ចិន និងអឺរ៉ុប បានបើកការចរចាគ្នា ដើម្បីព្យាយាមដោះស្រាយ​បញ្ចៀស​សង្គ្រាមពាណិជ្ជកម្ម បន្ទាប់ពីអឺរ៉ុបបានសម្រេច​ដាក់ពន្ធបន្ថែមចំនួន​ដល់ទៅ​៣៥% ទៅលើរថយន្តអគ្គិសនី​ចិន​។ តែយ៉ាងណា ផ្អែកតាម​ការ​ឲ្យដឹងពីក្រសួងពាណិជ្ជកម្មចិន គឺការចរចាគ្នានៅទីក្រុងព្រុចស៊ែល រវាង​ភាគីចិន និងអឺរ៉ុប បានទើបប្រទះនឹង​ការ​មិនចុះសម្រុងគ្នាខ្លាំងណាស់។ កូនរថយន្ត និងពាក្យ “Electric vechicles (EVs)” នៅខាងមុខទង់ជាតិចិន និងទង់សហភាពអឺរ៉ុប REUTERS – Dado Ruvic

នៅរសៀលថ្ងៃសៅរ៍​ ទី​១២ តុលា​ ក្រសួងពាណិជ្ជកម្មចិន បាន​បញ្ជាក់ឲ្យដឹងថា ការចរចា​រវាងតំណាងភាគីចិន ជាមួយ​នឹង​សហភាពអឺរ៉ុប​​ ស្តីពីសំណុំរឿងពន្ធលើរថយន្តអគ្គិសនីចិន ដែលប្រព្រឹត្តិធ្វើទៅនៅទីក្រុងព្រុច​ស៊ែលប៉ុន្មានថ្ងៃមកនេះ គឺបាន “ពើបប្រទះជាមួយ​នឹងការខ្វែងគំនិត មិនចុះសម្រុងគ្នាខ្លាំងណាស់”។

លិខិតរបស់​ក្រសួងពាណិជ្ជកម្ម​ចិន​នេះ លើកឡើងដែរ​ ក្រុមការងារចរចាបានចរចា​បាន​លទ្ធផល​ទៅមុខ​មួយចំនួនដែរ លើចំណុចខ្លះ ក៏ប៉ុន្តែវានៅតែមិនទាន់អាចឈានទៅសម្រេច​បាន​នូវ ដំណោះស្រាយមួយ​ ដែល​អាចទទួលយកបាន រវាងភាគីទាំងសងខាង​។

តាមរយៈលិខិតនេះ ក្រសួងពាណិជ្ជកម្មចិន បានអញ្ជើញភាគីសហភាពអឺរ៉ុប ទៅប៉េកាំងវិញម្តង ដើម្បី​បន្ត​ការចរចាដំណាក់កាលថ្មីមួយទៀតក្នុងពេលដ៏ឆាប់ខាងមុខ។ ភាគីចិនសង្ឃឹមថា ភាគីសហភាពអឺរ៉ុបនឹង​បោះជំហានដើរចូលខ្លះ ហើយ​ប្រកាន់ជំហរ​ចរចាប្រកបដោយ​ស្ថាបនា ក្នុងទិសដៅឈានទៅរកដំណោះស្រាយ​ទាំងអស់គ្នា​។

សូមរំលឹកថា នៅថ្ងៃទី​១២​ តុលា ថ្វីបើ​មានការជំទាស់ពីអាល្លឺម៉ង់ ក្រុមប្រទេសសមាជិកសហភាពអឺរ៉ុប បាន​បោះ​ឆ្នោតអនុម័តការសម្រេច របស់គណកម្មការអឺរ៉ុប ក្នុងការ​ដាក់ពន្ធបន្ថែម​លើរថយន្តអគ្គិសនី នាំចូល​ពីចិន។ សហភាពអឺរ៉ុប បានស្រាវជ្រាវរកឃើញថា រដ្ឋចិនបានជួយឧបត្ថម្ភប្រាក់ដល់ក្រុមហ៊ុន​ផលិតរថយន្ត ដើម្បីលក់​ក្នុងតម្លៃថោក​ ហើយ​សំរុកដណ្តើម​យកទីផ្សារនៅអឺរ៉ុប​។ ទង្វើនេះវាគឺជាការប្រកួតប្រជែងមិនស្មោះត្រង់ និងអយុត្តិធម៌សម្រាប់រថយន្តអគ្គិសនី​ដែលផលិត​នៅអឺរ៉ុប​។

ចាប់ពីពេលនេះទៅ សហភាពអឺរ៉ុបនឹងមានសិទ្ធិ​ ដាក់ ឬ មិនដាក់ពន្ធបន្ថែម ​លើពន្ធនាំចូល ​ដែល​មានស្រាប់រួចហើយចំនួន​១០​%។ ពន្ធបន្ថែមថ្មី​របស់អឺរ៉ុប អាចមាន​កម្រិត​ដល់ទៅ​ ៣៥% សម្រាប់រថយន្តអគ្គិសនី​ចិន​ម៉ាកខ្លះ។​ ប៉េកាំងបានប្រតិកម្មតប ដោយចោទថា​ វិធានការរបស់​អឺរ៉ុបនេះ គឺជាវិធានការពារតែខ្លួនឯង ដោយ​អយុត្តិធម៌​ និង​មិនសមហេតុផល​ទាល់តែសោះ​។ ដើម្បី​សងសឹកវិញ ចិនបាន​បើកការស៊ើបអង្កេត​ សន្និដ្ឋានថា ប្រទេសសមាជីក​​អឺរ៉ុប បានជួយ​ជាថវិកា​​ដល់ផលិតករខ្លួន ក្នុងវិស័យផលិត​ផល​ធ្វើពីសាច់ជ្រូក ផលិតផលធ្វើពីទឹកដោះគោ និង​ស្រាខ្លាំងធ្វើពីទំពាំងបាយជូរជាដើម​។ ជាទង្វើដែលចិនក៏​អាចចាត់ទុក​បានថា ជា​ការប្រកួតប្រជែងមិនស្មោះត្រង់ដែរ​។ គួរបញ្ជាក់ថា​ បើគិត​ពីថ្ងៃទី​២០ កញ្ញា មក ភាគី​ចិន និង​សហភាពអឺរ៉ុបបាន​បើកការចរគ្នា ចំនួន​៨​ដង​ហើយ​ ដើម្បី​បញ្ចៀសបញ្ហាសង្គ្រាមពាណិជ្ជកម្ម​៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh