ក្នុងជំនួបត្រីភាគីនៅក្រៅក្របខណ្ឌកិច្ចប្រជុំកំពូលអាស៊ាននា នៅថ្ងៃទី១០ តុលា ក្នុងក្រុងវៀងចន្ទន៍ ប្រទេសឡាវ ប្រមុខរដ្ឋាភិបាលកម្ពុជា ឡាវ និងវៀតណាម បានប្តេជ្ញាបន្តកិច្ចសហប្រតិបត្តិការរួមគ្នា ដើម្បីធ្វើឱ្យតំបន់មេគង្គ និងឥណ្ឌូចិនក្លាយជាគំរូនៃការទំនាក់ទំនង ការច្នៃប្រឌិត និងវិបុលភាពតាមរយៈការអភិវឌ្ឍហេដ្ឋារចនាសម្ព័ន្ធរួមគ្នា។ ជំនួបនេះធ្វើឡើង បន្ទាប់ពីកម្ពុជាបានសម្រេចដកខ្លួនចេញពីកិច្ចសហប្រតិបត្តិការអភិវឌ្ឍន៍តំបន់ត្រីកោណ CLV-DTA។

ជំនួបក្រៅក្របខណ្ឌនៃកិច្ចប្រជុំកំពូលអាស៊ានក្នុងប្រទេសឡាវរវាងនាយករដ្ឋមន្រ្តីកម្ពុជា ឡាវ និងវៀតណាម គឺជាជំនួបផ្លូវការលើកទី១ បន្ទាប់ពីប្រទេសកម្ពុជាបានសម្រេចដកខ្លួនចេញពីកិច្ចសហប្រតិបត្តិការអភិវឌ្ឍន៍តំបន់ត្រីកោណ CLV-DTA កាលពីខែកញ្ញាកន្លងទៅ។ យោងតាមសេចក្តីប្រកាសព័ត៌មានរបស់រដ្ឋាភិបាលឡាវ ​មេដឹកនាំកម្ពុជា ឡាវ និងវៀតណាមបានប្តេជ្ញាបន្តពង្រឹងកិច្ចសហប្រតិបត្តិការរវាងប្រទេសទាំង៣ ដើម្បីធ្វើឱ្យតំបន់មេគង្គ និងឥណ្ឌូចិនក្លាយជាគំរូនៃការទំនាក់ទំនង ការច្នៃប្រឌិត និងវិបុលភាព។ តាមសេចក្តីប្រកាសព័ត៌មានដដែល ឡាវ កម្ពុជា និងវៀតណាម បានបញ្ជាក់ពីជំហរមុតមាំក្នុងការបន្តកិច្ចសហប្រតិបត្តិការអភិវឌ្ឍវិស័យសេដ្ឋកិច្ច វិនិយោគ ពាណិជ្ជកម្ម ការការពារបរិស្ថាន និងជាពិសេស កិច្ចសហប្រតិបត្តិការអភិវឌ្ឍន៍តភ្ជាប់ហេដ្ឋារចនាសម្ព័ន្ធទាំងផ្លូវគោក ផ្លូវទឹក និងផ្លូវអាកាស។

តាមពិត ការឯកភាពដូចនេះ ក៏មិនមានអ្វីខុសពីជំនួបប្រមុខការទូតកម្ពុជា វៀតណាម និងឡាវថ្មីៗនេះ នៅក្រៅក្របខណ្ឌនៃមហាសន្និបាតអង្គការសហប្រជាជាតិ នៅសហរដ្ឋអាមេរិក។ នាឱកាសជំនួបកាលណោះ ប្រមុខការទូតកម្ពុជា លោក សុខ ចិន្តាសោភា បានបញ្ជាក់ជាថ្មី នៅចំពោះមុខប្រមុខការទូតឡាវ និងវៀតណាមថា ការដែលកម្ពុជាបានដកខ្លួនចេញពីកិច្ចសហប្រតិបត្តិការអភិវឌ្ឍន៍តំបន់ត្រីកោណ CLV-DTA ក្នុងខែកញ្ញាកន្លងទៅ គឺមិនប៉ះពាល់ដល់យន្តការកិច្ចសហប្រតិបត្តិការផ្សេងទៀតទេ គិតទាំងទ្វេភាគី ឬត្រីភាគីជាមួយប្រទេសជិតខាងទាំង២។

ចំណែកប្រមុខការទូតវៀតណាមក៏បានបញ្ជាក់វិញដែរថា វៀតណាមមិនប្តូរជំហរក្នុងកិច្ចការពង្រឹងទំនាក់ទំនងពិសេសជាមួយប្រទេសកម្ពុជា និងឡាវ ហើយថា វៀតណាមនឹងបង្កើនទំនាក់ទំនងឱ្យកាន់តែស៊ីជម្រៅថែមទៀតនៅក្នុងចំណោមបក្សនយោបាយរដ្ឋ និងប្រជាជននៃប្រទេសទាំង៣។ គួរជម្រាបជូនថា ទោះបីជាកម្ពុជាបានសម្រេចដកខ្លួនចេញពីកិច្ចសហប្រតិបត្តិការ CLV-DTA ក៏ដោយក៏កម្ពុជានៅមានកិច្ចសហប្រតិបត្តិការសេដ្ឋកិច្ចរួមគ្នាមួយទៀតជាមួយប្រទេសជិតខាងខ្លួនវៀតណាម ឡាវ និងភូមា គឺកិច្ចសហប្រតិបត្តិការរវាងកម្ពុជា ឡាវ ភូមា និងវៀតណាមហៅកាត់ CLMV ដែលជាយន្តការអាស៊ានបង្កើតឡើងកាលពីឆ្នាំ២០០០៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh