ឯកអគ្គរដ្ឋទូតថ្មីរបស់ចិនប្រចាំកម្ពុជា លោក Wang Wenbin បានអះអាងពីការប្តេជ្ញាចិត្តក្នុងការពង្រឹងនូវទំនាក់ទំនងរវាងកម្ពុជា-ចិន ឲ្យកាន់តែរឹងមាំបន្ថែមទៀត ដើម្បីឲ្យប្រទេសដទៃយកគំរូតាម។ ការអះ អាងរបស់លោក Wang Wenbin ធ្វើឡើងនៅពេលដែលលោកបានឈានជើងមកដល់ទីក្រុងភ្នំពេញ នៅយប់ថ្ងៃទី០៥ កក្កដា ដើម្បីចូលកាន់តំណែងជាផ្លូវការតំណាងឲ្យប្រទេសចិនប្រចាំកម្ពុជា។

ពីអាកាសយានដ្ឋានអន្តរជាតិភ្នំពេញ លោក Wang Wenbin បានឆ្លៀតថ្លែងសារខ្លីប្រមាណជាង៥នាទី មុនចូលបំពេញបេសកកម្មជាឯកអគ្គរដ្ឋទូតថ្មីរបស់ចិនប្រចាំកម្ពុជា។ សាររបស់អ្នកការទូតដែលគេឲ្យរហស្សនាមថា «អ្នកចម្បាំងចចក» រូបនេះ បានលើកឡើងអំពីប្រវត្តិនៃទំនាក់ទំនងរវាងកម្ពុជា-ចិន ដែលមានជាប្រវត្តិសាស្រ្ត និងការប្តេជ្ញាចិត្តពង្រឹងបន្ថែមនូវទំនាក់ទំនងផ្នែកការទូតរវាងប្រទេសទាំងពីរ។

លោក ឯម សុវណ្ណរ៉ា សាស្ត្រាចារ្យផ្នែកវិទ្យាសាស្រ្តនយោបាយយល់ឃើញថា លោក វ៉ាង វេនប៊ីន គឺជាអ្នកការទូតមួយរូបដ៏មានឥទ្ធិពល និងយល់ដឹងពីបញ្ហាច្រើន ដ្បិតជាអ្នកនាំពាក្យនៃក្រសួងការបរទេសចិនផងនោះ។ បើតាមលោក ឯម សុវណ្ណរ៉ា ការទទួលតំណែងជាឯកអគ្គរដ្ឋទូតចិនថ្មីប្រចាំកម្ពុជា បានបង្ហាញកាន់តែច្បាស់នូវទំនាក់ទំនងដ៏ស្អិតរមួតរវាងប្រទេសទាំងពីរ។ លោកថា ក្នុងតំណែងជាអគ្គរដ្ឋទូតចិនថ្មីប្រចាំកម្ពុជា គោលនយោបាយការបរទេសរវាងកម្ពុជា-ចិន នឹងត្រូវពង្រឹងបន្ថែមទៀត ជាពិសេសជំហរកម្ពុជាគាំទ្រចិន ទៅលើគោលនយោបាយចិនតែមួយ និងបញ្ហាមួយចំនួនទៀត នៅលើឆាកអន្តរជាតិ។

បើតាមលោក ឯម សុវណ្ណរ៉ា លោកសាទរចំពោះការពង្រឹងបន្ថែមនូវទំនាក់ទំនងផ្នែកការទូតរវាងកម្ពុជា-ចិន។ ក៏ប៉ុន្តែសម្រាប់កម្ពុជា ក៏មិនត្រូវភ្លេចពីទំនាក់ទំនងជាមួយបណ្តាប្រទេសបច្ចឹមលោកដូចគ្នា។

តាមសាស្ត្រាចារ្យផ្នែកវិទ្យាសាស្ត្រនយោបាយរូបនេះ កម្ពុជាមិនត្រូវទោរទន់តែទៅលើចិន តែត្រូវមានគោលនយបាយការបរទេសកណ្តាលជាមួយបណ្តាប្រទេសផ្សេងទៀត ជាពិសេសជាមួយបណ្តាលោកខាងលិច។ ការធ្វើដូច្នេះ គឺដើម្បីធានាថា កម្ពុជារក្សាបានផលប្រយោជន៍ពីប្រទេសផ្សងទៀត មិនមែនតែពីចិនមួយប៉ុណ្ណោះ។

គួរបញ្ជាក់ថា មុននឹងទទួលតំណែងជាអគ្គរដ្ឋទូតថ្មីប្រចាំកម្ពុជា លោក វ៉ាង វេនប៊ីន ធ្លាប់ជាអ្នកនាំពាក្យក្រសួងការបរទេសចិន​។  លោកក៏ធ្លាប់ធ្វើជាឯកអគ្គរដ្ឋទូតចិនប្រចាំប្រទេស ទុយនេស៊ីពីរឆ្នាំ ឆ្នាំ២០១៨ ដល់២០២០។  ការចូលកាន់តំណែងជាឯកអគ្គរដ្ឋទូតចិនប្រចាំកម្ពុជាពេលនេះ ត្រូវអ្នកតាមដានភូមិសាស្ត្រនយោបាយ មើលឃើញពីភាពស្និទ្ធិស្នាលកាន់តែខ្លាំងរវាងរដ្ឋាភិបាលក្រុងភ្នំពេញ និងរដ្ឋាភិបាលក្រុង​ប៉េកាំង៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh