រដ្ឋាភិបាលប្រទេសជប៉ុន បានសម្រេចផ្តល់ជំនួយឥតសំណងជាទឹកប្រាក់ប្រមាណ ៨ពាន់លានយ៉េន ឬជិត២លានដុល្លារអាមេរិក ដល់កម្ពុជា ដើម្បីពង្រីកបណ្តាញអគ្គិសនីនៅរាជធានីភ្នំពេញ។ នេះបើតាមការលើកឡើងរបស់រដ្ឋមន្ត្រីការបរទេសជប៉ុន នៅក្នុងជំនួបរវាង លោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីការបរទេស និងលោកស្រី ខាមីខាវ៉ា យ៉ូកុ ក្នុងអំឡុងពេលលោកស្រី មកបំពេញទស្សនកិច្ចផ្លូវការនៅប្រទេសកម្ពុជារយៈពេល២ថ្ងៃ ចាប់ពីថ្ងៃទី៥ និងទី៦ ខែកក្តដានេះ។ ជប៉ុនផ្តល់ជំនួយជិត២លានដុល្លារ សម្រាប់ពង្រីកបណ្តាញអគ្គិសនីនៅរាជធានីភ្នំពេញ © Samdech Hun Sen of Cambodia

ក្រៅពីផ្តល់ជំនួយជិត២លានដុល្លា ជប៉ុនបានរៀបចំអភិក្រមថ្មី សម្រាប់កិច្ចសហប្រតិបត្តិការជាមួយកម្ពុជា ដែលក្នុងការកសាងហេដ្ឋារចនាសម្ព័ន្ធក្នុងនោះមាន ទឹកស្អាត ប្រព័ន្ធចម្រោះទឹកកខ្វក់ ឌីជីថល និងសន្តិសុខសាយប័រ។ លោកស្រី ខាមីខាវ៉ា បានគូសបញ្ជាក់ថា ជប៉ុនឹងបន្តជួយលើផ្នែកទឹកស្អាតនៅរាជធានីភ្នំពេញ និងតាមបណ្តាខេត្ត។

ជាមួយគ្នានេះភាគីទាំងពីរបានគូសបញ្ចាក់ពីសារសំខាន់នៃកិច្ចសហប្រតិបត្តិការលើវិស័យឌីជីថល ដែលជាអទិភាពមួយនៃយុទ្ធសាស្រ្តបញ្ចកោណ ដំណាក់កាលទី១ របស់រដ្ឋភិបាលកម្ពុជា។

តាមរយៈរដ្ឋមន្ត្រីការបរទេសជប៉ុននេះ ភាគីជប៉ុនអះអាងបន្តជួយអភិវឌ្ឍកំពង់ផែស្វយ័តក្រុងព្រះសីហនុ ដើម្បីប្រែក្លាយជាកំពង់ផែស្នូល និងជាមជ្ឃមណ្ឌលឡូជីស្ទីកក្នុងតំបន់។

ក្នុងជំនួបទ្វេភាគី ភាគីទាំងពីរបានជំរុញការប្រាស្រ័យទាក់ទង និងផ្លាស់ប្តូរទស្សនកិច្ចគ្រប់កម្រិត ដើម្បីរួមចំណែកកសាងមូលដ្ឋានគ្រឹះ និងពង្រីកកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ និងបន្តលើកកម្ពស់ភាពជាដៃគូគ្រប់ជ្រុងជ្រោយកម្ពុជា-ជប៉ុន។

កម្ពុជា និងជប៉ុន ក៏បានពិភាក្សាផងដែរអំពីមធ្យោបាយនានា ដើម្បីជំរុញបន្ថែមផ្នែកពាណិជ្ជកម្ម និងសេដ្ឋកិច្ច វិស័យការពារជាតិ និងសន្តិសុខ រួមទាំងការដោះមីននៅកម្ពុជា។

ចំពោះទំនាក់ទំនងសេដ្ឋកិច្ច ភាគីទាំងពីរ បានឯកភាពជំរុញឲ្យមានវត្តមានធុរកិច្ចជប៉ុនមកកម្ពុជា តាមរយៈរដ្ឋមន្ត្រីការបរទេសជប៉ុន លោកស្រី ខាមីខាវ៉ា  ដែលសន្យាជួយជំរុញអ្នកវិនិយោគជប៉ុនមកបណ្កាក់ទុននៅកម្ពុជាបន្ថែមទៀត។

ដោយឡែក នៅក្នុងវិស័យការពារជាតិភាគីទាំងពីរ បានកត់សំគាល់ពីការរីកចម្រើននូវកិច្ចសហប្រតិបត្តិការ ដោយភាគីទាំងពីបានឯកភាពជំរុញកិច្ចសហប្រតិបត្តិការរវាង នគរបាលជើងទឹកជាមួយឆ្មាំ​សមុទ្រជប៉ុន  ហើយភាគីជប៉ុនបានសន្យាផ្តល់នាវាល្បាតដល់នគបាលជាតិកម្ពុជា។

វិស័យដោះមីន ភាគីជប៉ុន និងកម្ពុជានឹងបន្តកិច្ចសហប្រតិបត្តិការលើវិស័យនេះ​ ដើម្បីបម្រើដល់បុព្វហេតុមនុស្សធម៌ សន្តិភាពក្នុងតំបន់ និងពិភពលោក ដោយជប៉ុនត្រៀមសហការជាមួយកម្ពុជា ខណៈកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ានៅឆ្នាំនេះ៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh