នៅ​ថ្ងៃ​អាទិត្យ​ ទី១៩​ ឧសភា​នេះ មហាសេដ្ឋី​បច្ចេកវិទ្យាអាមេរិក ​លោក អេឡន មឺស្ក៍ បាន​អញ្ជើញ​ទៅ​​ក្រុង​បាលី​ ដើម្បី​សម្ពោធ​បណ្តាញ​អ៊ីនធ័រនែត​ផ្កាយ​រណប​Starlink របស់​ក្រុមហ៊ុន​​SpaceX សម្រាប់​ប្រើប្រាស់ក្នុង​វិស័យ​សុខាភិបាល​ឥណ្ឌូណេស៊ី។ ស្ថាបនិក​ក្រុមហ៊ុនSpaceX​ បាន​ចុះ​កិច្ចព្រមព្រៀង​ផ្តោត​លើ​វិស័យ​​សុខភាព​​ជាមួយ​​​រដ្ឋមន្ត្រីក្រសួង​សុខាភិបាលផង និង​មាន​គម្រោង​ជួប​ប្រធានាធិបតី​​ឥណ្ឌូណេស៊ី ចូកូវីដូដូ​ទៀត​។

ឥណ្ឌូណេស៊ី​ ជា​ប្រទេស​ផ្គុំ​​ទៅ​ដោយ​កោះ​ជាង​១៧០០ ហើយមួយ​ភាគ​បីនៃ​​​ប្រជាជនសរុប​២៧០លាននាក់​​ គ្មាន​បណ្តាញ​អ៊ីនធ័រនែត​ប្រើប្រាស់​ទេ មក​ទល់​ឆ្នាំ​២០២២។ នេះ​បើ​តាមធនាគារ​ពិភពលោក។ ប៉ុន្តែ​ចាប់​ពី​ថ្ងៃ​នេះទៅ ប្រជា​ពលរដ្ឋរាប់​លាន​នាក់ រស់​ក្នុង​តំបន់​ដាច់​ស្រយាលណា​ ក៏​​អាច​ភ្ជាប់​អ៊ីនធ័រនែត​បាន​ដែរ តាម​រយៈ​សេវា​របស់​ផ្កាយ​រណប​Starlinkនៃ​ក្រុមហ៊ុន​SpaceX។ នេះ​ជា​​ប្រសាសន៍​របស់​លោក អេឡន មឺស្ក៍ ក្នុង​ពិធី​សម្ពោធ​បើក​ឱ្យ​ប្រើប្រាស់​បណ្តាញ​អ៊ីនធ័រនែតផ្កាយរណបក្នុង​វិស័យ​សុខាភិបាល​ ​​នៅ​មជ្ឈមណ្ឌល​សុខភាព​សហគមន៍​ដេនប៉ាសារ ​ខេត្ត​​​​បាលី​។

ក្នុង​សម្លៀក​បំពាក់​ប្រពៃណី​ឥណ្ឌូណេស៊ី​ពណ៌​​បៃតង​ ស្ថាបនិក​ក្រុមហ៊ុន​SpaceX បាន​ប្រកាស​បន្ថែម​ទៀត​ថា សេវា​Starlink នឹង​ជួយ​សង្គ្រោះ​ជីវិត​អ្នក​ជំងឺ​សម្រាក​ក្នុង​មន្ទីរ​គ្លីនិក​ដាច់​ស្រយាល​ផង និង​អាចជា​​ឧបករណ៍​ជួយ​ប្តូរ​ផ្លាស់​ក្នុង​វិស័យ​អប់​រំ​ផង។

សម្រាប់​ពេល​នេះ ​មាន​មជ្ឈមណ្ឌល​សុខភាព​ចំនួន​បី ៖ ពីរ​នៅ​លើ​កោះ​បាលី និង​មួយ នៅ​លើ​កោះ​អារ៉ុ ដ៏​ឆ្ងាយ​ ដែល​កំពុងសាក​ល្បង​ប្រើបណ្តាញអ៊ីនធ័រនែត​ល្បឿន​លឿន​​Starlink ចាប់​ពី​ថ្ងៃ​អាទិត្យ​ ទី១៩ ​ឧសភា ទៅ ដើម្បី​ងាយ​កត់​ត្រា​ទិន្នន័យ​ក្នុង​​​ប្រព័ន្ធ​សុខាភិបាល​ថ្នាក់​​ជាតិ និង​មាន​តួលេខ​ជាក់​ស្តែង​​ភ្លាមៗ​ សម្រាប់​ដោះស្រាយ​ភាព​ប្រឈម​សុខភាព​សាធារណៈ មាន​ជាអាទិ៍​​ការ​ចាក់​ថ្នាំ​បង្ការ ការ​លូត​លាស់​និង​កង្វះ​អាហារូបរបស់​កុមារ ឬ​ជំងឺ​ទឹក​នោម​ផ្អែម។

តាម​គម្រោង រដ្ឋាភិបាល​ឥណ្ឌូណេស៊ី ​នឹង​បំពាក់​បណ្តាញ​សេវា​Starlink ដល់​គ្លីនិក​រដ្ឋ​ចំនួន​មួយ​ម៉ឺន​ នៅទូទាំង​ប្រទេស។ នេះ​បើ​ការ​អះអាង​របស់​លោក​ ប៊ុឌី ហ្គូណាឌី សាឌីគីន រដ្ឋមន្ត្រីក្រសួង​សុខាភិបាល​ ដែល​បាន​ចុះ​ហត្ថលេខា​លើ​កិច្ចព្រមព្រៀងវិនិយោគ​​​ក្នុង​ផ្នែក​សុខភាពជាមួយ​មហាសេដ្ឋី​ អេឡន មឺស្ក៍ ប៉ុន្តែ​លោក​រដ្ឋមន្ត្រី​មិន​បាន​លម្អិត​អំពី​ទំហំ​ថវិកា​នៃ​ការ​វិនិយោគ​នេះ​ទេ។ ក្រុមហ៊ុន​ក៏​នឹង​ចាប់​ផ្តើម​សាកល្បង​បំពាក់​សេវា​អ៊ីនធ័រនែត​ផ្កាយរណប​នេះ នៅ​ក្រុង​នូសានតារ៉ាដែល​នឹងក្លាយ​ជា​រដ្ឋធានី​ថ្មី​របស់​ឥណ្ឌូណេស៊ី​ចាប់​ពី​ថ្ងៃទី​១៧ ​សីហា ​២០២៤​ទៅ។

បណ្តាញStarlink មាន​ផ្កាយរណប​ប្រមាណ​៤៥០០ ក្នុង​គន្លង​តារា​វិថី ពោល​គឺ​តំណាង​ឱ្យ​៦០%​នៃ​ផ្កាយ​រណប​ទាំង​អស់​ អាច​ផ្គត់​ផ្គង់​បណ្តាញ​អ៊ីនធ័រនែត ដល់​គ្រប់​តំបន់​ដាច់​ស្រយាល​ឬ​តំបន់​ដែល​មាន​បណ្តាញ​ទូរគមនា គមន៍​លែង​ដំណើរការ។ បណ្តា​ញ​នេះ​មាន​ប្រើ​ច្រើន​នៅ​អ៊ុយក្រែន​ ដោយ​ក្រុមយោធា មន្ទីរពេទ្យ​ ក្រុមហ៊ុន​ឬ​អង្គការ​ក្រៅ​រដ្ឋាភិបាល។ នៅ​អាស៊ី ឥណ្ឌូណេស៊ី​ជា​ប្រទេស​ទី​បី​ដែល​ប្រើ​បណ្តាញ​Starlink។ ម៉ាឡេស៊ី ​បាន​ចុះ​កិច្ចព្រមព្រៀង​ប្រើ​បណ្តាញ​នេះ​នៅ​ឆ្នាំ​មុន និង​តាំងពី​ឆ្នាំ​២០២២​សម្រាប់​ហ្វីលីពីន៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh