មន្ត្រី​ពាក់ព័ន្ធ​ខាង​ហ្វ្រង់កូហ្វូនី ​ប្រទេស​កម្ពុជា​បានចាប់ផ្តើម​ជួប​ប្រជុំគ្នា​ជាលើកទី២ ​ដើម្បី​ត្រៀម​រៀបចំ​កិច្ចប្រជុំ​កំពូល​ហ្រ្វង់កូហ្វូនី​លើកទី​២០ ឆ្នាំ​២០២៦ ​ដែល​កម្ពុជាបាន​ដាក់បេក្ខភាព​។ ​គេអាចនិយាយ​បានថា ​កិច្ចប្រជុំ​នៅដើម​សប្តាហ៍នេះ ​បានផ្តើមចេញ​ពី​លទ្ធផល​នៃ​ព្រះរាជ​ទស្សនកិច្ច​របស់​ព្រះមហាក្សត្រ​ខ្មែរ​នៅប្រទេស​បារាំង​ក្នុងឆ្នាំ ​២០២៣​។ នៅក្នុង​ជំនួបជាមួយ​ លោក ​ម៉ាក្រុង ​ប្រធានាធិបតី​បារាំង​ លោកបាន​សម្តែង​ការគាំទ្រ​បេក្ខភាព​របស់កម្ពុជា​ធ្វើជា​ម្ចាស់ផ្ទះ​រៀបចំ​កិច្ចប្រជុំ​កំពូល​ហ្វ្រង់កូហ្វូនី​លើកទី​២០​ នៅឆ្នាំ​២០២៦​។

បន្ទាប់ពី​ទទួលបាន​ភ្លើងខៀវ​ និង​ការគាំទ្រ​ពីប្រទេសបារាំង​កាលពីឆ្នាំ ​២០២៣ សម្រាប់​បេក្ខភាព​ប្រទេសកម្ពុជា​ដើម្បីធ្វើជា​ម្ចាស់ផ្ទះ​រៀបចំកិច្ចប្រជុំ​កំពូល​ហ្វ្រង់កូហ្វូនី​លើកទី២០ ​នៅឆ្នាំ២០២៦ ​មន្ត្រីជំនាញ​នៃស្ថាប័ន​នានា​ដែលពាក់ព័ន្ធនឹង​ហ្វ្រង់កូហ្វូនី​បានជួបប្រជុំគ្នា​ចំនួន២លើក​រួចមកហើយ និង​ដែលកិច្ចប្រជុំ​ទាំងនេះ ​បានដឹកនាំ​ដោយរដ្ឋមន្ត្រី​ការបរទេស​លោក សុខ ចិន្តាសោភា​។

កិច្ចប្រជុំ​លើកទី២ ​ដែលបានរៀបចំ​កាលពីថ្ងៃទី២១​ ខែ​ឧសភា ​កន្លងទៅថ្មីៗនេះ ​ត្រូវបានធ្វើឡើង​ដោយមានរបៀបវារៈ​សំខាន់ៗ​ចំនួន២ ទី១.​បច្ចុប្បន្នភាពទាក់ទងនឹង​បេក្ខភាពរបស់​កម្ពុជាធ្វើជាម្ចាស់ផ្ទះ​រៀបចំ​កិច្ចប្រជុំកំពូល​ហ្វ្រង់កូហ្វូនី​លើកទី២០ ​ឆ្នាំ​២០២៦ និង​ទី​២.ការងារ​ត្រៀមរៀបចំ​កិច្ចប្រជុំ​កំពូល​ហ្វ្រង់កូហ្វូនីលើកទី​២០ ឆ្នាំ​២០២៦​។

លោក ​ចាន់ បូនីរ៉ា ​ប្រធាននាយកដ្ឋាន​ហ្វ្រង់កូហ្វូនីនៃ​ក្រសួងការបរទេស​កម្ពុជាបានឲ្យដឹងថា ​កិច្ចប្រជុំ​ទាំងពីរលើកកន្លងទៅនេះ​ជាការពិភាក្សា​គ្នាលើការ​ត្រៀមរៀបចំ​កិច្ចប្រជុំ​កំពូលហ្រ្វង់កូហ្វូនី​លើកទី២០ ​ឆ្នាំ២០២៦ ​ប្រសិនបើកម្ពុជា​ទទួលបាន​សិទ្ធិធ្វើជាម្ចាស់ផ្ទះ​នៃកិច្ចប្រជុំ​កំពូលមួយនេះ​។

