ការនាំចេញទំនិញចិនឡើងខ្ពស់ មុនលោក ដូណាល់ ត្រាំ ចូលកាន់តំណែងជាផ្លូវការ
14-មករា-2025
នៅប្រទេសចិន មន្ទីររដ្ឋបាលពន្ធគយ ប្រកាសរបាយការណ៍ថ្មី ដោយបញ្ជាក់ថា ក្នុងឆ្នាំ២០២៤ ការនាំចេញទំនិញចិន បានកើនឡើងខ្ពស់បំផុត បើគិតចាប់ពីពេលផ្ទុះជំងឺរាតត្បាតសកលកូវីដ១៩។ ចំណែក ការនាំចូលទំនិញវិញ ក៏កើនឡើង គួរឲ្យកត់សម្គាល់ដែរ។ កត្តាទាំងនេះជំរុញសុខភាពសេដ្ឋកិច្ចចិន ឲ្យមានភាពធន់ និងមានលំនឹងស្ថិរភាពល្អ នាប៉ុន្មានខែចុងក្រោយនេះ។ ផ្ទុយទៅវិញ ការវិលត្រឡប់មកកាន់អំណាចសេតវិមានជាថ្មីរបស់លោក ដូណាល់ ត្រាំ អាចនឹងបង្កហានិភ័យថ្មី និងនាំឲ្យស្រពិចស្រពិលចំពោះវឌ្ឍនភាពសេដ្ឋកិច្ចចិន។
ជាលើកទី១ ដែលការនាំចេញទំនិញចិន បានកើនឡើងខ្ពស់ គិតជាប្រាក់ច្រើនជាង ២៥ ០០០ ពាន់លានយ៉ន់។ នេះបើតាមការបញ្ជាក់របស់លោក Lu Daliang អ្នកនាំពាក្យ មន្ទីររដ្ឋបាលពន្ធគយ ក្នុងសន្និសីទសារព័ត៌មាន នៅរដ្ឋធានីប៉េកាំង ។ មន្ត្រីចិនរូបនេះ សង្កត់ធ្ងន់ថា ក្នុងឆ្នាំ២០២៤ ការនាំចេញទំនិញ ឡើងដល់ ២៥ ៤៥០ ពាន់លានយ៉ន់ ស្មើនឹងប្រមាណ ៣ ៤០០ ពាន់លានអឺរ៉ូ។ ពោលគឺកើនឡើង ៧,១% បើធៀបនឹងឆ្នាំ ២០២៣។ បើគិតតែត្រឹមខែធ្នូ ឆ្នាំទៅមិញ ការនាំចេញទំនិញចិន បានហក់ឡើងខ្លាំង ច្រើនជាង ១០,៧% បើធៀបក្នុងរយៈពេលដូចគ្នា នាឆ្នាំ២០២៣។ តួលេខនេះច្រើនជាងការព្យាកររបស់ទីភ្នាក់ងារ Bloomberg (៧,៥%) ទៅទៀត។
ទន្ទឹមនឹងគ្នានេះដែរ ការនាំទំនិញចូលប្រទេសចិន ក្នុងឆ្នាំ២០២៤ ក៏បានល្អគ្រាន់បើដែរ។ បើគិតជាទឹកប្រាក់ ទំហំទំនិញនាំចូលនោះ ស្មើនឹងប្រមាណ ២ ៣៩០ ពាន់លានអឺរ៉ូ ពោលគឺបានកើនឡើង ២,៣% បើធៀបនឹងឆ្នាំ២០២៣។
ថ្ងៃចន្ទ ទី១៣ ខែមករា លោក Wang Lingjun អនុរដ្ឋមន្ត្រីចិនទទួលបន្ទុកមន្ទីររដ្ឋបាលពន្ធគយ ថ្លែងក្តីអំណរ ដោយបូកសរុបជារួមថា ការដោះដូរទំនិញពាណិជ្ជកម្មក្នុងឆ្នាំ២០២៤ បានហក់ឡើង ៥% បើធៀបនឹងឆ្នាំ២០២៣។ ថ្លែងកោតសរសើរជាតិខ្លួន មន្ត្រីជាន់ខ្ពស់ចិន គូសបង្ហាញថា លទ្ធផលដ៏ប្រពៃនេះ សបញ្ជាក់យ៉ាងច្បាស់ថា ចិន ឋិតក្នុងរង្វង់ប្រទេសជាប់លំដាប់ថ្នាក់ទី១ ក្នុងពិភពលោក ដែលមានសុវត្ថិភាពល្អ ខាងការដោះដូរទំនិញពាណិជ្ជកម្ម។
បើតាមការពន្យល់របស់អ្នកជំនាញសេដ្ឋកិច្ច លទ្ធផលល្អក្នុងវិស័យនាំចេញ និងនាំចូលទំនិញចិននៅពេលនេះ ក៏ដោយសារតែការកែសម្រួលនយោបាយសេដ្ឋកិច្ច ដែលរដ្ឋបាលក្រុងប៉េកាំង បានដាក់ចេញកាលពីខែកញ្ញា កន្លងទៅ។ កំណែទម្រង់នោះ មានដូចជា វិធានការច្បាប់ជំរុញសន្ទុះសេដ្ឋកិច្ច ការកាត់បន្ថយអត្រាការប្រាក់នៃកម្ចីឥណទាន និងដំណោះស្រាយបំណុលសាធារណៈរបស់រដ្ឋបាលថ្នាក់ក្រោមជាតិ ហើយចំណាត់ការមួយចំនួនក្នុងវិបត្តិអចលនទ្រព្យ។
ផ្ទុយទៅវិញ រាត្រីទឹកឃុំនេះ ប្រហែលមិនគង់នៅយូរឡើយ។ ដ្បិតថា ក្នុងឆ្នាំថ្មី ការវិនិយោគទុនបរទេស និងការដាក់ភាគហ៊ុនរកស៊ីក្នុងវិស័យផលិតផលចិន នឹងត្រូវជួបឧសបគ្គប្រឈមខ្លាំង។ នេះក៏ព្រោះតែការគំរាមកំហែងពីរបាំងពន្ធគយអាមេរិក ក្នុងអាណត្តិដឹកនាំថ្មីរបស់ប្រធានាធិបតីអាមេរិក។
លោក ដូណាល់ ត្រាំ ដែលធ្លាប់ជាប្រភពដើមនៃជម្លោះសង្គ្រាមពាណិជ្ជកម្មរវាងចិននិងអាមេរិក នឹងវិលត្រឡប់មកកាន់អំណាចប្រធានាធិបតីជាថ្មី នៅក្នុងពេល ១សប្តាហ៍ទៀត។ បុរសខ្លាំងអាមេរិករូបនេះ ធ្លាប់បានគំរាមដំឡើងពន្ធគយ រហូតដល់ ៦០% ចំពោះទំនិញចិន ដែលនាំចូលអាមេរិក។ ប្រឈមនឹងបញ្ហានេះ អ្នកជំនាញសេដ្ឋកិច្ចព្យាករទុកជាស្រេចថា ក្នុងអាណត្តិដឹកនាំរបស់លោក ត្រាំ សន្ទុះវឌ្ឍនភាពសេដ្ឋកិច្ចរបស់ចិន នឹងមិនល្អប្រសើរប៉ុន្មានឡើយព្រោះតែទម្ងន់រនាំង ពន្ធគយអាមេរិក៕
ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh
អត្ថបទពាក់ព័ន្ធ
