ធនាគារជាតិនៃកម្ពុជា និងធនាគារកណ្ដាលនៃប្រទេសម៉ាឡេស៊ី បានបើកដំណើរការបណ្ដាញទូទាត់QR Code ឆ្លងដែនរវាងប្រទេសទាំងពីរ ក្នុងដំណាក់កាលដំបូងជាផ្លូវការនៅថ្ងៃទី១៩ ខែកញ្ញា ឆ្នាំ២០២៤។ ធនគារកណ្ដាលម៉ាឡេស៊ីបញ្ជាក់ថា ការទូទាត់តាម QRនេះ នឹងអនុញ្ញាតឱ្យទីតាំងរបស់ពាណិជ្ជករនៅក្នុងប្រទេសកម្ពុជា និងម៉ាឡេស៊ី ជាង៥លានកន្លែង ដែលភាគច្រើនធ្វើអាជីវកម្មខ្នាតតូច អាចទទួលបានអតិថិជនកាន់តែទូលំទូលាយ និងអាចជំរុញពាណិជ្ជកម្ម ទេសចរណ៍ និងកំណើនសេដ្ឋកិច្ចនៃប្រទេសទាំងពីរ។

កម្ពុជា-ម៉ាឡេស៊ីបើកដំណើរការទូទាត់QR ឆ្លងដែនដើម្បីជំរុញពាណិជ្ជកម្ម ទេសចរណ៍ និងសេដ្ឋកិច្ច © NBC

ធនាគារកណ្ដាល Negara Malaysia (BNM) របស់ប្រទេសម៉ាឡេស៊ីបានបញ្ជាក់នៅក្នុងសេចក្ដីប្រកាសព័ត៌មានថា ក្នុងដំណាក់កាលដំបូងនៃការបើកដំណើរការទូទាត់ QR ឆ្លងដែនរវាងកម្ពុជា និងម៉ាឡេស៊ី អ្នកប្រើប្រាស់មកពីប្រទេសកម្ពុជាអាចស្កែនបង់ប្រាក់ថ្លៃទំនិញនៅប្រទេសម៉ាឡេស៊ីបាន តាមរយៈទូរសព្ទដៃរបស់ពួកគេ ក្នុងកម្មវិធីទូទាត់បាគង និងកម្មវិធីធនាគារចល័តរបស់ធនាគារ មេប៊ែង Maybank ។ ចំណែកនៅដំណាក់កាលបន្ទាប់ អ្នកប្រើប្រាស់ម៉ាឡេស៊ី ដែលធ្វើដំណើរមកកាន់ប្រទេសកម្ពុជានឹងអាចទូទាត់ការទិញទំនិញរបស់ពួកគេ នៅកម្ពុជាតាមរយៈការស្កេន Khmer QR (KHQR) ដោយប្រើកម្មវិធីទូទាត់តាមទូរស័ព្ទ របស់ស្ថាប័នហិរញ្ញវត្ថុ ដែលចូលរួមក្នុងដំណើរការនេះ។

ទាំងធនាគារជាតិនៃកម្ពុជា និងធនាគារកណ្ដាលនៃប្រទេសម៉ាឡេស៊ី សុទ្ធតែអះអាងថា ការដាក់ឲ្យដំណើរការទូទាត់ប្រាក់តាមQR ឆ្លងដែននេះ គឺអាចឱ្យពាណិជ្ជករនៅទីតាំងជាង ៥លាន ទីតាំង នៅកម្ពុជា និងនៅម៉ាឡេស៊ី ដែលភាគច្រើនជាម្ចាស់អាជីវកម្មខ្នាតតូចនោះ អាចទទួលបានអតិថិជនកាន់តែទូលំទូលាយថែមទៀត។ បន្ថែមពីនេះ ធនាគារកណ្ដាលម៉ាឡេស៊ីថា ការទូទាត់ប្រាក់តាមQR ឆ្លង ដែននឹងជំរុញពាណិជ្ជកម្ម ទេសចរណ៍ និងកំណើនសេដ្ឋកិច្ចនៃប្រទេសទាំងពីរ។

តែយ៉ាងណា ការបើកដំណើរការនៅថ្ងៃទី១៩ កញ្ញា កន្លងទៅនេះ គឺគ្រាន់តែជាការបើកដំណើរការដំណាក់ដំបូងប៉ុណ្ណោះ ចំណែកកាលបរិច្ឆេទនៃការបើកដំណើរការដំណាក់ទី២ គឺគេនៅមិនទាន់ដឹងនៅឡើយ។

ទេសាភិបាលធនាគារកណ្ដាលម៉ាឡេស៊ី លោក Dato’ Seri Abdul Rasheed Ghaffour បានបញ្ជាក់ថា ការទូទាត់QRឆ្លងដែន មិនត្រឹមតែគាំទ្រដល់សេដ្ឋកិច្ចឌីជីថលប៉ុណ្ណោះទេ ប៉ុន្តែ ថែមទាំងជំរុញសកម្មភាពសេដ្ឋកិច្ចនៅទូទាំងតំបន់ឱ្យងាយស្រួល និងប្រសិទ្ធភាពផងដែរ។ លោកបន្ដថា ធនាគារកណ្ដាលម៉ាឡេស៊ី ប្តេជ្ញាចិត្តក្នុងការជំរុញសមាហរណកម្មសេដ្ឋកិច្ច និងហិរញ្ញវត្ថុកាន់តែធំនៅក្នុងអាស៊ាន និងការសហការយ៉ាងជិតស្និទ្ធជាមួយដៃគូក្នុងតំបន់ តាមរយៈការជំរុញសេវាកម្មហិរញ្ញវត្ថុឌីជីថលប្រកបដោយសុវត្ថិភាព។

លោកស្រី ជា សិរី ទេសាភិបាលធនាគារជាតិកម្ពុជា ធ្លាប់បានអះអាងថា ការទូទាត់ឆ្លងព្រំដែននេះ នឹងដើរតួនាទីយ៉ាងសំខាន់ក្នុងការជំរុញសកម្មភាពពាណិជ្ជកម្ម និងហិរញ្ញវត្ថុក្នុងប្រទេសទាំងពីរ។ លោកស្រីបន្ថែមថា នេះជាជំហានដ៏សំខាន់មួយ ឆ្ពោះទៅរកការសម្រេចបាននូវចក្ខុវិស័យនៃបណ្តាញអាស៊ានដែលផ្តោតទៅលើប្រព័ន្ធទូទាត់ ដែលមានល្បឿនលឿន ប្រសិទ្ធិភាព សុវត្ថិភាព និងអន្តរទំនាក់ទំនងក្នុងតំបន់។

អ្នកឧកញ៉ាលឹម ហេង អនុប្រធានសភាពាណិជ្ជកម្មកម្ពុជា ធ្លាប់បានលើកឡើងថា ការតភ្ជាប់នៃការទូទាត់កូដ QR ឆ្លងដែនគឺពិតជាមានសារៈសំខាន់ណាស់ ទាំងចំពោះធុរជន អ្នកទេសចរ និងវិនិយោគិនរវាងប្រទេសទាំងពីរ ព្រោះវានឹងជួយបង្កើតភាពងាយស្រួលក្នុងការទូទាត់ ឬការធ្វើពាណិជ្ជកម្មរវាងគ្នា។

គួរជម្រាបថា នៅមុនម៉ាឡេស៊ី ធនាគារជាតិនៃកម្ពុជា បានដាក់ឲ្យដំណើរការនូវការទូទាត់ឆ្លងដែន តាមប្រព័ន្ធ QR Code ជាមួយប្រទេសថៃ វៀតណាម, កូរ៉េខាងត្បូង និងចិន៕

ប្រភពព័ត៌មាន​ ៖ វិទ្យុបារាំងអន្តរជាតិ​ RFI https://www.rfi.fr.kh