ជាង​២ឆ្នាំមកហើយ ដែលសេដ្ឋកិច្ច​ចិន ស្ថិតនៅក្នុងការលំបាកខ្លាំង​។ ប៉ុន្មានសប្តាហ៍ចុងក្រោយ​នេះ រដ្ឋាភិបាលចិន​ បានចេញវិធានការជាបន្តបន្ទាប់ ដើម្បីចាក់បញ្ចូលសាច់ប្រាក់ ទៅក្នុងវិស័យធានាគារហិរញ្ញវត្ថុ​ ជំរុញការផ្តល់កម្ចី​ការប្រាក់ទាប​។ ហើយនៅថ្ងៃសៅរ៍ ទី​១២ ​តុលា​នេះ ក្រសួងហិរញ្ញវត្ថុចិន​បានប្រកាស វិធានការថ្មីៗបន្ថែមទៀត ដូចជាការ​​​បញ្ចេញ​បណ្ណកាតព្វកិច្ច​​បំណុលសាធារណៈ ដែលគិតជាទឹកប្រាក់​មានតម្លៃប្រមាណ ២៣០០ពាន់លានយាន់ ដែលស្មើនឹង ៣២៥ពាន់​លានដុល្លារអាមេរិក​។

លោក Lan Fo’an រដ្ឋមន្ត្រីក្រសួងហិរញ្ញវត្ថុចិន ពេលកំពុងប្រកាសវិធានការថ្មីជួយសេដ្ឋកិច្ច។ ប៉េកាំង ថ្ងៃទី​១២ តុលា ​២០២៤ AP

ឆ្នាំ​២០២៣ កំណើនសេដ្ឋកិច្ច​ចិន ​គឺមាន​កម្រិតត្រឹមតែ​៥,២% ដែលជា​កម្រិតទាបបំផុតមិនធ្លាប់​មាន​ ក្នុងរយៈពេល ​៣០ឆ្នាំ ចុងក្រោយ​នេះ​។ រហូតមកទល់ពេលនេះ សេដ្ឋកិច្ចចិនបន្តស្ថិត​នៅក្នុង​បញ្ហា​ប្រឈមជាច្រើន ដែលបានតម្រូវ​ឲ្យរដ្ឋចិន​ចេញវិធានការជាបន្តបន្ទាប់​ ដើម្បី​ដោះស្រាយ​។

ក្នុងសន្និសីទកាសែត ព្រឹក​ថ្ងៃសោរ៍ ​ទី​១២ តុលា លោក Lan Fo’an រដ្ឋមន្ត្រីហិរញ្ញវត្ថុចិន​បានប្រកាស​ថា​​ ក្នុងរយៈពេល​៣ខែតទៅនេះ​ រដ្ឋចិននឹងបញ្ចេញ​ “បណ្ណ​កាតព្វកិ​ច្ច​បំណុល” ដែលគិតជាទឹកប្រាក់​ស្មើនឹង​ ២៣០០ ពាន់លានយាន់ ដែលស្មើនឹង​២៣០ពាន់ដុល្លារអាមេរិក។ បន្ថែមពីនេះ លោករដ្ឋមន្ត្រីបានបញ្ជាក់ថា រដ្ឋនឹងបញ្ចេញ​បណ្ណកាតព្វកិច្ចបំណុលរដ្ឋបន្ថែមទៀត ដើម្បីជួយធានាគារពាណិជ្ជកម្មសាធារណៈ តែដោយ​មិនបាន​បញ្ជាក់ថា មានទំហំទឹកប្រាក់​ប៉ុន្មានទេ​។ លោក​បាន​ពន្យល់ថា មូលនិធិទាំងនេះ នឹងជួយធនាគារ ឲ្យ​អាចមានលទ្ធភាព​ប្រមូលសាច់ប្រាក់ឡើងវិញ បើកផ្លូវ​ឲ្យ​មាន​​សមត្ថភាព​ផ្តល់​កម្ចីកាន់តែច្រើន និង​ដើម្បីអាច ជួយ​អភិវឌ្ឍន៍សេដ្ឋកិច្ច​។

ដោយឡែក លោក Liao Min រដ្ឋមន្ត្រីស្តីទី​​​ ក្រសួងហិរញ្ញវត្ថុ​ចិន បាន​បញ្ជាក់ថា រដ្ឋនឹង​រុញ​​កម្រិត​អតិបរមា​នៃ​បំណុល​​​របស់​សហគមន៍​មូលដ្ឋាន​ (ខេត្ត-ក្រុង) ឡើងខ្ពស់ជាងមុន ដើម្បី​បើក​ផ្លូវ​ឲ្យ​អាជ្ញាធរមូលដ្ឋាន​អាចមានលទ្ធភាព​ចំណាយ​បានច្រើនជាងមុន។ សហគមន៍​មូលដ្ឋាន ស្រុក ខេត្ត ក្រុង​ នឹងទទួល​បាន​បណ្ណកាតព្វកិច្ចបំណុល​ពិសេស ដែលអាចអនុញ្ញាតឲ្យ​ពួកគេអាចទទួល​បាន​ ដីទំនេរមួយចំនួន យកទៅប្រើ​ប្រាស់​ក្នុងវិស័យអចលនទ្រព្យ។ បន្ថែមពីនេះ រដ្ឋចិននឹង​ជំរុញ​ការ​ការកែច្នៃ ទីតាំងពាណិជ្ជកម្ម​ យកទៅធ្វើជាផ្ទះស្នាក់នៅ​លក់​ក្នុងតម្លៃថោក​។

ទូរទស្សន៍CCTV បាន​ផ្សាយ​ផងដែរថា​ ចាប់ពីថ្ងៃទី ២៥ តុលា ទៅ ធនាគារទាំងអស់នៅចិន នឹង​ចាប់ផ្តើម​ទាញទម្លាក់អាត្រាការប្រាក់​ ជាស្វ័យប្រវត្តិ សម្រាប់កម្ចី​អចលទ្រព្យមួយចំនួនធំ ដែលកំពុងតែអនុវត្តដោយអនុលោមទៅតាម​ ការសម្រេចរបស់ធនាគារកណ្តាលចិន​។

លោក Heron Lim អ្នកវិភាគទីផ្សារនៅ Moody’s Analytics បានលើកឡើងថា វាជារឿងគួ​រឲ្យភ្ញាក់ផ្អើលណាស់ ដែលក្រសួងហិរញ្ញវត្ថុ​ចិន​ប្រកាសវិធានការ ចេញបណ្ណបំណុលរដ្ឋ ដើម្បីជួយសេដ្ឋកិច្ច​​ តែដោយ​មិនបញ្ជាក់តួលេខឲ្យ​ល្អិតល្អន់សោះ។ បើតាមលោកយល់ គឺ​ក្រសួងប្រហែលជាកំពុងតែ​គិតគូរលម្អិតបន្ថែមទៀត មិនទាន់រួចរាល់នៅឡើយទេ ដែលតម្រូវ​ឲ្យអ្នកវិនិយោគត្រូវរងចាំសិន​ ទំរាំមាន​ព័ត៌មានច្បាស់ការណ៍​។

តែផ្ទុយទៅវិញ លោក Zhang Zhiwei អ្នកជំនាញសេដ្ឋកិច្ចនៅ Pinpoint Asset Management បាន​លើកឡើងថា វិធានការរបស់​ក្រសួងហិរញ្ញវត្ថុចិននៅពេលនេះ គឺជាសារប្រកាសថា រដ្ឋចិន​មានលទ្ធភាព​បញ្ចេញបណ្ណ​កាតព្វកិច្ច ហើយ​អាច​បង្កើន​ឱនភាពថវិកា​រដ្ឋ​។ អ្នកជំនាញ​រូបនេះយល់ថា វិធានការនេះ ជាការប្រែប្រួល​ធំគួរសម​ ព្រោះតាម​មើលរដ្ឋចិន ​អាចសុខចិត្ត​ដំឡើងឱនភាពថវិការដ្ឋលើសពី​៣% នៅក្នុងឆ្នាំនេះ ដើម្បី​អាច ជួយ​ផ្តល់សន្ទុះ​ ដល់​ទីផ្សារក្នុងស្រុក និង​កាត់បន្ថយ​ការគំរាម​ពី​បញ្ហា​បរិត្តផរណា។ តែយ៉ាងណាក៏ដោយ​ លោក​ Julian Evans-Pritchard អ្នកវិភាគនៅ Capital Economics បាន​បង្ហាញការ​សោកស្តាយ ​ដែល​រដ្ឋាភិបាល​ចិននៅតែមិនព្រមចេញវិធានការ ជួយ​ឲ្យ​បានផ្ទាល់​ជាក់ស្តែង និងទូលំទូលាយ​ ទៅដល់​អ្នកប្រើប្រាស់​ជាទូទៅ ដើម្បីជំរុញការចាយ​វាយ​ក្នុងស្រុកដែលនៅនឹងថ្កល់៕

ប្រភពព័ត៌មាន ៖ វិទ្យុព័ត៌មានអន្តរជាតិ RFI https://www.rfi.fr/kh