នៅថ្ងៃទី២០ ខែកក្កដា ឆ្នាំ២០២៤ ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល ៦ខែ ឆ្នាំ២០២៤ កសិផលកម្ពុជាដែលបាននាំចេញ មានការកើនឡើងជិត៦០% បើធៀបនឹងរយៈពេលដូចគ្នាក្នុងឆ្នាំ២០២៣។ តាមក្រសួងកសិកម្ម កសិផលដែលនាំចេញសរុបចំនួន៦លានតោនបាននាំទៅទីផ្សារគោលដៅចំនួន៧៧ ប្រទេស។
ក្នុងឆមាសទី១ ឆ្នាំ២០២៤ កសិផលកម្ពុជាដែលមានដូចជា ស្រូវ អង្ករ ដំឡូងមី ស្វាយ មៀន និងចន្ទីជាដើម ត្រូវបាននាំចេញទៅកាន់បណ្ដាប្រទេសនានាទូទាំងពិភពលោក។ ក្រសួងកសិកម្មបញ្ជាក់ថា កម្រិតនៃការនាំចេញក្នុងឆមាសទី១ ជាកំណើនមិនធ្លាប់មាននោះទេ ក្នុងរយៈពេល៥ឆ្នាំចុងក្រោយនេះ។
កសិផលកម្ពុជាសរុបទាំង៦លានតោន ត្រូវបានក្រសួងកសិកម្មអះអាងថា មាន៩៤% គឺបាននាំចេញឆ្ពោះទៅកាន់ទីផ្សារ ប្រទេសចិន ប្រទេសវៀតណាម និងប្រទេសថៃ។ កសិផលទាំងនោះរួមមាន ចេក អង្ករ ដំឡូងមី ស្វាយ មៀន ស្រូវ ចន្ទី ស្វាយស្រស់ ម្ទេស និងកន្ទក់ ។ ក្រៅពីកសិផលទាំងនេះមានកសិផលផ្សេងទៀត ក៏ត្រូវបានក្រសួងកសិកម្មបញ្ជាក់ដែរថា កំពុងមានកំណើនសម្រាប់នាំចេញដែរ ដូចជាដំណាប់ស្វាយ ទុរេន គ្រាប់ពោត មៀនស្រស់ ម្រេច និងម្ទេសស្រស់។
គួរជម្រាបថា បើគិតតែការនាំចេញអង្គរ ក្នុងរយៈពេល៦ខែ ឆ្នាំ២០២៤ កម្ពុជាបាននាំអង្ករទៅចិន និងតំបន់រដ្ឋបាលស្វយ័ត ជាង៧ម៉ឺន៥ពាន់តោន ទៅកាន់តំបន់អាស៊ាន ជាង៧ម៉ឺន ៤ពាន់តោន ប្រទេសចំនួន២៧ ក្នុងទ្វីបអឺរ៉ុប ចំនួនជាង១៥ម៉ឺ៦ពាន់តោន និងប្រទេសចំនួន២៧ នៅអាហ្វ្រិក និងមជ្ឈឹមបូព៌ាជាង៣ម៉ឺន១ពាន់តោន។ នេះបើយោងតាមរបាយការណ៍ពីសហព័ន្ធស្រូវអង្ករកម្ពុជា។
បើគិតពីទំហំទឹកប្រាក់ក្នុងឆមាសទី១ឆ្នាំ២០២៤ ក្រសួងកសិកម្មបានបញ្ចេញតួលេខតាមដំណាំនីមួយៗឱ្យដឹងថា ទំហំទឹកប្រាក់ពីការនាំចេញកសិផលក្រៅពីស្រូវ-អង្ករ មានតម្លៃជាង ១៨០០លានដុល្លារ ខណៈកសិផលស្រូវមានតម្លៃជាង ៤០០លានដុល្លារ កសិផលអង្ករមានតម្លៃជាង ២០០លានដុល្លារ និងប្រភេទដំឡូងមី មានបរិមាណជាង ២,៥០លានតោន ដែលជាកំណើនខ្ពស់ជាងគេទី១ ក្នុងចំណោមកសិផលសំខាន់ដទៃទៀត ទទួលបានទឹកប្រាក់ចំនួនជាង ៤៥០លានដុល្លារអាមេរិក។ ដោយឡែកគ្រាប់ស្វាយចន្ទីឆៅ មានទំហំនាំចេញជាង ៨០០លានដុល្លារ ដែលប្រហែលជា ១ភាគ៣ នៃតម្លៃនាំចេញកសិផលសរុបរបស់កម្ពុជា៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr.kh