ក្នុងរយៈពេល១ឆ្នាំ នៃការដឹកនាំរបស់រដ្ឋាភិបាលអាណត្តិទី៧ កម្ពុជាបានអនុម័តគម្រោងវិនិយោគសរុបចំនួន ៣៩១ ក្នុងទុនវិនិយោគសរុបជាង៧ពាន់លានដុល្លារ។ នេះបើតាមការអះអាងរបស់ឧបនាយករដ្ឋមន្ដ្រី លោកស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា នៅថ្ងៃទី២២ ខែសីហា ឆ្នាំ២០២៤។ លោកស៊ុន ចាន់ថុល មិនភ្លេចបញ្ជាក់ដែរថា ក្នុងគម្រោងដែលបានអនុម័ត ចិនជាប្រទេសទី១នាំមុខគេ ដែលបោះទុនវិនិយោគនៅកម្ពុជា។

ថ្លែងក្នុងកម្មវិធីសម្ពោធអគារខុនដូមួយកន្លែងក្នុងក្រុងភ្នំពេញ លោក ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា គម្រោងវិនិយោគសរុបចំនួន៣៩១ ដែលរដ្ឋាភិបាលអាណត្តិទី៧ បានអនុម័ត ក្នុងរយៈពេល១២ខែ អាចបង្កើតការងារប្រមាណ ៣៤ម៉ឺន នៅកម្ពុជា។

បើប្រៀបធៀបនឹងរយៈពេល១២ខែចុងក្រោយ នៃរដ្ឋាភិបាលអាណត្តិទី៦ ការអនុម័តគម្រោងវិនិយោគក្នុងអាណត្តិរដ្ឋាភិបាលថ្មី មានការកើនឡើងចំនួន ១៦៨ គម្រោង ស្មើនឹងប្រមាណ៧៥%  ទុនវិនិយោគកើនឡើងជាង ៤ ៦៧២ លានដុល្លារអាមេរិក ស្មើនឹងប្រមាណ ១៦១%។

បើតាមលោកឧបនាយករដ្ឋមន្ដ្រី ស៊ុន ចាន់ថុល នៅក្នុងចំណោមអ្នកវិនិយោគនៅកម្ពុជា ចិនជាអ្នកនាំមុខគេ ជាមួយទុនវិនិយោគតំណាងឲ្យ ៦១% នៃទុនវិនិយោគសរុបនៅកម្ពុជា។ អ្នកវិនិយោគក្នុងស្រុក ឈរនៅលំដាប់ទី២ បន្ទាប់ពីចិនជាមួយអត្រាវិនិយោគចំនួន ៣២% ចំណែកបណ្ដាប្រទេស១៧ផ្សេងទៀត មានការវិនិយោគប្រមាណ ៧% ប៉ុណ្ណោះ។

បើតាមលោក ស៊ុន ចាន់ថុល កត្តាដែលធ្វើឲ្យការវិនិយោគកើនឡើងក្នុងរយៈពេល១ឆ្នាំនេះគឺ សុខសន្តិភាព ស្ថិរភាពនយោបាយ និងម៉ាក្រូសេដ្ឋកិច្ច។ បន្ថែមពីនេះ មានកត្តាលក្ខខណ្ឌល្អប្រសើរ នៃក្របខណ្ឌច្បាប់ និងលិខិតបទដ្ឋានគតិយុត្ត រួមទាំងការបើកចំហសេដ្ឋកិច្ច ទទួលការវិនិយោគសឹងគ្រប់វិស័យ និងការលើកទឹកចិត្តវិនិយោគ ដូចមានចែងក្នុងច្បាប់ស្ដីពីវិនិយោគកម្ពុជា។

ទោះបីជាចិនឈរនៅមុខគេក្នុងការវិនិយោគនៅកម្ពុជា ប៉ុន្តែអនុប្រធានទី១នៃក្រុមប្រឹក្សាអភិវឌ្ឍន៍កម្ពុជា នៅតែសង្ឃឹមថា ក្រុមហ៊ុន និងសមាគមអ្នកវិនិយោគចិននៅកម្ពុជា នឹងបន្តជួយរដ្ឋាភិបាលកម្ពុជាក្នុងការជំរុញ និងទាក់ទាញវិនិយោគិនបរទេស ឲ្យជ្រើសរើសកម្ពុជា ជាគោលដៅវិនិយោគបន្ថែមទៀត។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ថា ជារឿងល្អ ដែលមានអ្នកវិនិយោគមកពីបរទេស ពិសេសមកពីប្រទេសចិន។ ល្អព្រោះថា នៅពេលចិន និងអាមេរិកកំពុងមានសង្គ្រាមពាណិជ្ជកម្ម ដំឡើងពន្ធដាក់គ្នាទៅវិញ ទៅមក ក្រុមហ៊ុនចិនអាចមកវិនិយោគនៅកម្ពុជា ដែលតាមពិត ទទួលបានការអនុគ្រោះពន្ធ ដើម្បីនាំផលិតផលទៅកាន់ទីផ្សារអ៊ឺរ៉ុប និងសហរដ្ឋអាមេរិក។ ផ្ទុយមកវិញ អ្នកឧកញ៉ា លឹម ហេង សង្ឃឹមដែរថា ក្រុមហ៊ុនអាមេរិក និងក្រុមហ៊ុននៅសហគមន៍អឺរ៉ុប អាចនឹងមកវិនិយោគនៅកម្ពុជា ដើម្បីនាំចេញផលិតផលរបស់ខ្លួនទៅកាន់ទីផ្សារ ប្រទេសចិនវិញ ដែលបានអនុគ្រោះពន្ធដល់ផលិតផលកម្ពុជា ដូចមានចែងនៅក្នុងកិច្ចព្រមព្រៀងពាណិជ្ជកម្មសេរី កម្ពុជា ចិន៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh