ក្រសួងសេដ្ឋកិច្ច និងហិរញ្ញវត្ថុបានបញ្ជាក់នៅថ្ងៃទី៣១ ខែធ្នូ ឆ្នាំ២០២៤ ពីការលើកលែង និងអនុគ្រោះពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យសម្រាប់អ្នកទិញលំនៅឋាន និងផ្ទេរកម្មសិទ្ធិជាលើកដំបូង។ ការលើកលែង និងអនុគ្រោះពន្ធប្រថាប់ត្រានេះនឹងត្រូវអនុវត្តពេញមួយឆ្នាំ ២០២៥ ដើម្បីជួយសម្រួលដល់វិស័យអចលនទ្រព្យបន្ថែមទៀតនៅក្នុងប្រទេសកម្ពុជា។

សំណង់លំនៅឋានក្នុងរាជធានីភ្នំពេញ © AFP

ក្នុងសេចក្តីជូនដំណឹងរបស់ខ្លួននាថ្ងៃទី៣១ ខែធ្នូ ឆ្នាំ២០២៤ ក្រសួងសេដ្ឋកិច្ច និងហរិញ្ញវត្ថុបានសម្រេចលើកលែង និងអនុគ្រោះពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យសម្រាប់អ្នកទិញលំនៅឋាន និងផ្ទេរកម្មសិទ្ធិជាលើកដំបូងក្នុងឆ្នាំ២០២៥ នេះ។ ការលើកលែងពន្ធប្រថាប់ត្រាពេលនេះតូវបានក្រសួងសេដ្ឋកិច្ចពន្យល់ថា គឺដើម្បីជួយសម្រួលដល់ប្រជាពលរដ្ឋ​ ដែលបានទិញលំនៅឋានពីក្រុមហ៊ុនអភិវឌ្ឍន៍លំនៅឋាន ដូចជាបុរី ឬអាគារសហកម្មសិទ្ធិ (ខុនដូ) និងក៏ជាការជួយដល់វិស័យអចលនទ្រព្យក្នុងប្រទេសបន្ថែមទៀត។

តាមសេចក្តីជូនដំណឹងរបស់ក្រសួងសេដ្ឋកិច្ចដដែល ពលរដ្ឋដែលបានទិញផ្ទះជាលក្ខណៈបុរី ឬខុនដូនៅមុនឆ្នាំ២០២៥ ឬក្នុងឆ្នាំ២០២៥ ហើយផ្ទេរសិទ្ធិកាន់កាប់លើកដំបូងនៅរដ្ឋបាលសារពើពន្ធក្នុងឆ្នាំ២០២៥នឹងត្រូវទទួលបានការលើកលែងពន្ធប្រថាប់ត្រាលើការផ្ទេរកម្មសិទ្ធិសម្រាប់លំនៅឋានដែលមានតម្លែក្រោម ឬស្មើ ២១ម៉ឺនដុល្លារអាមេរិក។ ចំណែកលំនៅឋាន​ ដែលមានតម្លៃលើសពី ២១ម៉ឺនដុល្លារ នឹងត្រូវទទួលបានការអនុគ្រោះពន្ធដោយអនុញ្ញាតឲ្យដកចេញពីមូលដ្ឋានគិតពន្ធប្រថាប់ត្រាចំនួន ២១ម៉ឺនដុល្លារអាមេរិក។

ទន្ទឹមគ្នានេះ ក្រសួងសេដ្ឋកិច្ចមិនភ្លេចបញ្ជាក់ថា ពលរដ្ឋដែលមានលំនៅឋានទី២ ឬបន្តបន្ទាប់ក៏ត្រូវទទួលបានការអនុញ្ញាតឲ្យដកចេញពីមូលដ្ឋានគិតពន្ធប្រថាប់ត្រាលើការផ្ទេរកម្មសិទ្ធិចំនួន ៧ម៉ឺនដុល្លារអាមេរិក និងថា ការលើកលែង និងអនុគ្រោះពន្ធនេះត្រូវអនុវត្តរហូតដល់ដំណាច់ឆ្នាំ២០២៥។ ដោយឡែក ការទិញលំនៅឋានពីក្រុមហ៊ុនអភិវឌ្ឍន៍លំនៅឋាន ដែលពុំមានអាជ្ញាប័ណ្ណអាជីវកម្មអភិវឌ្ឍន៍ និងលំនៅឋានដែលម្ចាស់​គម្រោងមានបញ្ហា ឬក្ស័យធន តែត្រូវបានអនុញ្ញាតឱ្យផ្ទេរកម្មសិទ្ធិកាន់កាប់តាមរយៈយន្តការដោះស្រាយរបស់ក្រសួង ឬស្ថាប័នពាក់ព័ន្ធក៏ត្រូវទទួលបានការលើកលែង និងការអនុគ្រោះពន្ធប្រថាប់ត្រាដូចគ្នា។

តែក្រសួងសេដ្ឋកិច្ចមិនភ្លេចបញ្ជាក់បន្ថែមថា ការលើកលែង និងការអនុគ្រោះពន្ធប្រថាប់ត្រាពេលនេះពុំមានអានុភាពប្រតិសកម្មចំពោះប្រាក់ពន្ធ រួមទាំងទណ្ឌកម្មរដ្ឋបាល ពន្ធបន្ថែម និងការប្រាក់ដែលបានបង់រួចហើយទេ៕

ប្រភពព័ត៌មាន ៖ វិទ្យុបារាំងអន្តរជាតិ RFI www.rfi.fr/kh