អង្គការសហប្រជាជាតិ អំពាវនាវរកជំនួយមនុស្សធម៌ប្រមាណ ៤៧ពាន់លានដុល្លារ សម្រាប់ឆ្នាំថ្មី
6-ធ្នូ-2024
ក្នុងឆ្នាំថ្មីខាងមុខ អង្គការសហប្រជាជាតិ ត្រូវការកញ្ចប់មូលនិធិមនុស្សធម៌ ប្រមាណ ៤៧,៧ ពាន់លានដុល្លារ ដើម្បីជួយសង្គ្រោះមនុស្ស ប្រមាណ ១៩០ លាននាក់។ មនុស្សទាំងជាង ១៩០ លាននាក់នោះ ជាជនរងគ្រោះព្រោះតែវិបត្តិសង្គ្រាម និងរងគ្រោះពីការប្រែប្រួលអាកាសធាតុ។ 
លោក ថម ហ្វ្លេតឈ័រ នាយកកិច្ចការមនុស្សធម៌របស់អង្គការសហប្រជាជាតិ។ REUTERS – Denis Balibouse
ពិភពលោកសព្វថ្ងៃនេះ ប្រឈមមុខនឹងវិបត្តិច្រើនប្រភពច្រើនប្រភេទ និងជម្លោះចេះតែកើនខ្លាំងឡើងៗ ហើយប្រជាជនស៊ីវិលស្លូតត្រង់ទន់ខ្សោយ ដែលត្រូវធ្លាក់ខ្លួនរងគ្រោះ ទទួលផលវិបាកច្រើនជាងគេ។ បើគិតត្រឹមពាក់កណ្តាលឆ្នាំ២០២៤ មនុស្សយ៉ាងហោច ១២៣លាននាក់ ត្រូវផ្លាស់ទីទាំងបង្ខំចិត្ត ព្រោះតែជម្លោះប្រដាប់អាវុធ និងអំពើហិង្សា ហើយនិងបញ្ហាប្រែប្រួលអាកាសធាតុ។ នេះបើតាម នាយកកិច្ចការមនុស្សធម៌របស់អង្គការសហប្រជាជាតិ លោក ថម ហ្វ្លេតឈ័រ ដោយបញ្ជាក់ទៀតថា កាលពីឆ្នាំទៅមិញ អង្គការសហប្រជាជាតិ បានជួយសង្គ្រោះមនុស្សយ៉ាងតិច ១៦០លាននាក់ ទៅក្នុងពិភពលោក។
លោកអះអាងដែរថា ឆ្នាំ២០២៤ ជាឆ្នាំដែលអាក្រក់ចំពោះកិច្ចការមនុស្សធម៌ ដ្បិតថា មនុស្សជាច្រើន ជាជនស៊ីវិលស្លូតត្រង់ ត្រូវស្លាប់បាត់បង់ជីវិត នៅតំបន់ហ្កាហ្សា នៅអ៊ុយក្រែន ស៊ូដង់ លីបង់ ស៊ីរី ។ល។។ មន្ត្រីបុគ្គលិកមនុស្សធម៌របស់អង្គការសហប្រជាជាតិ ក៏ស្លាប់ច្រើនណាស់ដែរ ក្នុងឆ្នាំនេះ ពោលគឺច្រើនជាងឆ្នាំ២០២៣ ដែលមានស្លាប់ត្រឹមតែ ២៨០ នាក់។
ពីទីក្រុងហ្សឺណែវ ថ្ងៃពុធ ទី៤ ធ្នូ មន្ត្រីជាន់ខ្ពស់អង្គការសហប្រជាជាតិទទួលកិច្ចការមនុស្សធម៌ ក៏ព្យាករថា ឆ្នាំថ្មី២០២៥ អាចនឹងមានមនុស្សប្រមាណ ៣០៥លាននាក់ ដែលត្រូវការជំនួយសង្គ្រោះជាចាំបាច់។ អាស្រ័យហេតុនេះហើយ គេត្រូវការមូលធិនិយ៉ាងហោច ប្រមាណ ៤៧,៧ពាន់លានដុល្លារ ដើម្បីបំពេញគម្រោងសកម្មភាពមនុស្សធម៌។
គម្រោងថវិកាជំនួយនេះ ចំនួនតិចជាងកញ្ចប់លុយ ដែលធ្លាប់ទាមទារ ក្នុងឆ្នាំ២០២៤។ ឆ្នាំ២០២៤ អង្គការសហប្រជាជាតិ ប្រកាសស្នើជំនួយមនុស្សធម៌ កញ្ចប់ប្រាក់ ប្រមាណជិត ៥០ពាន់លានដុល្លារ ក៏ប៉ុន្តែទទួលបានត្រឹមតែ ៤៣% តែប៉ុណ្ណោះ។ ជំនួយថវិកាតិចតួច ក៏ធ្វើឲ្យសកម្មភាពមនុស្សធម៌ស្តួចស្តើងដែរ។ ជាក់ស្តែង ជំនួយស្បៀងអាហារនៅប្រទេសស៊ីរី ថយចុះ ប្រហែល៨០% ហើយឯជំនួយផ្នែកទឹកស្អាតនិងអនាម័យ នៅប្រទេសយេម៉ែន ក៏កាត់បន្ថយ បើទោះបីជាប្រទេសទាំងនេះ កំពុងតែប្រឈមមុខនឹងវិបត្តិជំងឺរាតត្បាតក្តី។
អង្គការសហប្រជាជាតិ បានទទួលស្គាល់ច្បាស់ថា ប្រព័ន្ធកិច្ចការមនុស្សធម៌អន្តរជាតិ កំពុងតែជួបវិបត្តិថវិកាជាខ្លាំង។ នេះព្រោះតែប្រទេសម្ចាស់ជំនួយលែងឧបត្ថម្ភច្រើនដូចពីមុន។ ទន្ទឹមនឹងគ្នានេះ ការវិលមកកាន់អំណាចប្រធានាធិបតីជាថ្មីរបស់ លោក ដូណាល់ ត្រាំ នៅសហរដ្ឋអាមេរិក ក៏ជាក្តីបារម្ភមួយដែរ អំពីការកាត់បន្ថយជំនួយឧបត្ថម្ភរបស់អាមេរិកចំពោះស្ថាប័នអន្តរជាតិ។ នាយកកិច្ចការមនុស្សធម៌របស់អង្គការសហប្រជាជាតិ លោក ថម ហ្វ្លេតឈ័រ បង្ហើបថានឹងអញ្ជើញទៅទីក្រុងវ៉ាស៊ីនតោន ឆាប់ៗខាងមុខ ដើម្បីពិភាក្សាជាមួយរដ្ឋបាលដឹកនាំថ្មីរបស់អាមេរិក៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
