នៅក្នុងជំនួបទ្វេរភាគី រវាងប្រមុខរដ្ឋាភិបាលកម្ពុជា និងប្រមុខរដ្ឋាភិបាលកាណាដា ក្រៅកិច្ចប្រជុំកំពូលអាស៊ាន ក្នុងទីក្រុងវៀងចន្ទន៍ ប្រទេសឡាវ កាលពីថ្ងៃទី១១ តុលាកន្លងទៅ នាយករដ្ឋមន្ត្រីកាណាដា លោក Justin Trudeau បានលើកឡើងពី ការពង្រឹងទំនាក់ទំនងវិស័យការទូតនៃប្រទេសពីរ និងថា កាណាដាគ្រោងបើកស្ថានឯកអគ្គរាជរដ្ឋទូត នៅរាជធានីភ្នំពេញនាពេលឆាប់ៗខាងមុខ។ តាមភាគីកាណាដា ការបើកឲ្យមានស្ថានទូតខ្លួននៅកម្ពុជាគឺ ដើម្បីបញ្ជាក់ពីការបន្តពង្រឹងទំនាក់ទំនង និងកិច្ចសហប្រតិបត្តិការនៃប្រទេសទាំងពីរឱ្យកាន់តែរឹងមាំថែមទៀត។ នាយករដ្ឋមន្រ្តីកម្ពុជាលោក ហ៊ុន ម៉ាណែត និងនាយករដ្ឋមន្ត្រីកាណាដាលោក Justin Trudeau នៅក្នុងជំនួបទ្វេរភាគីក្រៅកិច្ចប្រជុំកំពូលអាស៊ានក្នុងទីក្រុងវៀងចន្ទន៍ ប្រទេសឡាវ កាលពីថ្ងៃទី១១ តុលា © STPM

តាមខ្លឹមសារ ដែលបង្ហោះលើទំព័រហ្វេសប៊ុកផ្លូវការរបស់នាយករដ្ឋមន្រ្តីកម្ពុជា លោក ហ៊ុន ម៉ាណែត នាថ្ងៃទី១១ តុលា នាយករដ្ឋមន្រ្តីកាណាដាលោក Justin Trudeau បានមានប្រសាសន៍អំពី ការបន្តពង្រឹងកិច្ចសហប្រតិបត្តិការ និងទំនាក់ទំនងការទូតជាមួយកម្ពុជា ដោយបញ្ជាក់ពីការគ្រោងបើកស្ថានទូតកាណាដានៅកម្ពុជាផងដែរ។ សម្រាប់ទំនាក់ទំនងវិស័យពាណិជ្ជកម្មវិញ លោក Justin Trudeau បានឲ្យដឹងថា កាណាដាក៏នឹងបញ្ជូនគណ:ប្រតិភូពាណិជ្ជកម្ម មកបំពេញទស្សនកិច្ចនៅកម្ពុជា ដើម្បីជួបពិភាក្សាជាមួយក្រសួងពាណិជ្ជកម្ម និងក្រសួងពាក់ព័ន្ធនានាអំពីការជំរុញ និងលើកកម្ពស់ពាណិជ្ជកម្មទ្វេភាគីឲ្យកាន់តែមានសក្ដានុ ពលជាច្រើនទៀត។

គួរជម្រាបជូនថា កាណាដាជាដៃគូពាណិជ្ជកម្មទ្វេភាគីលំដាប់ទី៧ របស់កម្ពុជា ដែលបានរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា ដូចជាការបង្កើតការងារ និងការអភិវឌ្ឍជំនាញវិជ្ជាជីវៈសម្រាប់យុវជនកម្ពុជា។ នេះបើតាមការបញ្ជាក់របស់លោកនាយករដ្ឋមន្រ្តី ហ៊ុន ម៉ាណែត និងថា កម្ពុជាអរគុណកាណាដា ដែលបានចូលរួមក្នុងកិច្ចខិតខំប្រឹងប្រែងស្វែងរកសុខសន្ដិភាពនៅកម្ពុជា តាមរយៈការបញ្ជូនកងរក្សាសន្ដិភាពនៅទសវត្សរ៍ឆ្នាំ១៩៩០ ការរួមចំណែកបោសសម្អាតមីន និងការផ្ដល់ជំនួយអភិវឌ្ឍន៍ផ្សេងៗមកកម្ពុជា។

រដ្ឋាភិបាលកម្ពុជា តាមរយៈប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បញ្ជាក់ប្រាប់វិទ្យុបារាំងអន្តរជាតិ RFI នាថ្ងៃទី១៣ តុលា នេះថា កម្ពុជា និងកាណាដាតែងមានទំនាក់ទំនងល្អនឹងគ្នាជាយូរមកហើយ។ តាមលោក ប៉ែន បូណា ការឈានដល់បើកស្ថានទូតកាណាដានៅភ្នំពេញនេះ សូមញ្ជាក់ថា កាណាដាផ្តល់សារៈសំខាន់ដល់កម្ពុជាកាន់តែខ្លាំង និងបង្ហាញថា កម្ពុជាដើរតួនាទីកាន់តែសំខាន់​ ទាំងក្នុងឆាកតំបន់​ និងឆាកអន្តរជាតិ។ យ៉ាងណាមិញប្រធានអង្គភាពអ្នកនាំពាក្យរដ្ឋាភិបាលរូបនេះ មិនទាន់អាចបញ្ជាក់​ ពីពេលវេលានៃការបើកស្ថានទូតកាណាដានៅភ្នំពេញនៅឡើយទេ។

យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) ចាប់ពីខែមករា ដល់ខែកញ្ញា ឆ្នាំ២០២៤ ពាណិជ្ជកម្មទ្វេភាគី​ រវាងកម្ពុជា និងកាណាដា មានចំនួនសរុប ៨៩៥.៩៨ លានដុល្លារ កើនឡើង ២៨.២% បើធៀបនឹងរយៈពេលដូចគ្នាក្នុងឆ្នាំ ២០២៣។ ការនាំចេញរបស់កម្ពុជា​ ទៅកាន់ប្រទេសកាណាដា មានចំនួនសរុប ៨៤៨.៦៨ លានដុល្លារ នៃការផ្លាស់ប្តូរសរុប កើនឡើង ៣០.៨% ខណៈការនាំចូលកាណា​ដា​មកកម្ពុជាសរុប ៤៧.៣ លានដុល្លារ ថយចុះ ៥.៦% ។

កាលពីចុងខែកញ្ញា ឆ្នាំ២០២៤ នេះ ស៊ុយអែតបានប្រកាស បិទទា្វរស្ថាតទូតខ្លួននៅកម្ពុជា ដើម្បីរៀបចំឡើងវិញនៅចំណុចអាទិភាពរបស់ខ្លួន លើការអភិវឌ្ឍន៍សេដ្ឋកិច្ច សន្តិភាព និងសន្តិសុខ នៅតំបន់ជិតខាងខ្លួន ដើម្បីឆ្លើយតបនឹងការប្រែប្រួលបរិបទពិភពលោក បន្ទាប់ពីការផ្ទុះសង្គ្រាមរុស្ស៊ី-អ៊ុយក្រែន។ តែការការបិទស្ថានទូតស៊ុយអែតនៅកម្ពុជានេះ ធ្លាប់មានការវិភាគផ្ទុយគ្នា រវាងមន្ត្រីរដ្ឋាភិបាលកម្ពុជា និងអ្នកនៅក្រៅរដ្ឋាភិបាល ដោយភ្ជាប់ទៅនឹងបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជា៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh