បារាំង – ជំនួបកំពូល​ Choose France ដែលប្រមូល​ផ្តុំដោយ​នាយកក្រុមហ៊ុនអន្តរជាតិធំៗ បានចាប់ផ្តើមនៅថ្ងៃចន្ទ ទី​១៣ ឧសភានេះ នៅអតីតព្រះបរមរាជវាំង​​វែកសៃ មិនឆ្ងាយ​ប៉ុន្មានពីទី​ក្រុង​ប៉ារីស​។​ ក្នុង​ឱកាសជំនួប​កំពូលនេះ ក្រុមហ៊ុន​អន្តរជាតិបានប្រកាសគម្រោងវិនិយោគនៅបារាំង សរុបចំនួន ៥៦គ​ម្រោង ដែលគិតជាទឹកប្រាក់ ចំនួន​ ១៥០០០លានអឺរ៉ូ។ តាមរយៈដំណឹងដ៏ល្អនេះ​​​ រដ្ឋាភិបាល​បារាំង​បាន​អះអាងថា បារាំងគឺជាប្រទេសអឺរ៉ុប ​ដែលទាក់ទាញការ​​វិនិយោគបរទេស​ច្រើន​ជាង​គេបំផុត​។លោក​ម៉ាក្រុងសើចក្អាកក្អាយជាមួយលោក Brad Smit CEOនៃក្រុមហ៊ុនMicrosoft ក្នុង​ឱកាសប្រកាសគម្រោងវិនិយោគ ៤ពាន់លានអឺរ៉ូ នៅទីស្នាក់ការ Microsoft France។ Issy-les-Moulineaux ថ្ងៃទី ១៣ ឧសភា ២០២៤ AP – Thibault Camus

បរិយាកាសសេដ្ឋកិច្ចបារាំង​ កំពុងតែរីកស្រស់ប៉ប្រឹម ជាមួយនឹងដំណឹងល្អៗ នៅក្នុងឱកាសជំនួបកំពូល Choose France ដែលប្រមូល​ផ្តុំដោយ​នាយកក្រុមហ៊ុនអន្តរជាតិធំៗ ប្រធានធនាគារវិនិយោគ សរុបទាំងអស់​​ប្រមាណ​១៨០នាក់។ លោកប្រធានាធិបតី​ម៉ាក្រុង បានបង្ហាញវត្តមាន​នៅក្នុងជំនួបកំពូលនេះ ដើម្បីអបអរនិងអួតបង្ហាញ អំពី​ជោគជ័យ​នៃការដឹកនាំរបស់ខ្លួន​។

យ៉ាងហោចណាស់​ មានគម្រោងវិនិយោគចំនួន​៥៦គម្រោង ដែលត្រូវបាន​ប្រកាស​នៅក្នុង​ឱកាសនេះ។ គិតជាទឹកប្រាក់សរុប បារាំងនឹងទទួល​បានគម្រោងវិនិយោគមានតម្លៃ ១៥០០០លានអឺរ៉ូ ដែលនេះគឺជាទំហំទឹកប្រាក់ខ្ពស់បំផុតមិនធ្លាប់មាន​ បើគិតចាប់ពីពេលបង្កើតជំនួបកំពូល Choose France នៅឆ្នាំ​២០១៨។

ក្នុងចំណោមទឹកប្រាក់វិនិយោគនេះ ក្រុមហ៊ុន​ Microsoft មានទំហំវិនិយោគច្រើនជាងគេ គឺចំនួន​៤០០០​លានអឺរ៉ូ។ លោក Brad Smith អគ្គនាយក Microsoft បាន​ឲ្យដឹងថា ក្រុមហ៊ុនលោក​នឹងវិនិយោគកសាងមជ្ឈមណ្ឌលទិន្នន័យ​ដ៏ធំថ្មីមួយកន្លែងទៀត នៅខាងកើតប្រទេសបារាំង ព្រមទាំង​ពង្រីក​មជ្ឈមណ្ឌលទិន្នន័យ​នៅម៉ាសី នៅប៉ារីស ឲ្យ​កាន់តែធំ ដើម្បីឆ្លើយតបទៅនឹងការរីកចម្រើន ​​ផ្នែក​បច្ចេកវិទ្យាបញ្ញាសិប្បនិម្មិត និង​ការស្តុកទិន្នន័យ​លើCloud។ ក្រុមហ៊ុន Amazon វិញនឹងវិនិយោគទឹកប្រាក់​១២០០លានអឺរ៉ូ ដើម្បី​ពង្រីកហេដ្ឋារចនាសម្ព័ន្ធ​ស្តុកទិន្នន័យ​Cloud និងពង្រីកបណ្តាញ​​​ឃ្លាំង​ស្តុក និងចែកចាយ​ទំនិញ​។

