ក្រសួងសេដ្ឋកិច្ច និងហិរញ្ញវត្ថុ គ្រោងបោះផ្សាយលក់មូលបត្ររដ្ឋ ក្នុងឆ្នាំ២០២៥ ក្នុងទឹកប្រាក់ចំនួន ៥០០ពាន់លានរៀល ឬស្មើប្រមាណ ១២០លានដុល្លារអាមេរិក។ នេះបើយោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ចចេញផ្សាយនៅថ្ងៃទី១៣ ខែមករា ឆ្នាំ២០២៥។

ការបោះផ្សាយលក់មូលបត្ររដ្ឋសម្រាប់ឆ្នាំនេះនឹងធ្វើឡើងតាមរយៈការដេញថ្លៃនៅលើថ្នាលរបស់ធនាគារជាតិកម្ពុជា ដោយក្នុងមួយប័ណ្ណមានតម្លៃ ១លានរៀល។ លោក ហុង សុខហួរ អគ្គនាយកផ្សារមូលបត្រកម្ពុជាចាត់ទុកការបោះផ្សាយលក់មូលបត្ររដ្ឋក្នុងទឹកប្រាក់ប្រមាណ ១២០លានដុល្លារ នេះថាស្ថិតក្នុងចំនួនតិចតួចនៅឡើយ បើធៀបនឹងទំហំសេដ្ឋកិច្ចកម្ពុជាសព្វថ្ងៃ។ ទោះយ៉ាងណា និងបើតាមអគ្គនាយកផ្សារមូលបត្រកម្ពុជារូបនេះដដែល ការលក់មូលបត្ររដ្ឋបានជួយឱ្យរូបិយវត្ថុ ដែលចរាចរលើទីផ្សារមានតម្លៃល្អ ពិសេសផ្តល់លទ្ធភាពឱ្យរដ្ឋាភិបាលមានទុនសម្រាប់អភិវឌ្ឍន៍សេដ្ឋកិច្ចសង្គម កាត់បន្ថយការខ្ចីបុលពីបរទេសមួយផ្នែក។

សូមជម្រាបថា មូលបត្ររដ្ឋ គឺជាប្រភេទមូលបត្រដែលលក់ចេញដោយរដ្ឋាភិបាល ដើម្បីស្វែងរកទុនសម្រាប់គាំទ្រដល់ការចំណាយរបស់រដ្ឋាភិបាល និងការអភិវឌ្ឍសេដ្ឋកិច្ចសង្គម។ ការលក់មូលបត្ររដ្ឋ គឺស្រដៀងគ្នានឹងរដ្ឋខ្ចីលុយធនាគារដែរ តែធ្វើឡើងក្នុងទម្រង់ជាការវិនិយោគ ហើយរដ្ឋសន្យាផ្តល់អត្រាការប្រាក់ណាមួយក្នុងរយៈពេលខ្ចី ឬវែងតាមការកំណត់ជាក់ស្តែង។ ចំណែករាល់អ្នកទិញមូលបត្រពីរដ្ឋនឹងទទួលបានការប្រាក់ និងប្រាក់ដើមត្រឡប់មកវិញ ក្រោយមូលបត្រហួសកំណត់។

គួររម្លឹកថា កាលពីឆ្នាំ២០២៤ រដ្ឋាភិបាលបានបោះផ្សាយលក់មូលបត្ររដ្ឋក្នុងទឹកប្រាក់ចំនួន៤៤០ពាន់លានរៀល ឬប្រមាណ១០៨លានដុល្លារអាមេរិក ដើម្បីសងប្រាក់ដើម និងការប្រាក់មូលបត្ររដ្ឋដែលបានបោះផ្សាយកាលពីឆ្នាំ២០២៣ និងដើម្បីធ្វើហិរញ្ញប្បទានលើគម្រោងវិនិយោគ ដែលអាចផ្តល់ចំណូលដោយត្រង់ដល់រដ្ឋាភិបាល៕

ប្រភពព័ត៌មាន​ ៖ វិទ្យុបារាំងអន្តរជាតិ RFI www.rfi.fr/kh