តាមការចុះផ្សាយរបស់កាសែត Vietname Plus ថ្ងៃទី១៩ កញ្ញានេះ លោក Nguyen Sinh Nhat Tan អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាមបានទទួលស្គាល់ការខិតខំប្រឹងប្រែងរបស់កម្ពុជា ឡាវ ភូមា និងវៀតណាមក្នុងការជំរុញសកម្មភាពសេដ្ឋកិច្ច ពាណិជ្ជកម្ម និងវិនិយោគនារយៈពេលកន្លងមកក្នុងពេលដែលប្រទេសទាំង ៤មានបញ្ហាប្រឈមសេដ្ឋកិច្ចទាំងក្នុងតំបន់ និងពិភពលោក។ តាមកាសែត Vietnam Plus ដដែល លោក Nguyen Sinh Nhat Tan ក៏បានជំរុញឲ្យភាគីកម្ពុជា ឡាវ និងភូមាបង្កើតលក្ខខណ្ឌអំណោយផលសម្រាប់អ្នកវិនិយោគវៀតណាម ដើម្បីអនុវត្តគម្រោងវិនិយោគ និងអាជីវកម្មនៅក្នុងប្រទេសនីមួយៗ។

គួរបញ្ជាក់ថា កិច្ចប្រជុំរដ្ឋមន្រ្តីសេដ្ឋកិច្ច កម្ពុជា-ឡាវ-ភូមា-វៀតណាម លើកទី១៦ ធ្វើឡើងក្នុងគោលដៅបង្ហាញពីការប្តេជ្ញាចិត្តក្នុងការបន្តកិច្ចសហប្រតិបត្តិការ ដើម្បីសម្រេចបាននូវចក្ខុវិស័យរបស់ប្រទេស CLMV សំដៅប្រែក្លាយទៅជាតំបន់ដែលមានប្រាក់ចំណូលមធ្យមកម្រិតខ្ពស់ និងជាមជ្ឈមណ្ឌលសេដ្ឋកិច្ចរបស់អាស៊ាននៅឆ្នាំ ២០៤៥។ ជាមួយគ្នានេះ កិច្ចប្រជុំរដ្ឋមន្រ្តីសេដ្ឋកិច្ចកម្ពុជា-ឡាវ-ភូមា-វៀតណាមក៏ធ្វើឡើង ដើម្បីជំរុញឲ្យបន្តកិច្ចខិតខំប្រឹងប្រែងលើការកាត់បន្ថយនូវគម្លាតនៃការអភិវឌ្ឍរបស់ប្រទេសទាំង៤ ក្នុងចំណោមបណ្ដារដ្ឋសមាជិកអាស៊ាន។

ដោយឡែក សេចក្តីប្រកាសព័ត៌មាននៃកិច្ចប្រជុំរដ្ឋមន្រ្តីសេដ្ឋកិច្ចកម្ពុជា-ឡាវ-ភូមា-វៀតណាមលើកទី១៦ ចេញផ្សាយថ្ងៃទី១៨ កញ្ញា បានឲ្យដឹងថា ក្នុងឆ្នាំ២០២៣ ប្រទេស CLMV បានបន្តរក្សាកំណើនសេដ្ឋកិច្ចដោយតម្លៃពាណិជ្ជកម្មរបស់ប្រទេសទាំង៤បានកើនក្នុងចំនួនប្រមាណ ៧៦៨.៩ ពាន់លានដុល្លារ ឬស្មើនឹង ២១.៨% នៃតម្លៃពាណិជ្ជកម្មសរុបរបស់អាស៊ាន៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh