អ.វ.ត.ក គ្រោងថវិកាជិត ១៦លានដុល្លារ បង្ហើយការងារសេសសល់រយៈពេល ៣ឆ្នាំដំបូង
18-កក្កដា-2024
តាមគម្រោងអង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក) ឬសាលាក្តីខ្មែរក្រហមបានគ្រោងថវិកាចំនួន១៥,៩លានដុល្លារ សម្រាប់បង្ហើយការងារដែលនៅសេសសល់សម្រាប់៣ឆ្នាំដំបូង។ គម្រោងថវិកានេះ គឺសម្រាប់ចំណាយចាប់ពីឆ្នាំ២០២៣ ដល់ឆ្នាំ២០២៥ ក្រោយសាលាក្តីកូនកាត់នេះ បានចំណាយថវិកាអស់ជាង ៤០០លានដុល្លារ រួចទៅហើយនៅក្នុងដំណើរការកាត់ក្តីមេដឹកនាំជាន់ខ្ពស់នៃរបបកម្ពុជាប្រជាធិបតេយ្យអស់រយៈពេល១៦ឆ្នាំកន្លងទៅ។
អ.វ.ត.ក ចុះផ្សព្វផ្សាយដល់សិស្សានុសិស្សតាមសាលានានា © ECCC
សាលាក្តីខ្មែរក្រហមបានគ្រោងចំណាយថវិកាចំនួន ១៥,៩លានដុល្លារ សម្រាប់ការងារដែលនៅសេសសល់រយៈពេល៣ឆ្នាំដំបូង។ ការងារទាំងនោះរួមមានការផ្ទេរពិរុទ្ធជន ខៀវ សំផន អតីតប្រមុខរដ្ឋនៃរបបកម្ពុជាប្រជាធិបតេយ្យ ដែលមានវ័យ៩៤ឆ្នាំ ទៅអនុវត្តទោសអស់មួយជីវិតនៅពន្ធនាគារខេត្តកណ្តាល។ការជូនដំណឹងអំពីបច្ចុប្បន្នភាពនៃការងារដែលនៅសេសសល់ដល់ដើមបណ្តឹងរដ្ឋប្បវេណីជិត៤ពាន់នាក់។
ការធ្វើចំណាត់ថ្នាក់ពីប្រភេទឯកសារសម្ងាត់បំផុត និងសម្ងាត់ ទៅជាឯកសារសាធារណៈ នៃឯកសារសំណុំរឿង ០០២ បានប្រមាណ ២២ម៉ឺនទំព័រ និងកំពុងពិនិត្យមើលឯកសារដទៃទៀតជាង២លានទំព័រ។ ការបង្កើតនិងដាក់ឲ្យប្រើប្រាស់ជាផ្លូវការនូវ«មជ្ឈមណ្ឌលធនធានរបស់សាលាក្តី»កាលពីខែកញ្ញា ឆ្នាំ២០២៣ កន្លងទៅ។ ការរៀបចំដំណើរទស្សនកិច្ចសិក្សាចំនួន២លើកក្នុង ១សប្តាហ៍ដល់សាធារណជន សិស្ស និស្សិត រួមនឹងគម្រោងការងារជាច្រើនទៀត។
សូមរំលឹកថាចាប់តាំងពីឆ្នាំ២០០៦ រហូតដល់ឆ្នាំ២០២៣ សាលាក្តីខ្មែរក្រហមបានចំណាយថវិកាសរុបប្រមាណ ៤០៧លានដុល្លារ ក្នុងនោះថវិការួមចំណែកពីសហគមន៍អន្តរជាតិមានចំនួន ២៩៣លានដុល្លារ(៧២%) ថវិកាផ្ទាល់ពីអង្គការសហប្រជាជាតិមានចំនួន ៦៧លានដុល្លារ (១៦%) និងថវិកាបដិភាគរបស់រដ្ឋាភិបាលកម្ពុជាមានចំនួន៤៧លានដុល្លារ (១២%)។
ថវិកាចំណាយសម្រាប់សាលាក្តីខ្មែរក្រហមនេះ ត្រូវបានរដ្ឋាភិបាលកម្ពុជាគូសបញ្ជាក់ថាជាការចំណាយតិចជាងគេ បើប្រៀបធៀបទៅនឹងតុលាការព្រហ្មទណ្ឌអន្តរជាតិផ្សេងៗទៀត ដែបានចំណាយថវិកាអស់ចន្លោះពី ៨០ ទៅ ១០០លានដុល្លារ ក្នុងមួយឆ្នាំ។
នៅក្នុងឱកាសនៃដំណើរទស្សនកិច្ច និងសម្ពោធសមិទ្ធផលនៅអគារអនុវត្តមុខងារសេសសល់របស់សាលាក្តីខ្មែរក្រហមនៅថ្ងៃទី១៦ កក្កដា នេះដែរ លោកនាយករដ្ឋមន្ត្រី ហ៊ុន ម៉ាណែត បានចាត់ទុកការរក្សាទុកឯកសាររបស់សាលាក្តីខ្មែរក្រហមតាមរយៈមជ្ឈមណ្ឌលធនធានរបស់សាលាក្តីនេះ ថាមានសារសំខាន់ណាស់សម្រាប់ប្រវត្តិសាស្ត្រ និងកូនខ្មែរជំនាន់ក្រោយ។ នៅក្នុងន័យនេះ លោកនាយករដ្ឋមន្ត្រីចង់បង្ហាញថាការរក្សាទុកឯកសារនានារបស់សាលាក្តីខ្មែរក្រហម គឺជាតឹកតាងមួយសម្រាប់បញ្ជាក់ការពិតនៃរបបខ្មែរក្រហម ដល់ក្មេងជំនាន់ក្រោយបន្ទាប់ពីការបាត់បង់មនុស្សវ័យចំណាស់ ដែលបានឆ្លងកាត់របបវាលពិឃាតនេះ ក្នុង រយៈពេល៥០ឆ្នាំទៀត៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