ក្រៅពីក្រុមហ៊ុនបច្ចេកវិទ្យា នៅមាន​គម្រោងរោងចក្រ​ផលិតជីកសិកម្ម​ ដែល​បញ្ចេញ​ឧស្ម័ន​កាបូនិកទាបបំផុត នៅតំបន់Somme ក្នុងទឹកប្រាក់ ១៣០០លានអឺរ៉ូ។ នៅជិតទីក្រុងប័រដូវិញ នឹងមានគម្រោងសាសង់​រោងចក្រ​ចម្រាញ់រ៉ែនីកែល ក្នុងទឹកប្រាក់ច៣០០លានអឺរ៉ូ ។ ចំណែកក្រុមហ៊ុនអាល្លឺម៉ង់ Ilium និងវិនិយោគ​ប្រាក់​៤០០លានអឺរ៉ូ ដើម្បី​​បង្កើតរោងចក្រ​ផលិតយន្តហោះខ្នាតតូច ដើរដោយ​ថ្ម​អគ្គិសនី នៅតំបន់Nouvelle Aquitaine។ ក្នុងវិស័យឧស្សាហកម្ម​ឱសថវិញ ក្រុមហ៊ុន Pfizer វិនិយោគ​៥០០លានអឺរ៉ូ ក្នុងរយៈពេល៥ឆ្នាំ ក្រុមហ៊ុនAstraZeneca វិនិយោគ៣៨០លានអឺរ៉ូ និង​ក្រុមហ៊ុន GSK វិនិយោគ​១៤០លានអឺរ៉ូ។

លោក Sylvain Bersinger ប្រធានផ្នែកវិភាគសេដ្ឋកិច្ចនៅការិយាល័យ​ Astères បានលើកឡើងថា ការពិតទៅ មិនមែនវេទិកា Choose France នេះ ជាអ្នកជំរុញឲ្យ​ក្រុមហ៊ុន​បរទេសសម្រេចវិនិយោគ​នៅបារាំងនោះទេ​។ គម្រោងភាគច្រើនគឺត្រូវបាន​គេសម្រេចរួចហើយ​ ទោះមានឬគ្មាន​វេទិកា Choose France។ លោក​បានពន្យល់ថា​​ អ្វីដែល​ធ្វើ​ឲ្យ​ក្រុមហ៊ុនអន្តរជាតិ សម្រេច​វិនិយោគ​នៅបារាំង គឺដោយ​សារ​ បារាំងមានប្រព័ន្ធអប់រំល្អធ្វើឲ្យ​បុគ្គលិក​មានសមត្ថភាពបច្ចេកទេសខ្ពស់ បារាំង​មាន​ប្រព័ន្ធគតិយុត្តិ​រឹងមាំ ប្រព័ន្ធ​ពន្ធដា​ត្រឹមត្រូវ និងជាពិសេសគឺ​​បរិយាកាស​នវានុវត្តន៍ដ៏សំបូរបែបរបស់បារាំង​។

គួរបញ្ជាក់ថា តារាងចំណាត់ថ្នាក់របស់ EY បាន​ផ្តល់ពិន្ទុឲ្យ​បារាំង ស្ថិតនៅ​លេខរៀងនាំមុខគេ ​ ជាប្រទេសទាក់ទាញវិនិយោគបរទេសបានច្រើនបំផុតប្រចាំឆ្នាំ​២០២៣ ក្នុងចំណោម​ប្រទេសអឺរ៉ុប។ ពោលគឺ៥ឆ្នាំជាប់គ្នាហើយ ដែល​បារាំងជាប់ពិន្ទុល្អជាងគេ​។ ក្នុងឆ្នាំ​២០២៣ បារាំងទទួលបាន​នូវការប្រកាសសន្យាវិនិយោគ ចំនួន​១២០០គម្រោង។

តែយ៉ាងណា ថ្វីបើ​បារាំងទាក់ទាញគម្រោងវិនិយោគបានច្រើនជាងប្រទេសអឺរ៉ុបផ្សេងទៀតក្នុងឆ្នាំ​២០២៣មែន តែបើនិយាយពី​ការបង្កើតការងារថ្មីៗ​​ដោយសារគម្រោងទាំងនោះវិញ​ គឺបារាំងមានត្រឹមតែ​ ៣៩៧៧៣ការងារ ខណៈនៅអង់គ្លេសមាន ៥២២១១ការងារ ហើយនៅអេស្ប៉ាញមាន ៤២៤៥០ការងារ​។ លោក Lucas Chancel សាស្ត្រាចារ្យ​នៅសាលាសេដ្ឋកិច្ចប៉ារីស  បានលើកឡើងថា បារាំងបានតែចំនួន​គម្រោងវិនយោគ​​ច្រើនដែលរដ្ឋាភិបាលខំផ្សព្វផ្សាយ​​អួត តែជាក់ស្តែង​គម្រោងទាំងនោះ​បានផ្តល់ការងារ ត្រឹមតែ​០,១៣% នៃប្រជាជនសកម្មតែប៉ុណ្ណោះ​៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh