នៅក្នុងសេចក្តីប្រកាសព័ត៌មានថ្ងៃទី១៤ ខែធ្នូ ព្រឹទ្ឋសភាកម្ពុជា បានគូសបញ្ជាក់ថា លោក ហ៊ុន សែន បានស្នើឲ្យបណ្តាប្រទេសនៅអារ៉ាប់មកវិនិយោគនៅកម្ពុជា ក្នុងវិស័យកសិកម្ម កសិឧស្សាកម្ម និងឧស្សាហកម្មកែច្នៃ ដូចជា ស្រូវអង្ករ គ្រាប់ស្វាយចន្ទី និងកសិផលជាច្រើនមុខទៀតរបស់កម្ពុជា ដើម្បីនាំចេញទៅកាន់ទីផ្សារតំបន់ និងពិភពលោក។

បើតាមអតីតនាយករដ្ឋមន្ត្រីកម្ពុជា លោក ហ៊ុន សែន កិច្ចព្រៀមព្រៀងស្តីពី ភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម ដែលបានចូលជាធរមាន កាលពីថ្ងៃទី៣១ ខែមករា ឆ្នាំ២០២៤ មានសារសំខាន់សម្រាប់ផ្លាស់ប្តូរពាណិជ្ជកម្ម សេដ្ឋកិច្ច និងវិនិយោគ។ លើសពីនេះ លោក ហ៊ុន សែន ក៏បានស្នើឲ្យមានកិច្ចព្រមព្រៀងពាណិជ្ជកម្ម វិនិយោគ ទេសចរណ៍ រវាងប្រទេសទាំងនោះ ជាមួយកម្ពុជា ព្រមទាំងបង្កើន និងបង្កើតការហោះហើរត្រង់មកកម្ពុជាផងដែរ។

តែបើតាមសេចក្តីប្រកាសព័ត៌មានរបស់ព្រឹទ្ឋសភាកម្ពុជាដដែល ភាគីទាំងអស់បានឯកភាពគ្នាជំរុញកិច្ចសហប្រតិបត្តិការក្នុងវិស័យដទៃទៀត មានដូចជា វិស័យអប់រំ កីឡា វប្បធម៌ សាសនា ការតភ្ជាប់ និងផ្លាស់ប្តូរប្រជាជន និងប្រជាជន។

គួរឲ្យដឹងថា នៅក្នុងចំណោមប្រទេសអារ៉ាប់ អេមីរ៉ាតអារ៉ាប់រួមមានទំនាក់ទំនងពាណិជ្ជកម្មសំខាន់មួយជាមួយកម្ពុជា។ ក្នុងរយៈពេល១០ខែ ឆ្នាំ២០២៤ ទំហំពាណិជ្ជកម្មរវាងកម្ពុជា និងអេមីរ៉ាតអារ៉ាប់រួម មានប្រមាណ ៧៥លានដុល្លារអាមេរិក កើនឡើង៧% ធៀបទៅនឹងរយៈពេលដូចគ្នាក្នុងឆ្នាំ២០២៣ បន្ទាប់ពីមានកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ដែលចូលជាធរមានកាលពីដើមឆ្នាំ២០២៤។ ក្នុងនោះកម្ពុជាបាននាំចេញទំនិញតម្លៃប្រមាណ ៥៥លានដុល្លារ ទៅអេមីរ៉ាតអារ៉ាប់រួម និងនាំចូលមកវិញប្រមាណ ២០លានដុល្លារ។ នេះបើតាមការលើកឡើងរបស់ លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម នៅក្នុងសិក្ខាសាលាមួយ កាលពី ទី២០ ខែវិច្ឆិកា ឆ្នាំ២០២៤។

សូមបញ្ជាក់ថា ទស្សនកិច្ចរបស់ប្រមុខគណបក្សកាន់អំណាចនៅកម្ពុជាទៅកាន់បណ្តាប្រទេសនៅអារ៉ាប់ កាលពីថ្ងៃទី៨ ដល់ថ្ងៃទី១៤ ខែធ្នូ នេះ ធ្វើឡើងក្រោយពី លោក ហ៊ុន សែន ទើបវិលត្រឡប់ពីធ្វើទស្សនកិច្ចនៅប្រទេសចិន ពីថ្ងៃទី០២ ដល់ថ្ងៃទី០៤ ធ្នូ ឆ្នាំ២០២៤៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh