នៅថ្ងៃព្រហស្បតិ៍ ទី១៩កញ្ញា ក្រុមអ្នកជំនាញនៃគណៈកម្មាធិការគ្រប់គ្រងបញ្ញាសិប្បនិម្មិត ដែលបង្កើតឡើងដោយអង្គការសហប្រជាជាតិ បានទាញសញ្ញាអាសន្ន អំពីការរីកចម្រើនយ៉ាងលឿន និង ហានិភ័យ នៃបច្ចេកវិទ្យា AI។ ក្រុមអ្នកជំនាញខាងលើ បានទទួចសុំឲ្យមានកិច្ចសហប្រតិបត្តិការអន្តរជាតិ ពីគ្រប់ភាគីទាំងអស់ជាបន្ទាន់ ដើម្បីចៀសវៀងគ្រោះថ្នាក់ ដែលអាចបង្កឡើងដោយបច្ចេកវិទ្យាថ្មីនេះ។

អ្នកជំនាញអង្គការសហប្រជាជាតិ ប្រកាសអាសន្ន ពីហានិភ័យនៃបច្ចកវិទ្យា AI AP – Michael Dwyer

ជិតមួយឆ្នាំមកហើយ ដែលលោក Antonio Guterres អគ្គលេខាធិការអង្គការសហប្រជាជាតិ បានបង្កើតគណៈកម្មាធិការជំនាញមួយ ដែលទទួលបន្ទុក លើបច្ចេកវិទ្យា និងផ្នែកច្បាប់ ដើម្បីការពារទិន្ន័យឯកជន។​ គណៈកម្មាធិការថ្មីនេះ មានតួនាទីត្រួតពិនិត្យ និងតាមដានដំណើររីកចម្រើនយ៉ាងឆាប់រហ័ស នៃបច្ចេកវិទ្យាបញ្ញាសិប្បនិម្មិត ដែលអាចបង្កហានិភ័យ ដល់មនុស្សជាតិ ប្រើសិនបើគ្មានប្រព័ន្ធគ្រប់គ្រងច្បាស់លាស់។

របាយការណ៍ចុងក្រោយរបស់គណៈកម្មាធិការខាងលើ ដែលបានចេញផ្សាយក្នុងពេលថ្មីៗនេះ បង្ហាញពីការធ្លាក់ចុះនៃប្រព័ន្ធគ្រប់គ្រងជាសកល លើបច្ចេកវិទ្យា AI និងការព្រងើយកន្តើយរបស់បណ្តាប្រទេសអភិវឌ្ឍជាច្រើន នៅចំពោះមុខបញ្ហានេះ។ ជាក់ស្តែង ក្នុងចំណោមប្រទេសសមាជិក ចំនួន១៩៣ របស់អង្គការសហប្រជាជាតិ មានតែ៧ប្រទេសប៉ុណ្ណោះ ដែលបានយកចិត្តទុកដាក់ ត្រួតពិនិត្យលើបច្ចេកវិទ្យាសិប្បនិមិ្មត ដែល ភាគច្រើនជាប្រទេស ដែលមានការអភិវឌ្ឍសេដ្ឋកិច្ចខ្ពស់។

ដោយពិនិត្យឃើញភាពមិនប្រក្រតីខាងលើនេះ គណៈកម្មាធិការជំនាញផ្នែកបច្ចេកវិទ្យា AI បានអំពាវនាវឲ្យ បណ្តាប្រទេសជាសមាជិកអង្គការសហប្រជាជាតិទាំងអស់ រួមគ្នាបង្កើតយន្តការពិសេស ដើម្បីបង្កភាពងាយស្រួល ដល់ការប្រើប្រាស់បញ្ញាសិប្បនិមិ្មត ដែលចាំបាច់សម្រាប់ ដំណើរវិវឌ្ឍជឿនលឿនទៅមុខនៃមនុស្សជាតិ តែក៏ត្រូវឆ្លងកាត់ការត្រួតពិនិត្យ ឲ្យបានល្អិតល្អន់ ដូចគ្នាដែរ។

គួរបញ្ជាក់ថា បើគ្មានការត្រួតពិនិត្យ និងគ្រប់គ្រងឲ្យបានហ្មត់ចត់ នោះការរីកចម្រើនយ៉ាងឆាប់រហ័សនៃបច្ចេកវិទ្យា AI នឹងអាចបង្កគ្រោះថ្នាក់ ផលប៉ះពាល់ធ្ងន់ធ្ងរ ដល់លទ្ធិប្រជាធិបតេយ្យ និងសិទ្ធិសេរីភាព មានជាអាទិ៍ តាមរយៈការបង្កើតរូបភាព និងវីដេអូក្លែងក្លាយ។ ពុំតែប៉ុណ្ណោះ ក្រុមឧក្រិដ្ឋជន ឬពួកភេវករ ក៏អាចប្រើប្រាស់បច្ចេកវិទ្យា AI សម្រាប់បញ្ជាអាវុធ ដោយស្វ័យប្រវត្តិ ដែលនឹងភាពចលាចលក្នុងសង្គមជាតិ។

ជាចុងក្រោយ គណៈកម្មាធិការជំនាញរបស់អង្គការសហប្រជាជាតិខាងលើនេះ បានជម្រុញ ឲ្យមានការវាយតម្លៃបែបវិទ្យាសាស្រ្តជាប្រចាំ និងទៀតទាត់ ព្រមទាំងការពិភាក្សាប្តូរយោបល់គ្នាក្នុងផ្លូវនយោបាយ ដើម្បី ចៀសវៀស កុំឲ្យពិភពលោក ធ្លាក់ក្នុងគ្រោះថ្នាក់ ជាយថាហេតុណាមួយ ដែលបង្កឡើងដោយបច្ចកវិទ្យាបញ្ញាសិប្បនិមិ្មត៕

ប្រភពព័ត៌មាន ៖ វិទ្យុបារាំងះអន្តរជាតិ RFI https://www.rfi.fr/kh