បន្ទាប់ពី​បន្ទាប​ការប្រាក់ និង​បន្ធូរបន្ថយ​លក្ខខណ្ឌក្នុងការទិញ​ផ្ទះ រដ្ឋាភិបាលចិន​ បានប្រកាសនៅ​ថ្ងៃទី​១៧ តុលា នេះ ថាគេនឹងបង្កើន​ការផ្តល់​កម្ចី​ ​ក្នុងទំហំ៤០០០ពាន់លានយ៉ន់ ដែលស្មើនឹងប្រមាណ​៥៦០ពាន់​លានដុល្លារ​ ទៅ​ឲ្យ​គម្រោង​អចលនទ្រព្យ​មួយចំនួន ដែល​នៅជាប់គាំង សង់​មិនទាន់រួចរាល់​។ នេះគឺជាវិធានការថ្មីមួយទៀត របស់អាជ្ញាធរចិន​ ដើម្បី​ជំរុញផ្តល់សន្ទុះដល់វិស័យអចលនទ្រព្យ​ ដែល​នៅជាប់គាំង​។ តែយ៉ាងណា អ្នកជំនាញខ្លះ​​​​មិនជឿថា វិធានការ​ទាំងនេះ អាច​ជួយ​​ដល់​សេដ្ឋកិច្ច​ចិន​​ជា​ទូទៅ ដែល​កំពុងតែ​ជួបការលំបាកឡើយ​។

អាជ្ញាធរចិននឹង​បង្កើនការផ្តល់កម្ចី ពីនេះដល់ដាច់ឆ្នាំ​២០២៤ ទៅឲ្យ​គម្រោង​អចលនទ្រព្យ​មួយចំនួន ដែល​នៅជាប់គាំងសង់មិនទាន់រួច​។ ទំហំកម្ចី​​ថ្មីនេះ​ មានទឹកប្រាក់ចំនួន ​៤០០០ពាន់លានយ៉ន់ ដែលស្មើនឹងប្រមាណ​ ៥៦០ពាន់​លានដុល្លារ​។​ នេះបើផ្អែកតាម​ប្រកាស របស់​លោក Ni Hong រដ្ឋមន្ត្រីក្រសួងលំនៅដ្ឋាន​ចិន​ នៅក្នុងសន្និសីទកាសែត​ នៅទីក្រុងប៉េកាំង ថ្ងៃទី​១៧ តុលា​។​ លោករដ្ឋមន្ត្រីអះអាងថា នេះគឺជាវិធានការថ្មីមួយ​ថែមទៀត ដើម្បីជួយជំរុញផ្តល់សន្ទុះដល់វិស័យសំណង់ អចលនទ្រព្យ​ និង​ជួយ​ដល់សេដ្ឋកិច្ចចិនជាទូទៅ​។ លោក​ Ni Hong បាន​ឲ្យ​ទៀតថា លំនៅដ្ឋានប្រមាណ​ជា​១លាន​ទីតាំង ដែលចាស់ទ្រុឌទ្រោម ស្ថិតនៅ​ក្នុងភូមិ​តាមទីក្រុង​ នឹងត្រូវជួសជុលកែលម្អ តាមរយៈការ​ការ​សើរើ​រៀបចំកញ្ចប់ហិរញ្ញវត្ថុថ្មី​។

គួរបញ្ជាក់ថា កាលពីដើមឆ្នាំ២០២៤នេះ រដ្ឋាភិបាល​​ចិន​បាន​បង្កើតប្រព័ន្ធ​បញ្ជីសមួយ ដែលអាជ្ញាធរមូលដ្ឋាន​ អាច​ផ្តល់អនុសាសន៍ ទៅកាន់ធនាគារ ថាត្រូវជួយផ្តល់​ថវិកាកម្ចី ទៅឲ្យ​គម្រោងសាងសង់​​ណាមួយ ដែល​មានអាទិភាពមុនគេ​។​ នៅក្នុង​កម្មវត្ថុ​ជួយរំដោះ​គម្រោង​ដែលស្ទះ​ សង់មិនរួចព្រោះគ្មានប្រាក់​នេះ​​ រដ្ឋចិនធ្លាប់​បានប្រកាស​ បង្កើន​ទំហំប្រាក់កម្ចី​ម្តងហើយ ដែល​មានចំនួន​​ប្រមាណ​ ២២៣០​ពាន់លានយ៉ន់ ពោលគឺតិចជាងលើកនេះ​ ជិត​ពាក់​កណ្តាល​។

គួរកត់សំគាល់ថា ប៉ុន្មានសប្តាហ៍​មកនេះ រដ្ឋាភិបាលចិន​បានចេញវិធានការជាបន្តបន្ទាប់ ដើម្បីជួយ​ដល់វិស័យ​អចលនទ្រព្យ ដែលជាប់គាំង​តាំង​តែ​ពីឆ្នាំ​២០២០មក​ម្លេះ​។ ធនាគារ​កណ្តាលចិន បានទាញទម្លាក់អត្រាការប្រាក់​គោលសម្រាប់​កម្ចីអចលនទ្រព្យ​ និង​បាន​ទាញទំលាក់​ទំហំ​ប្រាក់បំរុង​តម្កល់តាមធនាគារទៀត ដើម្បី​អនុញ្ញាតឲ្យធានាគារចិន អាចបញ្ចេញ​ប្រាក់​ឲ្យគេ​​ខ្ចី​ឲ្យកាន់តែច្រើន​។ បន្ថែមពីនេះ ​​អាជ្ញាធរ​​តាមទីក្រុង​ធំៗមួយចំនួន ដូចជា ប៉េកាំង សៀងហៃ ឆឹងទូ ឬ​ធានជីង​ជាដើម បាន​ដកចេញនូវ​លក្ខខណ្ឌមួយចំនួន ដែលធ្លាប់រារាំងការទិញផ្ទះលើសពី២ ឬ៣​ជាដើម​។ លោក​ Tao Ling ទេសាភិបាលរងធនាគារកណ្តាលចិន បាន​លើកឡើងថា វិធានការទាំងអស់នេះ នឹងអនុញ្ញាត​ឲ្យប្រជាជន​ចិនប្រមាណ ១៥០លាននាក់ អាចទទួលបានអត្ថប្រយោជន៍​។

តែយ៉ាងណាក៏ដោយ អ្នកជំនាញ​មួយចំនួន​ ដែលបានចូលរួមស្តាប់ សន្និសីទកាសែត​របស់រដ្ឋាភិបាលចិន នៅថ្ងៃទី១៧ ​តុលា បាន​លើកឡើងថា គេនៅតែមិនជឿថា​ វិធានការថ្មីៗទាំងនេះ នឹងជួយជាក់ស្តែងដល់ការផ្តល់សន្ទុះ​​ក្នុងវិស័យ​អចលនទ្រព្យ​របស់ចិនឡើយ។ លោក Stephen Innes អ្នកវិភាគនៅ​ SPI Asset Management បាន​លើកឡើងថា ទីផ្សារ​ហាក់ដូចជាមិន​ត្រេកអរជាមួយ​វិធានការថ្មីនេះទេ ព្រោះថា​ត្រឹមតែសំដី​ប្រកាសវិធានការ ​​ត្រង់នេះបន្តិចត្រង់នោះបន្តិច គឺវាមិនអាចទៅដោះស្រាយបញ្ហា​អ្វីបានទេ ដល់ទីផ្សារអចលនទ្រព្យចិន​ ដែលពោរពេញដោយភាពអនាធិបតេយ្យ​៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh