នៅថ្ងៃទី២៦ ខែសីហានេះ រដ្ឋាភិបាលកម្ពុជាបានដាក់ចេញនូវយុទ្ធសាស្ត្រស្តីពីការគ្រប់គ្រងបំណុលសាធារណៈរយៈពេល ៥ឆ្នាំដោយគិតពីឆ្នាំ២០២៤ ដល់ឆ្នាំ ២០២៨។ តាមរយៈយុទ្ធសាស្ត្រគ្រប់គ្រងបំណុល ៥ឆ្នាំនេះ រដ្ឋាភិបាលបានកំណត់ការខ្ចីបំណុលពីស្ថាប័នហិរញ្ញវត្ថុ និងដៃគូអភិវឌ្ឍន៍បរទេសក្នុងរង្វង់ទឹកប្រាក់ចន្លោះពី ២ ៣០០ ទៅ ២ ៧០០លានដុល្លារអាមេរិកក្នុងមួយឆ្នាំដោយកំណត់មិនឲ្យលើស ១៣ពាន់លានដុល្លារអាមេរិកក្នុងរយៈពេល ៥ឆ្នាំ។

យោងតាមយុទ្ធសាស្ត្រស្តីពី ការគ្រប់គ្រងបំណុលសាធារណៈរយៈពេល៥ឆ្នាំខាងមុខ ពីឆ្នាំ២០២៤ ដល់ឆ្នាំ២០២៨ រដ្ឋាភិបាលកម្ពុជាសម្រេចកំណត់ទំហំទឹកប្រាក់ដែលត្រូវខ្ចីពីបរទេសក្នុងមួយឆ្នាំចន្លោះពី ២.៣ពាន់លានដុល្លារទៅ ២.៧ពាន់លានដុល្លារអាមេរិក ហើយក្នុងករណីចាំបាច់ គឺអាចបង្កើនទំហំកម្ចីដល់ទៅ ៣.៣ពាន់លានដុល្លារ។ តែក្នុងរយៈពេល៥ឆ្នាំ នៃផែនការកំណត់នេះ រដ្ឋាភិបាលតម្រូវឱ្យមានកម្ចីហិរញ្ញប្បទានពីស្ថាប័នហិរញ្ញវត្ថុ និងដៃគូអភិវឌ្ឍក្រៅប្រទេសមិនលើសពី១៣.៥ពាន់លានដុល្លារអាមេរិកឡើយ។

ក្រៅពីការកំណត់ទំហំប្រាក់កម្ចី រដ្ឋាភិបាលកម្ពុជាក៏បានកំណត់ការបោះផ្សាយមូលបត្ររដ្ឋក្នុងមួយឆ្នាំត្រឹមរង្វង់ទឹកប្រាក់ប្រមាណ១០០លានដុល្លារ ទៅ២០០លានដុល្លារអាមេរិក ឬអាចឈានដល់ជិត៣០០លានដុល្លារ បើក្នុងករណីចាំបាច់។ តែបានហាមមិនឱ្យបោះផ្សាយមូលបត្រលើសពីទំហំទឹកប្រាក់ ១ពាន់លានដុល្លារ ក្នុងរយៈពេល៥ឆ្នាំ។

គួរជម្រាបថា កម្ចីពីបរទេសក្នុងផែនការរយៈពេល៥ឆ្នាំ ទៅមុខទៀតនេះ រដ្ឋាភិបាលនឹងប្រើប្រាស់ហិរញ្ញប្បទានទាំងនោះសម្រាប់វិនិយោគលើវិស័យហេដ្ឋារចនាសម្ព័ន្ធសាធារណៈ ដែលជួយជំរុញសេដ្ឋកិច្ច និងបង្កើនផលិតភាពផលិតកម្ម ការជំរុញការត ភ្ជាប់ និងលើកកម្ពស់សមត្ថភាពប្រកួតប្រជែង។ ក្នុងន័យនេះ រដ្ឋាភិបាលនឹងយកទៅអភិវឌ្ឍន៍ផ្លូវថ្នល់ ស្ពាន ប្រព័ន្ធស្រោចស្រព អគ្គិសនី កំពង់ផែ ការផ្គត់ផ្គង់ទឹកស្អាតនៅទីប្រជុំជន ប្រព័ន្ធប្រព្រឹត្តិកម្មទឹកកខ្វក់ ការបណ្តុះបណ្តាលវិជ្ជាជីវៈសម្រាប់ជំរុញវិស័យឧស្សាហកម្ម ឡូជីស្ទីក និងឌីជីថលជាដើម។

ដោយឡែក ទុនបានមកពីការបោះផ្សាយលក់មូលបត្ររដ្ឋក្នុងប្រទេសនឹងត្រូវរដ្ឋាភិបាលយកទៅប្រើប្រាស់ជាអាទិភាពសម្រាប់ហិរញ្ញប្បទានគម្រោងវិនិយោគសាធារណៈ ដែលអាចហុចផលចំណេញផ្នែកសេដ្ឋកិច្ច និងហិរញ្ញវត្ថុភ្លាមៗ។ សូមរំលឹកថា គិតត្រឹមបំណាច់ឆ្នាំ២០២៣ ដែលរដ្ឋាភិបាលបានអនុវត្តនូវយុទ្ធសាស្ត្រស្តីពី ការគ្រប់គ្រងបំណុលសាធារណៈឆ្នាំ២០១៩-២០២៣ កម្ពុជាបានខ្ចីហិរញ្ញប្បទានពីបរទេសសរុបប្រមាណជាង ១១ពាន់លានដុល្លារអាមេរិក។

ក្នុងចំនួនហិរញ្ញប្បទានទាំងនោះ ហិរញ្ញប្បទានឥតសំណងមានចំនួនជាង ១៥០០លានដុល្លារអាមេរិក និងហិរញ្ញប្បទានសងត្រឡប់វិញមានទំហំប្រមាណ ៨ពាន់លានដុល្លារអាមេរិក។ កន្លងមក មន្ត្រីជាន់ខ្ពស់ក្រសួងសេដ្ឋកិច្ចបានអះអាងថា កម្ពុជានៅបន្តរក្សាស្ថិរភាពនៃការគ្រប់គ្រងបំណុលសាធារណៈបានល្អប្រសើរ និងស្ថិតក្នុងកម្រិតហានិភ័យទាបដោយពុំទាន់ឃើញមានសញ្ញាណាមួយដែលបញ្ជាក់ថា កម្ពុជាធ្លាក់ទៅក្នុងវិបត្តិបំណុលវ័ណ្ឌ ក នោះឡើយ។

​ទោះយ៉ាងណា លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច និងជាប្រធានវិទ្យាស្ថានសិក្សាចិន នៃរាជបណ្ឌិតសភាកម្ពុជា បានស្នើឱ្យរដ្ឋាភិបាលប្រើប្រាស់កម្ចីពីបរទេសឱ្យចំគោលដៅ និងចៀសវាងការប្រើប្រាស់ខុសគោលដៅ ដែលនាំឱ្យមានការកើនឡើងនូវអំពើពុករលួយ ពិសេសវិបត្តិសេដ្ឋកិច្ច៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh