នៅថ្ងៃទី២១ ខែមិថុនា ឆ្នាំ២០២៤ ធនាគារពិភពលោក World Bank បានប្រកាសអនុម័តការវិនិយោគថ្មីមួយទៀតសម្រាប់គម្រោងកែលម្អសន្តិសុខទឹកនៅកម្ពុជា​ដែលរំពឹងថា អាច​ផ្តល់ប្រយោជន៍ដល់ប្រជាជនជាង ១១៣ ០០០នាក់។ បើតាមធនាគារពិភពលោក ការវិនិយោគនេះធ្វើឡើង​ក្រោមជំនួយឥណទាន​​ពីសមាគមអភិវឌ្ឍន៍​អន្តរជាតិរបស់​ធនាគារពិភពលោក ​ក្នុង​គោលបំណងធ្វើឱ្យសន្តិសុខទឹកនៅកម្ពុជា​​កាន់តែប្រសើរឡើង បង្កើនផលិតភាពកសិកម្ម និងកសាងភាពធន់ទៅនឹងហានិភ័យអាកាសធាតុ។

ធនាគារពិភពលោកអនុម័តគម្រោងវិនិយោគកែលម្អសន្តិសុខទឹកនៅកម្ពុជាក្នុងទំហំទឹកប្រាក់ ១៤៥ លាន © World Bank Cambodia

ក្នុងសេចក្តីប្រកាសព័ត៌មានថ្ងៃទី​២១ មិថុនា ម្សិលមិញ ធនាគារពិភពលោកកត់សម្គាល់ថាបញ្ហាអាកាសធាតុនៅកម្ពុជាបានជះឥទ្ធិពលទៅលើការផលិតស្បៀង និងកំណើនសេដ្ឋកិច្ច។ បើទោះជាកម្ពុជាមានប្រភពទឹកច្រើនក៏ដោយ ​ភាពខុសគ្នានៃ​ការ​ធ្លាក់​ភ្លៀងតាមរដូវ និងតាម​តំបន់នៅក្នុង​ប្រទេសបាន​បង្កបញ្ហា​ប្រឈមជា​ច្រើន​ដល់​ការផ្គត់ផ្គង់ទឹកនៅ​ក្នុងទីក្រុង និងនៅ​តាម​ទី​ជនបទ។ តាមការ​ព្យាករណ៍​អាកាស​ធាតុដោយធនាគារពិភពលោក​ ទឹកជំនន់ និងភាព​គ្រោះរាំងស្ងួតនឹងកើតមាន​​ញឹកញាប់ និងកាន់តែ​មាន​សភាព​​ធ្ងន់ធ្ងរដែល​ដាក់សម្ពាធកាន់តែ​ខ្លាំងទៅ​លើ​សមត្ថភាព​របស់​ប្រទេស​ក្នុងការគ្រប់គ្រងធនធានទឹកសាបរបស់ខ្លួន។

ប្រឈមនឹងបញ្ហានេះ ​​ធនាគារពិភពលោកបានប្រកាស​អនុម័ត​​គម្រោងកែលម្អសន្តិសុខទឹកនៅកម្ពុជា ក្រោមជំនួយឥណ​ទានចំនួន ១៤៥លានដុល្លារអាមេរិក ដែល​នឹងអនុវត្ត​ក្នុងរយៈពេល៥ឆ្នាំ ដោយក្រសួងធនធានទឹក និងឧតុនិយម និងក្រសួងកសិកម្ម រុក្ខាប្រមាញ់ និងនេសាទ។ គម្រោង​វិនិយោគ​កែលម្អ​សន្តិសុខទឹកនេះ ដាក់គោលដៅ​ពង្រឹងការគ្រប់គ្រងធនធានទឹក តាមរយៈការពង្រីកស្ថានីយជលសាស្ត្រ ការធ្វើបច្ចុប្បន្នភាពគោលនយោបាយ និងបទប្បញ្ញត្តិ ការរៀបចំផែនការគ្រប់គ្រងអាងទន្លេដែលមានព័ត៌មានអំពីអាកាសធាតុ និងការពង្រឹងការបំពេញមុខងាររបស់អាជ្ញាធរទឹកថ្នាក់ជាតិ និងថ្នាក់ខេត្ត។

គម្រោងកែលម្អហេដ្ឋារចនាសម្ព័ន្ធ​ផ្គត់ផ្គង់​ទឹកនៅកម្ពុជា​របស់ធនាគារពិភពលោក​នេះរំពឹងថា នឹង​ផ្តល់អត្ថប្រយោជន៍​ពលរដ្ឋ​ជាង​១១៣ ០០០នាក់ ​តាមរយៈការទទួលបានការបណ្តុះបណ្តាល​​ និង​ជំនួយបច្ចេកទេស​សម្រាប់ធ្វើ​​ប្រតិបត្តិការ និងការថែទាំហេដ្ឋារចនាសម្ព័ន្ធដែល​ត្រូវ​បាន​កែលម្អឡើងវិញ។

លោកស្រី ម៉ារីយ៉ាម សាលីម នាយកគ្រប់គ្រងនៃធនាគារពិភពលោកប្រចាំនៅកម្ពុជាលើកឡើងថា គម្រោងនេះនឹង​ជួយប្រទេសកម្ពុជាឱ្យមានសន្តិសុខទឹកប្រកបដោយចីរភាព និងសម្រេចបានផលិតភាពកសិកម្មកាន់តែច្រើន។ លោកស្រីម៉ារីយ៉ាម សាលីមបញ្ជា​ក់ថា ការវិនិយោគទៅលើភាពធន់នៃអាកាសធាតុនៅពេលនេះ​មិនត្រឹមតែអាចឆ្លើយតបបានភ្លាមៗទៅនឹងតម្រូវការទឹករបស់កសិករ និងគ្រួសារកម្ពុជាប៉ុណ្ណោះទេ ប៉ុន្តែថែមទាំងធ្វើជាមូលដ្ឋានគ្រឹះសម្រាប់ការផ្តល់សេវា​ទឹករយៈពេលវែងផងដែរ៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh