អត្រាអត់ការងារធ្វើ ក្នុងចំណោមយុវជនចិនអាយុក្រោម ២៤ឆ្នាំ បានកើនឡើងបន្ថែមទៀត នៅក្នុងខែសីហា កន្លងទៅនេះ។ ផ្អែកតាមតួលេខចុងក្រោយ ផ្សាយដោយការិយាល័ស្ថិតិជាតិចិន យុវជនចិនអត់ការងារធ្វើមានចំនួន ១៨,៨% តែដោយមិនរាប់និស្សិតចូលក្នុងនេះទេ។ យ៉ាងណាក៏ដោយ អត្រាយុវជនអត់ការងារធ្វើ កើនឡើងជាលំដាប់នេះ បានបង្ហាញអំពីការលំបាកនៃសេដ្ឋកិច្ចចិន ក្នុងពេលបច្ចុប្បន្ននេះ។
ទីតាំងចុះឈ្មោះរកការងារធ្វើមួយកន្លែង នៅទីក្រុងប៉េកាំង ថ្ងៃទី ៩ សីហា ២០២៣ AFP – JADE GAO
ក្នុងខែសីហា អត្រាអត់ការងារធ្វើនៃយុវជនចិន អាយុចន្លោះពី ១៦ ដល់ ២៤ឆ្នាំ មានចំនួន១៨,៨%។ ចំនួននេះ បានកើនឡើងបន្តិចថែមទៀត បើប្រៀបធៀបទៅតួលេខប្រចាំខែកក្កដា។ នេះបើផ្អែកតាមតួលេខផ្លូវការ ចេញផ្សាយដោយការិយាល័យស្ថិតិជាតិចិន កាលពីថ្ងៃសុក្រ ទី២១ កញ្ញា។ តែអត្រាតួលេខនេះ គឺគេរាប់តែយុវជនចិន ដែលមិនមែនជាសិស្សនិស្សិតកំពុងបន្តការសិក្សា។
សូមរំលឹកដែរថា អត្រាអត់ការងារធ្វើរបស់យុវជនចិននេះ បានកើនឡើងខ្ពស់ខ្លាំងដល់ទៅ ២១,៣% កាលពីខែមិថុនា ឆ្នាំ២០២៣។ ក្រោយមកអាជ្ញាធរចិន បានធ្វើការកែប្រែរបៀបធ្វើស្ថិតិ ដោយបានដកនិស្សិតចេញពីការរាប់តួលេខស្ថិតិនេះ ដើម្បីកាត់បន្ថយអត្រាកុំឲ្យខ្ពស់ខ្លាំងពេក។
គួរកត់សំគាល់ថា អត្រាអត់ការងារធ្វើរបស់យុវជនចិននេះ គឺមានការតាមដានយកចិត្តទុកដាក់ណាស់ មិនថាពីក្នុងឬក្រៅស្រុក ព្រោះវាសបង្ហាញឲ្យឃើញ អំពីសុខភាពនៃសេដ្ឋកិច្ចចិន។ កាលពីខែឧសភា លោកប្រធានាធិបតីចិន ស៊ី ជីនពីង បានប្រកាសថារដ្ឋាភិបាលចិន ត្រូវតែចាត់ទុកអត្រាមានការងារធ្វើរបស់យុវជនចិន គឺជាអាទិភាពធំបំផុត។ កាលពីខែមិថុនាកន្លងទៅ និស្សិតចិនចំនួនជិត១២លាននាក់ បានបញ្ចប់ការសិក្សា ហើយត្រូវហក់ចូលក្នុងទីផ្សារការងារ។ ប្រការនេះ បានធ្វើឲ្យមានការប្រកួតប្រជែងកាន់តែខ្លាំង នៅលើទីផ្សារការងារនៅចិន។
ដោយឡែក អត្រាអត់ការងារធ្វើ នៃមនុស្សអាយុចន្លោះពី ២៥ ទៅ ២៩ឆ្នាំវិញ ក្នុងខែសីហា មានចំនួន៦,៩% ពោលគឺបានកើនឡើងបន្តិច បើប្រៀបធៀបទៅខែកក្កដា ដែលមាន ៦,៥%។ ការចេញផ្សាយរបស់ការិយាល័យស្ថិតិជាតិចិនស្តីពី អត្រាអត់ការងារធ្វើ ក្នុងខែសីហានេះ គឺត្រូវបានធ្វើឡើងប៉ុន្មានថ្ងៃ ក្រោយការិយាល័យនេះ ចេញផ្សាយតួលេខ បង្ហាញអំពើការធ្លាក់ចុះ នៃពាណិជ្ជកម្មលក់រាយក្នុងស្រុក ព្រមទាំងកំណើនផលិតកម្មឧស្សាហកម្មចិន នៅក្នុងខែសីហា។
អត្រាតួលេខទាំងនេះ បានបង្ហាញឲ្យឃើញ នូវការលំបាករបស់ចិន ដែលមិនអាចផ្តល់សន្ទុះយូរអង្វែង ដល់សេដ្ឋកិច្ចខ្លួន បើទោះបីជាមានវិធានការប្រឹងប្រែងច្រើនរាប់មិនអស់ក៏ដោយ ប៉ុន្មានឆ្នាំមកនេះ។ នៅក្នុងលិខិតប្រកាសមួយរបស់ខ្លួន ការិយាល័យស្ថិតិជាតិចិន បានទទួលស្គាល់ថា សេដ្ឋកិច្ចចិនកំពុងឆ្លងកាត់ឧបសគ្គ និងការលំបាកមួយចំនួន ដោយសារតែផលប៉ះពាល់អវិជ្ជមាន កើតចេញពីការផ្លាស់ប្តូរនៃបរិយាកាសខាងក្រៅ បូកបន្ថែមនឹងតម្រូវការចាយវាយក្នុងស្រុក ដែលមិនទាន់កើនឡើងគ្រប់គ្រាន់៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr.kh
