វិទ្យាស្ថាន​សម្រាប់​សេដ្ឋកិច្ច ​និង​សន្តិភាព​ហៅកាត់ ​(IEP) ​ដែលមាន​មូលដ្ឋាន​នៅ​ទីក្រុង​ស៊ីដនី ​ប្រទេស​អូស្ត្រាលី​បាន​ចាត់ចំណាត់ថ្នាក់​កម្ពុជា​ជា​ប្រទេស​ដែលមាន​សន្តិភាព​កំរិត​មធ្យម​ក្នុង​ឆ្នាំ ​២០២៤ ​ដោយឈរ​នៅ​លេខរៀង​ទី​៧០ ​និង​មាន​ពិន្ទុ​២.០២៨ ​ក្នុងចំណោម​ប្រទេស​ចំនួន​១៦៣ ​នៅលើ​ពិភពលោក​។ ​ចំណាត់ថ្នាក់​សន្តិភាពនេះ​បង្ហាញថា ​កម្ពុជា​បាន​រំកិល ​៣លេខ​ប្រសើរ​ជាង​ឆ្នាំ​២០២៣ ​ដែលជាប់​ចំណាត់ថ្នាក់​ទី​៧៣​។

របាយការណ៍សន្ទស្សន៍​សន្តិភាពពិភពលោក ​(GLOBAL PEACE INDEX 2024) ​របស់វិទ្យាស្ថានសម្រាប់​សេដ្ឋកិច្ច និង​សន្តិភាព(IEP) ​បង្ហាញថា​ប្រទេសកម្ពុជា​នៅឆ្នាំ២០២៤នេះ ​បានស្ថិតនៅ​ក្នុងចំណុចពណ៌លឿង​ជាប្រទេស ​ដែលមាន​សន្តិភាពកំរិតកណ្តាល ​ឬ​មធ្យម​ក្នុងចំណោម​ប្រទេសសរុប​ចំនួន១៦៣។​ តាមរយៈ​ចំណាត់ថ្នាក់មួយនេះ​ ប្រទេសកម្ពុជា​មានភាពប្រសើរ​ឡើងបន្តិច ​បើធៀបនឹង​ឆ្នាំ ២០២៣ ​កន្លងទៅ ​ដែលឈរនៅ​លេខរៀងទី៧៣ ​និង​មានពិន្ទុ ​១.៩៤៧​។

តែបើធៀបនឹង​ឆ្នាំ២០២២ ​ដែលឈរនៅ​លេខរៀងទី៦២ ​ចំណាត់ថ្នាក់ ​និងពិន្ទុ​ដែលកម្ពុជាទទួលបាន​ក្នុងឆ្នាំ២០២៤ ​នេះនៅតែ​មិនសូវល្អ​។ មិនសូវល្អ​ព្រោះកម្ពុជាបានធ្លាក់​ពីចំណុចពណ៌​បៃតងខ្ចី​ ដែលមាន​ចំណាត់ថ្នាក់​សន្តិភាពល្អ​មកចំណុចពណ៌លឿង ​ដែលជាចំណាត់ថ្នាក់​ត្រូវ​ប្រឹងប្រែង​ឡើងវិញ​។

លោក​ ប៉ែន បូណា ប្រធាន​ក្រុមអ្នកនាំពាក្យរដ្ឋាភិបាល​កម្ពុជាមិនទាន់អាច​និយាយសាទរ​ ឬ​និយាយយ៉ាងណា​នៅឡើយទេ​ចំពោះរបាយការណ៍​សន្ទស្សន៍​សន្តិភាព​ពិភពលោកឆ្នាំ​២០២៤ នេះ។​ តែលោក​បានចោទជា ​២សំណួរថា ​ទី១ ​លោកមិនដឹង​ថា ​តើរបាយការណ៍នេះ​ត្រូវបានវាស់វែង​ដោយរបៀបណា ​និង​ទី២ លោកថា​វាមិនមែនជាការ​ត្រឹមត្រូវទេ ​ដែលយកកម្ពុជា​ទើបតែមានសន្តិភាព ២៥ឆ្នាំ ​ទៅប្រៀបធៀប​ជាមួយប្រទេស​ដែលមិនមាន​សង្គ្រាម​ជាយូរមកហើយ​។ ​ទោះយ៉ាងណា ​ប្រធានក្រុម​អ្នកនាំពាក្យរដ្ឋាភិបាល​កម្ពុជារូបនេះ​បានទទួលស្គាល់ថា ​សន្តិភាពរបស់​កម្ពុជា​ពិតជា​ឈរពីលើ​ប្រទេស​ជាច្រើន​។

ចំណែក​លោក គង់ មុនីកា ​សមាជិកព្រឹទ្ធសភា​ និងជាអគ្គលេខាធិការ​គណបក្សឆន្ទៈខ្មែរ​យល់ឃើញថា ​បើប្រៀបធៀប​ទៅនឹងប្រទេស​ដែលកំពុងមាន​សង្គ្រាម និង​វិបត្តិធ្ងន់ធ្ងរ ​កម្ពុជាត្រូវបាន​ចាត់ទុក​ជាប្រទេសដែលមាន​សន្តិភាព។ តែអ្វីដែល​សមាជិកព្រឹទ្ធសភា​បក្សប្រឆាំងរូបនេះ​ចង់ឃើញ ​គឺការ​មានសន្តិភាព​ផ្លូវចិត្ត និង​មានសិទ្ធិសេរីភាព​ពេញលេញ​ក្នុងនាមកម្ពុជា​ជាប្រទេស ​ដែលប្រកាន់​របបនយោបាយ​ប្រជាធិបតេយ្យសេរី ​ពហុបក្ស។ ​

សូមរំលឹកថាពាក្យ ​«សន្តិភាព» នេះ​កំពុងស្ថិតនៅក្នុង​ការប្រទាញប្រទង់គ្នា​ខាងទស្សនៈ​នៅឡើយ​រវាងរដ្ឋាភិបាល​ដែលដឹកនាំដោយ​គណបក្សប្រជាជន ​និង​អ្នកនយោបាយប្រឆាំង។​ ខណៈរដ្ឋាភិបាល ​និង​អ្នកគាំទ្រ​ទន្ទេញពាក្យ«​សន្តិភាព»នេះ​ជាប់មាត់ ​សកម្មជនប្រឆាំង​យល់ថា ​ជាសន្តិភាព​ដែលធ្វើឲ្យ​អ្នកដទៃ​មានការឈឺចាប់​៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh