ឧតុនិយមពិភពលោក៖ ទឹកជំនន់ និងគ្រោះរាំងស្ងួតសព្វថ្ងៃ នឹងមានកាន់តែខ្លាំងនៅអនាគត
9-តុសា-2024
គ្រោះទឹកជំនន់កាន់តែច្រើន និងភាពរាំងស្ងួតកាន់តែខ្លាំង ជាសញ្ញាអាសន្នគ្រោះថ្នាក់ ជាក់ស្តែង ដរចេញពីការប្រែប្រែអាកាសធាតុ។ អាកាសធាតុប្រែប្រួល ក៏បានធ្វើឲ្យវដ្តទឹកលើផែនដី លែងអាចព្យាករទុកជាមុនបានទៀតហើយ។ នេះបើតាមការគូសបញ្ជាក់របស់អង្គការឧតុនិយមពិភពលោក ដោយក្រើនរំឮកថា ចាំបាច់ត្រូវតែដាក់ចេញវិធានាការដោះស្រាយ ជាបន្ទាន់បំផុត។
ភ្លៀងធំ លិចឡាននៅម៉ិចស៊ីកូ ខែកញ្ញា ២០២៤។ REUTERS – Ivan Arias
គ្រោះរាំងស្ងួត គ្រោះទឹកជំនន់ ជំនន់ទឹកភ្លៀង ខ្យល់ព្យុះ កើតមានកាន់តែខ្លាំង សាហាវឡើងៗ នៅគ្រប់ទ្វីប មិនថា នៅអាស៊ី អឺរ៉ុប អាហ្វ្រិក និងអាមេរិក នោះឡើយ។ ទ្វីបនីមួយៗសុទ្ធតែបានទទួលរងគ្រោះ និងភ្លក់រសជាតិលំបាកវេទនា ក្នុងឆ្នាំទៅមិញ និងក្នុងឆ្នាំនេះ។ ២ឆ្នាំចុងក្រោយ ភពផែនដីជួបកម្តៅក្តៅខ្លាំងបំបែកកំណត់ត្រា តែទន្ទឹមនឹងគ្នានោះ ភ្លៀងធំ ទឹកជន់ក៏ខ្លាំងណាស់ដែរ។ ធាតុអាកាសផ្លាស់ប្តូរលឿនរហ័ស លែងអាចព្យាករបាន។ ក្តៅខ្លាំង រំពេចន៍ក៏ស្រាប់តែភ្លៀងខ្លាំង ហើយក៏ឆាប់រាំងហួតទៅវិញរហ័សដែរ។
ផ្ទាំងដុំទឹកកកនៅតំបន់ប៉ូលរលាយឆាប់ ក៏ជំរុញគ្រោះទឹកជន់ ក៏កាន់តែសាហាវ។ ផ្ទុយទៅវិញ ៣ឆ្នាំមកនេះ ទឹកទន្លេក្នុងប្រទេសខ្លះ បែរជារីងស្ងួត អស់ប្រមាណ ៥០%។ សព្វថ្ងៃ មនុស្ស ៣,៦ ពាន់លាននាក់ ខ្វះទឹកស្អាតប្រើប្រាស់ យ៉ាងហោចក៏ខ្វះ១ខែដែរ ក្នុង១ឆ្នាំ។ ចំនួននេះ អាចកើនឡើងដល់ ៥ពាន់លាននាក់ នៅពាក់កណ្តាលសតវត្សរ៍។
គ្រោះធម្មជាតិ ខាងលើនេះ ទាក់ទងយ៉ាងជិតស្និទ្ធនឹងបាតុភូត ឡានីណា និងអែលនីញ៉ូ ហើយនិងដចេញពីកំណើនកម្តៅផែនដី ដែលវាបណ្តាលមកពីសកម្មភាពមនុស្សក្នុងវិស័យឧស្សហកម្ម។ នេះបើតាមការពន្យល់របស់ លោកស្រី Celeste Saulo អគ្គលេខាធិការអង្គការឧតុនិយមពិភពលោក ក្នុងពេលបង្ហាញរបាយការណ៍ស្តីពីស្ថានភាពទឹកនៅលើពិភពលោក កាលពីថ្ងៃច័ន្ទ ទី៧ តុលា។
លោកស្រី ក៏សង្កត់ធ្ងន់ថា សញ្ញាអាសន្នគ្រោះថ្នាក់ធម្មជាតិទាំងនេះ មិនអាចឲ្យអ្នកដឹកនាំប្រទេសនីមួយៗ បិទភ្នែក ធ្វើមិនដឹងឮនោះឡើយ។ ប្រសិនបើ ពុំព្រមចាត់វិធានាការដោះស្រាយច្បាស់លាស់ និងម៉ឺងម៉ាត់ទេ មនុស្សរាប់លាននាក់ នឹងរងគ្រោះ។
មន្ត្រីជាន់ខ្ពស់អង្គការឧតុនិយមពិភពលោក ១រូបទៀត លោក Stefan Uhlenbrook អ្នកជំនាញខាងប្រព័ន្ធធរាសាស្ត្រ បានទាញការចាំអារម្មណ៍ចំពោះការសាងសង់រចនាសម្ព័ន្ធ ដើម្បីធានាការពារសុវត្ថិភាពប្រជាជន ដែលជារឿងសំខាន់ ហើយក៏រឹតតែសំខាន់ទៅទៀត ក្នុងការសន្សំសំចៃទឹក ពិសេសទឹកប្រើសម្រាប់ស្រោចស្រពដំណាំកសិកម្ម។ ដ្បិតថា វិស័យកសិកម្ម ត្រូវចំណាយទឹកច្រើន ស្ទើរតែ ៧០% នៃការប្រើប្រាស់ទឹក ក្នុងពិភពលោក៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
