អត្រាយុវជនគ្មានការងារធ្វើ នៅលើពិភពលោក បានធ្លាក់ចុះដល់កំរិតទាបបំផុតមិនធ្លាប់មានទេ គិតតាំងពី១៥ឆ្នាំមក។ ហើយចំនួនអ្នកគ្មានការងារធ្វើនេះនឹងបន្តធ្លាក់ចុះទៀតនៅឆ្នាំខាងមុខ។ ប៉ុន្តែភាពមិនជាក់លាក់នៃការងារជាប្រភពនាំកង្វល់ថប់បារម្ភធំឡើងៗ។ នេះបើតាមរបាយការណ៍របស់អង្គការពលកម្មអន្តរជាតិ ILO ចេញផ្សាយជាសាធារណៈ នៅថ្ងៃចន្ទទី ១២សីហា២០២៤។ ILO៖ អត្រាយុវជនអត់ការងារ នៅលើពិភពលោក ធ្លាក់ទាបបំផុត មិនធ្លាប់មានតាំងពីឆ្នាំ២០០០មក via REUTERS – CHINA DAILY
នៅឆ្នាំ២០២៣ មានយុវជននៅលើពិភពលោកសរុបប្រមាណតែ៦៤,៩លាននាក់ ឬស្មើនឹងប្រមាណ១៣% ប៉ុណ្ណោះ ដែលគ្មានការងារធ្វើ។ នេះជាអត្រាដ៏ទាបមិនធ្លាប់មានទេ តាំងពីចូលសហវត្សរ៍ថ្មីឆ្នាំ២០០០មក។ មុនវិបត្តិសកលកូវីដ១៩ ពោលគឺនៅឆ្នាំ២០១៩ អត្រាយុវជនគ្មានការងារធ្វើ មានកំរិតដល់ទៅ១៣,៨%។ នេះបើតាមសេចក្តីថ្លែងការណ៍របស់អង្គការពលកម្មអន្តរជាតិ ដែលព្យាករឃើញជាស្រេចថា អត្រាយុវជនអត់ការ ងារ នឹងបន្តធ្លាក់ចុះទៀតនៅឆ្នាំខាងមុខ មកនៅត្រឹមប្រមាណ១២,៨% នៅឆ្នាំ២០២៤ និង២០២៥។
ក៏ប៉ុន្តែកំណើនយុវជនមានការងារធ្វើ ក្រោយវិបត្តិកូវីដ គ្មានលក្ខណៈសកលទេ។ អង្គការពលកម្មអន្តរជាតិបានព្រមានថា ស្ថានភាពការងាររបស់យុវជនមិនដូចគ្នាទេពីតំបន់មួយទៅតំបន់មួយ។ នៅបណ្តាប្រទេសជារដ្ឋអារ៉ាប់ នៅអាស៊ីខាងកើត-អាស៊ីអាគ្នេយ៍ និងអាស៊ីប៉ាស៊ីហ្វិក អត្រាយុវវ័យគ្មានការងារធ្វើក្នុងឆ្នាំ២០២៣ នៅតែខ្ពស់ជាងឆ្នាំ២០១៩ដដែល។ ជាងនេះទៅទៀត និន្នាការពិភពលោកកំពុងវិវឌ្ឍទៅក្នុងទិសតែមួយ គឺមានការងារហើយតែមិនជាក់លាក់។ ភាពមិនជាក់លាក់នៃការងារបាន និងកំពុងក្លាយជាប្រភពដ៏ចម្បងនៃកង្វល់ធំឡើងៗរបស់យុវជនដែលស្រមៃចង់បានឯករាជ្យផ្នែកហិរញ្ញវត្ថុ មុននឹងក្លាយទៅជាមនុស្សធំពេញវ័យ ចូលដំណាក់កាលដ៏សំខាន់មួយទៀតនៃជីវិត។ ក្នុងកំរិតពិភពលោក ជាងពាក់កណ្តាលនៃយុវជន កាន់ការងារគ្មានតួនាទី ជាការងារក្រៅផ្លូវការ។ បើតាមអង្គការ លទ្ធភាពឈានទៅរកការងារសមរម្យ ចង្អៀតខ្លាំងណាស់សម្រាប់បណ្តាប្រទេសមានសេដ្ឋកិច្ចចាប់លូតលាស់ និងប្រទេសកំពុងអភិវឌ្ឍន៍។
នៅក្នុងរបាយការណ៍ប្រចាំឆ្នាំ ចេញផ្សាយជាសាធារណៈនាថ្ងៃចន្ទ ទី១២ សីហានេះ អង្គការពលកម្មអន្តរជាតិ បានពញ្ញាក់មតិសាធារណៈអំពីកង្វល់ដ៏ធំធេងចំពោះចំនួនដ៏ច្រើននៃយុវជនយុវនារី អាយុពី១៥-២៤ឆ្នាំ គ្មានការសិក្សា គ្មានការងារធ្វើ និងគ្មានការបណ្តុះបណ្តាលវិជ្ជាជីវៈ (NEET)។ ជាតួលេខមួយភាគ៥ ឬ ត្រូវជា២០,៤%នៃប្រជាជនលើភពផែនដី ស្ថិតក្នុងចង្កោមយុវជនប្រភេទNEETគ្មានអ្វីទាំងអស់ ហើយក្នុងនោះពីរភាគបីជាយុវតី។ ក្មេងប្រុសបានទទួលផលពីការកំរើកទីផ្សារការងារជាងក្មេងស្រី ខុសពីសម័យមុនកូវីដដែលអត្រាយុវជនគ្មានការងារធ្វើខ្ពស់ជាង។ នេះបើអង្គការពលកម្មអន្តរជាតិដដែល៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
