អាល្លឺម៉ង់បន្ថយជំនួយអ៊ុយក្រែនពាក់កណ្តាល និងជំរុញឲ្យប្រើលុយបង្កករបស់រុស្ស៊ី ទៅជួយអ៊ុយក្រែន
19-សីហា-2024
បន្ទាប់ពីសហរដ្ឋអាមេរិក អាល្លឺម៉ង់ជាប្រទេសម្ចាស់ជំនួយធំទី២ ដែលជួយដល់អ៊ុយក្រែនច្រើនជាងគេ។ គ្រានេះ រដ្ឋាភិបាលទីក្រុងប៊ែរឡាំងបានត្រៀមកាត់បន្ថយជំនួយថវិកា ប្រមាណពាក់កណ្តាល សម្រាប់ឆ្នាំ២០២៥។ ជំនួសមកវិញ ថ្នាក់ដឹកនាំអាល្លឺម៉ង់បញ្ជាក់ថាត្រូវតែជំរុញឲ្យយកកញ្ចប់ថវិការុស្ស៊ីដែលបង្កក ចំនួនរាប់រយពាន់លានដុល្លារ ទៅជួយដល់អ៊ុយក្រែន។ 
នៅឆ្នាំថ្មី រដ្ឋាភិបាលចម្រុះ ដឹកនាំដោយអធិការបតីអាល្លឺម៉ង់ លោក អូឡាហ្វ ស្ហុលស៍ បានសម្រេចកាត់បន្ថយថវិកាជំនួយដល់អ៊ុយក្រែន ចំនួនពាក់កណ្តាល បើធៀបនឹងឆ្នាំនេះ។ via REUTERS – Pool
មកទល់ពេលនេះ អាល្លឺម៉ង់ ជាប្រទេសម្ចាស់ជំនួយធំទី២ ដែលជួយយោធាទៅអ៊ុយក្រែន ច្រើនជាងគេបំផុត។ ក៏ប៉ុន្តែសម្រាប់ឆ្នាំ២០២៥ខាងមុខ អ្វីៗអាចនឹងប្រែប្រួល។ ប្រែប្រួលដ្បិតថា រដ្ឋាភិបាលចម្រុះ ដឹកនាំដោយអធិការបតីអាល្លឺម៉ង់ លោក អូឡាហ្វ ស្ហុលស៍ បានសម្រេចកាត់បន្ថយថវិកាជំនួយចំនួនពាក់កណ្តាល បើធៀបនឹងឆ្នាំនេះ។ ពោលគឺក្នុងឆ្នាំ២០២៤ កញ្ចប់ថវិកាជំនួយដល់អ៊ុយក្រែន មានជាង ៨ពាន់លានអឺរ៉ូ ហើយចំពោះឆ្នាំថ្មីវិញ អាល្លឺម៉ង់ប្រុងនឹងជួយត្រឹមតែ ៤ពាន់លានអឺរ៉ូ តែប៉ុណ្ណោះ ដែលត្រូវកាត់ចេញពីកញ្ចប់ថវិកាជាតិ។ នេះគឺជាលទ្ធផលនៃកិច្ចពិភាក្សាចរចានយោបាយផ្ទៃក្នុងអស់ជាច្រើនខែ ទម្រាំសម្រេចចិត្តយល់ព្រមឯកភាព រវាងក្រុមអ្នកនយោបាយចម្រុះនិន្នាការ មានក្រុមអ្នកបរិស្ថាននិយម ក្រុមសង្គមនិយមប្រជាធិបតេយ្យ និងក្រុមសេរីនិយម។
គម្រោងថវិកាជាតិឆ្នាំ២០២៥បែបនេះ ជាវិធានការថ្មី ដើម្បីរឹតត្បិតចំណាយរដ្ឋ និងបញ្ចប់កំណើនបំណុលសាធារណៈ។ រដ្ឋមន្ត្រីអាល្លឺម៉ង់ បានសំអាងយោងទៅលើមាត្រាច្បាប់ធម្មនុញ្ញ។ ច្បាប់កំពូលកំណត់មិនត្រូវឲ្យរដ្ឋអាល្លឺម៉ង់ជំពាក់បំណុលសាធារណៈច្រើនជ្រុលពេកនោះឡើយ។
តាំងពីដើមខែសីហា រដ្ឋមន្ត្រីហិរញ្ញវត្ថុអាល្លឺម៉ង់ លោក Christian Lindner ក៏បានសរសេរបញ្ជាក់ជូនដំណឹងប្រាប់រដ្ឋមន្ត្រីការពារជាតិអាល្លឺម៉ង់ លោក Boris Pistorius សូមស្នើឲ្យប្រិតប្រៀងគោរពតាមចំនួនថវិកាកំ ណត់នេះ សម្រាប់ឆ្នាំ២០២៥។ ក្នុងពេលនេះ ដល់ដាច់ឆ្នាំ ក៏អាល្លឺម៉ង់គ្មានគម្រោងនឹងបង្កើនជំនួយបន្ថែម ឲ្យលើសពី ៨ពាន់លានអឺរ៉ូ ដែលបានគ្រោងទុកនោះឡើយ។
ចំពោះប្រាក់បង្គ្រប់ជំនួយជួយដល់អ៊ុយក្រែននោះ រដ្ឋមន្ត្រីហិរញ្ញវត្ថុអាល្លឺម៉ង់បញ្ជាក់ថា ត្រូវបង្កើតកញ្ចប់ជំនួយរួមក្នុងរង្វង់ប្រទេសមានសេដ្ឋកិច្ចជឿនលឿនទាំង៧ (ហ្សេ៧) ហើយនិងក្នុងរង្វង់ប្រទេសសហភាពអឺរ៉ុប។ បើតាមកិច្ចព្រមព្រៀងនយោបាយ ក្នុងស្មារតីប្រជុំកាលពីពាក់កណ្តាលខែមិថុនាកន្លងទៅ ថ្នាក់ដឹកនាំប្រទេសហ្សេ៧ យល់ព្រមគ្នាតាមសំណើរបស់សហរដ្ឋអាមេរិក ដែលថាត្រូវផ្តល់កម្ចីចំនួន ៥០ពាន់លានអឺរ៉ូ ដល់អ៊ុយក្រែន។
មិនតែប៉ុណ្ណោះ ការសំខាន់បំផុត ដើម្បីរកលុយជួយអ៊ុយក្រែនបន្ថែមឲ្យច្រើន រដ្ឋមន្ត្រីហិរញ្ញវត្ថុអាល្លឺម៉ង់បញ្ជាក់ថា ត្រូវតែយកកញ្ចប់ថវិកា និងទ្រព្យសម្បត្តិរុស្ស៊ី ដែលបង្កកនៅក្នុងពិភពលោក ប្រមាណជាង ៣០០ពាន់លានដុល្លារ ទៅជួយដល់អ៊ុយក្រែន។ រដ្ឋមន្ត្រីអាល្លឺម៉ង់ បានសង្កត់ធ្ងន់ត្រង់ចំណុចថា ត្រូវយកលុយបង្កករុស្ស៊ី ទៅជួយអ៊ុយក្រែន ច្បាំងនឹងរុស្ស៊ីវិញ។
ទោះជាយ៉ាងណាក្តី គម្រោងថវិកាជាតិអាល្លឺម៉ង់ឆ្នាំ២០២៥ ដែលមានចែងពីការបន្ថយជំនួយពាក់កណ្តាលរបស់រដ្ឋបាលទីក្រុងប៊ែរឡាំងដល់រដ្ឋធានីកៀវនេះ គឺត្រូវឆ្លងកាត់ការអនុម័តពីសំណាក់សភាសហព័ន្ធអាល្លឺម៉ង់ ជាមុនសិន។ ការសម្រេចចុងក្រោយ ត្រូវធ្វើឡើងនៅមុនដាច់ឆ្នាំនេះ៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
