ឯកសារផ្លូវការ ស្តីពីកម្មវិធីនយោបាយរដ្ឋអំណាចចិន ត្រូវអនុវត្តពីអំណឺះតទៅថ្ងៃមុខ មានលាតត្រដាង គោលបំណងកម្មវត្ថុ ៦០ ចំណុច។ ៦០ចំណុច គិតគូរជាសំខាន់ ដល់វិស័យសេដ្ឋកិច្ច ឧស្សាហកម្ម ការស្តារទំនុកចិត្តឈ្មួញ ផ្តល់តម្លៃលើទីផ្សារ។ ទីផ្សារជាប្រភពចំណុចយ៉ាងចម្បងនៃថាមពលសេដ្ឋកិច្ចចិន។
កម្មវិធីនយោបាយនេះ ផ្សាយចេញក្រោយប៉ុន្មានថ្ងៃ បន្ទាប់ពីបិទបញ្ចប់សមាជិពេញអង្គ ក្រោមអធិបតីភាពអគ្គលេខាធិការបក្ស ប្រមុខរដ្ឋ ស៊ី ជីនពីង ដែលបានប្រព្រឹត្តធ្វើនៅរដ្ឋធានីប៉េកាំង ចន្លោះពីថ្ងៃទី១៥ ដល់ទី១៨ កក្កដា។ កាលពីថ្ងៃបញ្ចប់សមាជិពេញអង្គភ្លាមៗនោះ គណមជ្ឈិមបក្សកុម្មុយនិស្តចិន បានលើកឡើងនិងបានទទួលស្គាល់បញ្ហាការពិត១ ស្តីពីបំណុលសាធារណៈនៃអាជ្ញាធរថ្នាក់ខេត្តនិងតំបន់ ដែលជំពាក់បំណុលគេស្ទើររើខ្លួនឯងរួច។ នេះក៏ព្រោះតែវិបត្តិអចលនទ្រព្យ ហើយនិងដរចេញពីវិបត្តិរ៉ាំរ៉ៃនៃជំងឺកូវីដ១៩។ មជ្ឈិមបក្សកុម្មុយនិស្តចិន បានសន្យាប្តេជ្ញាដោះស្រាយបញ្ហា និងបញ្ជៀសហានិភ័យផ្សេងៗទៀត ដែលអាចជះឥទ្ធិពលប៉ះពាល់។
លើសពីនេះទៅទៀត នៅកម្មវិធីនយោបាយរដ្ឋអំណាចចិន ដែលចេញផ្សាយពីថ្ងៃអាទិត្យ ក៏បានសង្កត់ធ្ងន់អំពីការលើកកម្ពស់លំនៅដ្ឋានសមរម្យ កែសម្រួលបង្កើតឪកាសការងារធ្វើសម្រាប់យុវជន ហើយនិងបង្កើនកម្រិតជីវភាពសម្រាប់មនុស្សចាស់ជរា។
កម្មវិធីនយោបាយ និងគោលបំណងកម្មវត្ថុ ចែងនៅលើក្រដាស សុទ្ធតែល្អៗ ក៏ប៉ុន្តែ ចំណោទនៅត្រង់ការអនុវត្ត។ នេះជាអ្វីដែលអ្នកវិភាគនិងអ្នកតាមដានស្ថានការណ៍ស្រុកចិន កំពុងចោទសួរ។ អ្នកវិភាគជាច្រើននាក់ មានក្តីមន្ទិលសង្ស័យចំពោះការអនុវត្តដើម្បីឲ្យសម្រេចកម្មវត្ថុទាំងនោះ ពីព្រោះថា រដ្ឋអំណាចក្រុងប៉េកាំង ពុំបានពន្យល់រៀបរាប់ពីផែនការសកម្មភាពទាល់តែសោះ។ ជាក់ស្តែង អាជ្ញាធរចិន មិនលម្អិតអំពីថាតើធ្វើម្តេចដើម្បីបង្កើនលទ្ធភាពរបស់អ្នកប្រើប្រាស់ ? ហើយរដ្ឋាភិបាលចិនក៏មិនលម្អិតដែរ ថាតើត្រូវធ្វើយ៉ាងដូចម្តេច ដើម្បីបង្កើនវឌ្ឍនភាពសេដ្ឋកិច្ច ក្នុងពេលជាមួយគ្នាដែលត្រូវកាត់បន្ថយបបំណុលនោះ។
ករណីមួយទៀត ដែលជាក្តីបារម្ភ និងជាការមើលឃើញរបស់អ្នកតាមដានស្ថានការណ៍ស្រុកចិន នៅត្រង់ចំណុចថា រដ្ឋាភិបាលចិនកំពុងតែដើរបញ្ច្រាសពីកម្មវត្ថុរបស់ខ្លួន។ នៅផ្នែកម្ខាង អាជ្ញាធរចិនចង់ជំរុញការវិនិយោគទុនផ្នែកបច្ចេកវិទ្យា ប៉ុន្តែ ដើម្បីរក្សាសន្តិសុខជាតិក្នុងវិស័យនេះ រដ្ឋចិនបានរឹតត្បិតនិងដាក់សម្ពាធជាខ្លាំង ចំពោះក្រុមហ៊ុនបរទេសដែលរកស៊ីវិស័យនេះ នៅប្រទេសចិន។ សម្ពាធនោះ មានទាំងផ្លូវបទដ្ឋានច្បាប់ និងហិរញ្ញវត្ថុ។ នេះបើតាមទីភ្នាក់ងារព័ត៌មានរ៉យទ័រ។
ទំនងជាថ្នាក់ដឹកនាំចិន យល់ច្បាស់ពីក្តីបារម្ភទាំងនេះ ទើបនៅក្នុងចំណោមកម្មវត្ថុដែលកំណត់ឡើងក្នុងកម្មវិធីនយោបាយ៦០ចំណុចគ្រានេះ ក៏មានចំណុចតម្រូវឲ្យ រដ្ឋាភិបាលចិន ដាក់ចេញវិធានការច្បាប់ ដើម្បីជួយស្រោចស្រង់វិស័យឯកជន ហើយនិងកែប្រែច្បាប់ពន្ធដារ ពន្ធគយ ព្រមទាំងកែទម្រង់ច្បាប់ហិរញ្ញវត្ថុមួយចំនួន សម្រួលដល់ការរកស៊ីវិនិយោគទុន៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr.kh
