លោក ហ៊ុន ម៉ាណែត៖ កម្ពុជា និងបារាំង បានសហការគ្នាយ៉ាងល្អទាំងនយោបាយ និងសេដ្ឋកិច្ច
9-កក្កដា-2024
ដូចការគ្រោងទុក វេទិកាធុរកិច្ចកម្ពុជា-បារាំង បានបើកជាផ្លូវការនៅថ្ងៃទី៨ខែកក្កដាឆ្នាំ២០២៤ នៅទីក្រុងភ្នំពេញ។ នេះជាវេទិកាធុរកិច្ចកម្ពុជា-បារាំងលើកទី២ បន្ទាប់ពីលើកទី១ បានធ្វើឡើងនៅប្រទេសបារាំង។ នាយករដ្ឋមន្រ្តីកម្ពុជាលោក ហ៊ុន ម៉ាណែត បានថ្លែងនៅពេលបើកវេទិកាថា កម្ពុជា និងបារាំងមិនត្រឹមតែបានសហការគ្នាខាងផ្នែកនយោបាយប៉ុណ្ណោះទេ តែភាគីទាំងពីរក៏បានសហការគ្នាច្រើននៅលើវិស័យសេដ្ឋកិច្ចផងដែរ។
លោក ហ៊ុន ម៉ាណែត៖ កម្ពុជា និងបារាំងបានសហការគ្នាយ៉ាងល្អទាំងនយោបាយ និងសេដ្ឋកិច្ច © STPM
តាមប្រមុខរដ្ឋាភិបាលកម្ពុជា បារាំងបានផ្តល់ជំនួយដល់កម្ពុជាទាក់ទងវិស័យទឹកស្អាត ថាមពល និងការបណ្តុះបណ្តាលដែលមានទឹកប្រាក់ប្រហែល ២៣០លានដុល្លារអាមេរិក ដើម្បីគាំទ្រដល់ការវិនិយោគនៅកម្ពុជា។ លោក ហ៊ុន ម៉ាណែត បានអះអាងថា ទំហំពាណិជ្ជកម្មរវាងកម្ពុជា បារាំងបានកើនឡើងជាលំដាប់ និងជាប់លំដាប់ទី១ នៃទំនាក់ទំនងសេដ្ឋកិច្ចរវាងកម្ពុជា និងបណ្តាប្រទេសនៅអឺរ៉ុប។ ជាក់ស្តែងក្នុងឆ្នាំ២០២៣ ទំហំពាណិជ្ជកម្មរវាងប្រទេសទាំងពីរមានជាង ៥១៥លានដុល្លារ និងមានជាង២០៦លានដុល្លារអាមេរិក នារយៈពេល៥ខែ ក្នុងឆ្នាំ២០២៤ នេះ។
តែរបាយការណ៍ដែលផ្សាយនៅគេហទំព័រស្ថានទូតបារាំងកាលពីថ្ងៃទី២៨ ខែមិថុនា ឆ្នាំ២០២៤ បានបង្ហាញថា ទំហំពាណិជ្ជកម្មរវាងបារាំង និងកម្ពុជាមាន ១ ៣៦៣លានអឺរ៉ូ នៅឆ្នាំ២០២៣ និងថា បារាំងជាដៃគូពាណិជ្ជកម្មទី២ របស់កម្ពុជា បន្ទាប់ពីអាម្លឺម៉ង់។ តាមស្ថានទូតបារាំង ការនាំចេញរបស់បារាំងមកម្ពុជាបានកើនឡើង ៣១% នៅឆ្នាំ២០២៣ បើធៀបនឹងឆ្នាំ២០២២ ពិសេស ឱសថ ផលិតអាហារ និងលោហៈធាតុ។ ចំណែកការនាំចេញរបស់កម្ពុជាទៅបារាំងមានទំហំទឹកប្រាក់ ១ ១៩២លានអឺរ៉ូ នៅឆ្នាំ២០២៣ ពិសេសផលិតផលអាហារ វិស័យវាយនភណ្ឌ និងទោចក្រយាន។
ជាមួយនឹងទំហំទឹកប្រាក់ប្រមាណ៥៦០លានអឺរ៉ូ ការវិនិយោគរបស់បារាំងនៅកម្ពុជាក៏មានការកើនឡើងដែរ ពិសេសវិស័យសំណង់ កសិឧស្សាហកម្ម និងសេវាកម្ម។ ក្រៅពីបុត្រសម្ព័ន្ធនៃក្រុមហ៊ុនធំៗរបស់បារាំង ក៏មានវត្តមានក្រុមហ៊ុនក្នុងស្រុករបស់ជនជាតិបារាំងមានប្រមាណ ៤០០ក្រុមហ៊ុន ដែលប្រតិបត្តិការនៅកម្ពុជា។
ស្ថានទូតបារាំងបានបញ្ជាក់ថា កិច្ចសហការរវាងបារាំង និងកម្ពុជាកាន់តែរស់រវើកនារយៈពេល២ឆ្នាំចុងក្រោយ ពោលបន្ទាប់ពីទស្សនកិច្ចរបស់លោក ហ៊ុន សែន ក្នុងប្រទេសបារាំងកាលពីឆ្នាំ២០២៣ និងទស្សនកិច្ចរបស់នាយករដ្ឋមន្ត្រី ហ៊ុន ម៉ាណែត កាលពីខែមករា ឆ្នាំ២០២៤។
តែលោក សម រង្ស៊ី ប្រធានស្តីទីអតីតគណបក្សសង្រ្គោះជាតិ បានលើកឡើងកាលពីថ្ងៃទី៣០ ខែមិថុនា ឆ្នាំ២០២៤ ថា បន្ទាប់ពី ប្រធានាធិបតីបារាំងលោក ម៉ាក្រុង បានទទួលស្វាគមន៍ លោកហ៊ុន សែន និងលោកហ៊ុន ម៉ាណែត អ្នកកាន់អំណាចនៅកម្ពុជា បានបង្កើនការចាប់ខ្លួនសមាជិកបក្សប្រឆាំង សកម្មជនសិទ្ធិមនុស្ស និងសកម្មជនបរិស្ថាន ជាបន្តបន្ទាប់៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
