លោក Sam Altman ប្រធានក្រុម OpenAIឬ ChatGPTនិងលោក Masayochi Son ប្រធានមហាធនាគារវិនិយោគជប៉ុន SoftBank។ ថៅកែទាំងបីបានលើកសរសើរថាបើគ្មានលោកត្រាំជាប្រធានាធិបតីទេ គម្រោងStargate ដែលជាប្រជុំជំនាញCloudនិងបញ្ញាសិប្បនិម្មិតគ្រប់ទម្រង់ មិនអាចកើតចេញជារូបរាងបានទេ។
នៅក្នុងសេចក្តីថ្លែងការណ៍រួម ចេញផ្សាយកាលពីថ្ងៃអង្គារទី ២១ មករា ២០២៥ ដដែល ក្រៅពី Softbank Oracle និង OpenAI គម្រោងបញ្ញាសិប្បនិម្មិតបានទទួលជំនួយហិរញ្ញវត្ថុពីមូលនិធិវិនិយោគ MGX របស់អេមីរ៉ាតអារ៉ាប់រួមទៀត។
ជារបត់ថ្មីនៃវិស័យបញ្ញាសិប្បនិម្មិត លោកប្រធានាធិបតីអាមេរិកថ្មី បានចុះហត្ថលេខាលុបចោលក្រិត្យស្តីពីសុវត្ថិភាពបញ្ញាសិប្បនិម្មិត របស់ប្រធានាធិបតីមុន (លោក ចូបៃដិន)។ មានន័យថា វិធានទាក់ទងបញ្ញាសិប្បនិម្មិតទំនងជាត្រូវធូររលុងជាងមុន៕
ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh
អត្ថបទពាក់ព័ន្ធ
