នៅជប៉ុន តម្រូវការអង្ករកើនឡើងខ្លាំង ហើយសញ្ញាខ្វះអង្ករ ចាប់មានតាំងតែពីដើមរដូវក្តៅមកម្ល៉េះ។ ក្រសួងកសិកម្មជប៉ុនឲ្យដឹងថា ជង្រុកស្តុកអង្កររបស់ឯកជន បានធ្លាក់ចុះ១,៥៦លានតោន នៅខែមិថុនា ដែលជាតួលេខស្តុកអង្ករធ្លាក់ចុះខ្លាំង ចាប់ពីឆ្នាំ១៩៩៩មក។ ពោលគឺស្តុកអង្ករធ្លាក់ចុះ ២០% ធៀបនឹងឆ្នាំទៅមិញ។
រីឯតម្លៃអង្ករក៏បានហក់ឡើងខ្ពស់ដែរ។ ១ប៉ាវ ៦០គីឡូក្រាម តម្លៃប្រមាណជាង ១៥ ៦២០ យេន (ប្រហែលជាង ៩៧ អឺរ៉ូ)។ ពោលគឺឡើងថ្លៃប្រមាណជាង ១៣% គ្រាន់តែតែក្នុងរយៈពេល ១ឆ្នាំ។ សេចក្តីរាយការណ៍របស់អ្នកឆ្លើយឆ្លងព័ត៌មានបរទេស ដែលឈរជើងនៅតូក្យូ បានបង្ហាញពីហាងលក់អង្ករ ស្ទើរតែរកអង្ករលក់ឲ្យភ្ញៀវពុំបានផងទេ។ ចំណែកអ្នកដឹកជញ្ជូនអង្ករមកផ្គត់ផ្គង់ហាងលក់អង្ករ ក៏មានភាពយឺតយ៉ាវខ្លាំងទៀត។
ការខ្វះអង្ករ ព្រោះតែប្រមូលផលបានទាប ដ្បិតតែបញ្ហាអាកាសធាតុ ជារឿងមួយ។ ក៏ប៉ុន្តែ បញ្ហាខ្វះអង្ករនៅជប៉ុនគ្រានេះ ត្រូវគេមើលឃើញថា វាបង្កផលវិបាកចេញមកពីព្រោះតែបន្ទាត់នយោបាយកសិកម្មរបស់រដ្ឋាភិបាលជប៉ុន។ ជាក់ស្តែង ច្រើនឆ្នាំចុងក្រោយនេះ រដ្ឋាភិបាលក្រុងតូក្យូ បានប្តូរយុទ្ធសាស្ត្រកសិកម្ម ដោយកាត់បន្ថយផ្ទៃដីស្រែដាំស្រូវប្រមាណជា ៤០% និងយកដីដាំគ្រាប់ធញ្ញជាតិផ្សេងៗវិញ។ ដើម្បីជំរុញនយោបាយនេះ រដ្ឋាភិបាលជប៉ុនបានជួយឧបត្ថម្ភធនផ្តល់ប្រាក់ ដល់ប្រជាកសិករ និងអ្នកផលិតស្រូវ ចំពោះការខាតបង និងជាថ្នូរចំពោះការបង្វែរទៅដាំដុះកសិផលផ្សេង ដូចជាដាំស្រូវសាឡីជាដើម។ ក្នុងកម្មវិធីនេះដែរ រដ្ឋាភិបាលជប៉ុន បានផ្ទេរកញ្ចប់ហិរញ្ញវត្ថុចំនួនប្រមាណ ៣៥០ពាន់លានយេន (ប្រមាណ ២,២ពាន់លានអឺរ៉ូ) ជារៀងរាល់ឆ្នាំ ទៅដល់ក្រុមកសិករធ្វើស្រែ។
ក្រុមអ្នកស្រាវជ្រាវ និងអ្នកជំនាញខាងចំណីអាហារ ក៏ធ្លាប់បានជំរុញឲ្យរដ្ឋាភិបាលជប៉ុនសើរើពិនិត្យមើលចំណាត់ការឡើងវិញ ក៏ប៉ុន្តែទាំងក្រសួងកសិកម្ម និងទាំងរដ្ឋាភិបាលក្រុងតូក្យូ ហាក់ដូចជាមិនអើពើឡើយ ហើយប្រធានបទនេះ ហាក់ដូចជាគ្មានត្រូវយកទៅជជែកពិភាក្សាអ្វីឲ្យផុសផុលនោះដែរ។ ជាផលវិបាក ប្រជាពលរដ្ឋជប៉ុននៅក្រុងតូក្យូ ត្រូវបណ្តាញកាសែតបរទេស យកសម្តីទៅផ្សាយថា ពួកគេពេលនេះ កំពុងតែបារម្ភពីខ្វះអង្ករទទួលទាន ច្រើនជាងព្រួយពីខ្យល់ព្យុះ៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr.kh
