អូស្ត្រាលីបានអនុម័តនៅថ្ងៃពុធ ទី២១ សីហា ២០២៤នេះ គម្រោងសាងសង់ចំការផ្ទាំងសូឡា ឬ ផ្ទាំងស្រូបកម្តៅព្រះអាទិត្យដ៏ធំជាងគេបំផុតនៅលើពិភពលោក។ មជ្ឈមណ្ឌលដ៏ធំមហិមានេះ នឹងផុសឡើងនៅប៉ែកខាងជើងនៃប្រទេស ហើយមានសមត្ថភាពផ្តល់ថាមពលអគ្គិសនីសម្រាប់សេចក្តីត្រូវការក្នុងស្រុកផង និងសម្រាប់ប្រទេសសិង្ហបុរីផង។ អូស្ត្រាលីប្រកាសសាងសង់មជ្ឈមណ្ឌលសូឡាធំជាងគេបង្អស់នៅលើពិភពលោក AFP – MED LEMINE RAJEL
អូស្ត្រាលីនឹងក្លាយជាជើងឯកពិភពលោកផ្នែកថាមពលបៃតង។ នេះជាប្រសាសន៍របស់លោកស្រីរដ្ឋមន្ត្រីក្រសួងបរិស្ថានអូស្ត្រាលី Tanya Plibersek ដោយប្រកាសថា រដ្ឋាភិបាលបានអនុម័តគម្រោងសាងសង់មជ្ឈមណ្ឌលអគ្គិសនីដើរដោយថាមពលព្រះអាទិត្យ។ មជ្ឈមណ្ឌលដែលជាចំការដ៏ធំមហិមាដាំផ្ទាំងសូឡាស្រូបកម្តៅព្រះអាទិត្យ អាគុយ និងខ្សែកាបតភ្ជាប់ពីអូស្ត្រាលីទៅសិង្ហបុរី នឹងផលិតថាមពលអគ្គិសនី ចំនួន៤ជីហ្កាវ៉ាត់ ក្នុងមួយម៉ោង សម្រាប់បម្រើសេចក្តីត្រូវការក្នុងស្រុក ជូនប្រជាពលរដ្ឋបីលានគ្រួសារ ចាប់ពីឆ្នាំ២០៣០ទៅ។ ពីរជីហ្កាវ៉ាត់ទៀតនឹងទុកសម្រាប់បញ្ជូនទៅឱ្យសិង្ហបុរី ដើម្បីបំពេញសេចក្តីត្រូវការផ្នែកថាមពលអគ្គិសនីបាន១៥%។
មានឈ្មោះថា Suncable គម្រោងនេះនឹងសង់លើផ្ទៃដី១២០០០ហិចតា នៅភាគខាងជើងនៃប្រទេសដែលទទួលពន្លឺព្រះអាទិត្យយ៉ាងពេញទំហឹង ក្នុងតម្លៃ២១ពាន់លានអឺរ៉ូ និងគាំទ្រដោយមហាសេដ្ឋីផ្នែកបច្ចេកវិទ្យានិងជាសកម្មជនបរិស្ថាន mike Cannon-Brookes។ គម្រោងSuncable នឹងបង្កើតការងារចំនួន១៤៣០០កន្លែង ឱ្យតំបន់ភាគខាងជើងអូស្ត្រាលី។ នេះបើតាមលោកស្រីរដ្ឋមន្ត្រីក្រសួងបរិស្ថានដដែល។
គម្រោងនេះជាដំណាក់កាលដ៏សំខាន់ដែលនឹងលើកស្ទួយអូស្ត្រាលីឱ្យបានក្លាយជាមហាអំណាចនៃថាមពលស្អាត និងជាគម្រោងទីមួយនៅលើពិភពលោកខាងផ្នែកនាំចេញទៅបរទេសនូវថាមពលអគ្គិសនីបានមកពីព្រះអាទិត្យ។ អូស្ត្រាលីត្រូវបន្តនិន្នាការ និងទិសដៅនេះ ប្រសិនបើចង់សម្រេចកម្មវត្ថុអព្យាក្រិត្យកាបូន នៅឆ្នាំ២០៥០។ នេះបើតាមទស្សនៈរបស់របស់នាយកមជ្ឈមណ្ឌលស្រាវជ្រាវនៃសាកលវិទ្យាល័យជាតិអូស្ត្រាលីនៅទីក្រុងកង់បេរ៉ា លោក Ken Beldwin។ ក្នុងរយៈពេល៥ឆ្នាំចុងក្រោយមកនេះ អូស្ត្រាលីបានផ្តើមធ្វើវិនិយោគច្រើនក្នុងវិស័យថាមពលព្រះអាទិត្យ និងវាយោ ប៉ុន្តែបើតាមលោកBaldwin អូស្ត្រាលីត្រូវប្រឹងបង្កើនការវិនិយោគទ្វេ ឬបីដងលើសនេះទើបសម្រេចបំណង គ្មានបញ្ចេញឧស្ម័នពុលសោះបាន។ បច្ចុប្បន្ននេះ អូស្ត្រាលីជាប់ឈ្មោះមិនសូវល្អទេ ព្រោះជាប្រទេសនាំចេញធ្យូងថ្ម និងហ្កាសចម្បងគេមួយនៅលើពិភពលោក។ អូស្រ្តាលីប្រើថាមពលកើតឡើងវិញ ប្រមាណ៣ ២% និងថាមពលធ្យូងថ្មដល់ទៅ ៤៧% សម្រាប់ផលិតអគ្គីសនីនៅក្នុងប្រទេស នៅឆ្នាំ២០២២៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