គួរបញ្ជាក់ថា​ជាគោលការណ៍​ ហ្រ្វង់កូហ្វូនី​ដែលជាអង្គការ​អន្តរជាតិនៃក្រុម​ប្រទេសប្រើប្រាស់​ភាសាបារាំង(OIF)​ នឹងបិទ​ការទទួល​សំណើដាក់បេក្ខភាព​ធ្វើជាម្ចាស់ផ្ទះ​ត្រឹមអំឡុង​ពេលកិច្ចប្រជុំ​លើកទី១២៧​ នៃក្រុមប្រឹក្សា​អចិន្ត្រៃយ៍ហ្វ្រង់កូហ្វូនី​(CPF) ​នៅថ្ងៃទី២៦ ​ខែមិថុនា ឆ្នាំ​២០២៤​។

តែតាមព័ត៌មាន​ដែលទទួលបាន​នៅពេលនេះ ​គឺទើបមានតែ​ប្រទេសកម្ពុជា​មួយគត់ ​ដែលបាន​ដាក់បេក្ខភាព​។ ទោះជាយ៉ាងណា ​ប្រមុខរដ្ឋ និង​ប្រមុខរដ្ឋាភិបាល​ជាសមាជិក​អង្គការ OIF ​នឹងធ្វើការ​សម្រេចទៅលើ​ប្រទេសម្ចាស់ផ្ទះ​រៀបចំកិច្ចប្រជុំ​កំពូលលើកទី២០ ឆ្នាំ​២០២៦ នៅក្នុង​កិច្ចប្រជុំកំពូល​ហ្វ្រង់កូហ្វូនី​លើកទី១៩ ​ដែលនឹង​ប្រព្រឹត្តទៅ​នៅថ្ងៃទី០៤-០៥​ ខែតុលា ឆ្នាំ​២០២៤ នៅ​ប្រទេសបារាំង​។ នេះបើតាម​លោក ចាន់ បូនីរ៉ា។​ មួយវិញទៀត ​ប្រទេសកម្ពុជានឹងបញ្ជូន​ក្រុមអ្នកសង្កេតការណ៍​របស់ខ្លួន​ប្រមាណពី ​៥ ទៅ ៦រូប ​ទៅធ្វើ​ទស្សនកិច្ច​ការងារតាមការ​ស្នើសុំ​របស់ភាគី​បារាំងនៅចុងខែ​មិថុនា ឬ​ដើមខែ​កក្កដា ឆ្នាំ​២០២៤ ខាងមុខ​។

គោលដៅនៃ​ទស្សនកិច្ចនេះ គឺ​ដើម្បីចូលរួមពិនិត្យសង្កេតអំពី​ដំណើរការ ​និងរបៀបរៀបចំ​កិច្ចប្រជុំ​កំពូលហ្វ្រង់កូហ្វូនី​លើកទី១៩ ​នៅប្រទេសបារាំង ​ដើម្បីត្រៀមរៀបចំ​កិច្ចប្រជុំកំពូល​លើកទី២០ ឆ្នាំ​២០២៦ នៅ​កម្ពុជា​។

គួររម្លឹកថា ​នៅក្នុងព្រះរាជទស្សនកិច្ច​នៅប្រទេសបារាំង​របស់ព្រះមហាក្សត្រ​កម្ពុជាព្រះបាទ​សម្តេចព្រះ នរោត្តម ​សីហមុនី កាលពី​ខែ​វិច្ឆិកា ឆ្នាំ​២០២៣ លោក​ប្រធានាធិបតី​បារាំង​ អេម៉ានុយអែល ម៉ាក្រុង ​បានលើកទឹកចិត្ត​ឲ្យកម្ពុជា​ធ្វើជា​ម្ចាស់ផ្ទះរៀបចំ​កិច្ចប្រជុំកំពូល​ហ្វ្រង់កូហ្វូនី​នៅឆ្នាំ​២០២៦ ​ហើយបាន​សន្យាថា បារាំងនឹង​គាំទ្រ​បេក្ខភាពកម្ពុជា​៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh