សភាពាណិជ្ជកម្ម អឺរ៉ុប-ចិន៖ ក្រុមហ៊ុនអឺរ៉ុបកាន់តែច្រើន ងាកបែរចេញពីប្រទេសចិន
13-ឧសភា-2024
ក្រុមហ៊ុនអឺរ៉ុបកាន់តែច្រើន ងាកបែរចេញពីការនិយោគទុននៅប្រទេសចិន ព្រោះតែមានឧបសគ្គច្រើនពេក។ នេះបើតាមការលើកឡើងរបស់ប្រធានសភាពាណិជ្ជកម្មអឺរ៉ុប-ចិន នៅក្នុងអំឡុងពេលដែលប្រធានាធិបតីចិនកំពុងធ្វើទស្សនកិច្ចនៅហុងគ្រី។ តាមទិន្នន័យរបស់សភាពាណិជ្ជកម្ម អឺរ៉ុប-ចិន, ពីមួយឆ្នាំទៅមួយឆ្នាំ គិតចាប់តាំងពីរដូវកាលផ្ទុះជំងឺកូវីដ១៩មក ក្រុមហ៊ុនអឺរ៉ុបកាន់តែច្រើនឡើងៗ ដកថយពីប្រទេសចិន និងងាកទៅកាន់ទីផ្សារថ្មី ដែលអាចគួរឲ្យមានទំនុកចិត្ត និងមានតម្លាភាព។
អត្រាចំនួនក្រុមហ៊ុនអឺរ៉ុប ដែលចាត់ទុកថា ប្រទេសចិនជាគោលដៅវិនិយោគរបស់ក្រុមហ៊ុនពួកគេ បានធ្លាក់ចុះយ៉ាងគំហុក។ គឺមិនធ្លាប់ប្រទះសភាពបែបនេះសោះក្នុងប្រវត្តិសាស្ត្រ ២០ឆ្នាំចុងក្រោយ នៃទំនាក់ទំនងពាណិជ្ជកម្មអឺរ៉ុប-ចិន។ នេះបើតាមការប្រកាសពីសំណាក់លោក Jens Eskelund ប្រធានសភាពាណិជ្ជកម្មអឺរ៉ុប-ចិន ដោយបញ្ជាក់ទៀតថា ទម្រាំតែអាចស្តារទំនុកទុកចិត្តដល់ក្រុមហ៊ុនអឺរ៉ុបបានឡើងវិញ ទំនងជាត្រូវការពេលច្រើនឆ្នាំណាស់។
ការលើកឡើងរបស់ប្រធានសភាពាណិជ្ជកម្មអឺរ៉ុប-ចិន ធ្វើឡើងនៅថ្ងៃសុក្រ ទី១០ ឧសភា ដោយផ្អែកទៅលើរបាយការណ៍ស៊ើបអង្កេតពាណិជ្ជកម្មស្តីពី ទំនុកទុកចិត្តរបស់ក្រុមហ៊ុនអឺរ៉ុប ដែលរកស៊ីបោះទុនវិនិយោគនៅស្រុកចិន។ តាំងពីរដូវកាលផ្ទុះជំងឺកូវីដ១៩មក ពីមួយឆ្នាំទៅមួយឆ្នាំ ក្រុមហ៊ុនអឺរ៉ុបកាន់តែច្រើនឡើងៗ ដកទំនុកទុកចិត្តពីប្រទេសចិន ពោលគឺនៅឆ្នាំ២០២២ មាន២១% តែនៅឆ្នាំ២០២៣ ធ្លាក់មកត្រឹម១៦% ហើយឆ្នាំ២០២៤នេះ បន្តធ្លាក់មកសល់ត្រឹម ១៣% តែប៉ុណ្ណោះ។ ក្រុមហ៊ុនអឺរ៉ុប ១ភាគ៣ បានឆ្លើយសម្តែងភាពទុទិដ្ឋិនិយម និងគ្មានសង្ឃឹមចំពោះអនាគត ក្នុងការបន្តជំនួញរបស់ពួកគេនៅស្រុកចិន។ ហេតុផល ដ្បិតថា ក្រុមហ៊ុនបរទេសមិនបានត្រូវស្វាគមឲ្យកក់ក្តៅចិត្តនៅស្រុកចិនដូចកាលពីមុន ហើយនិងស្របពេលដែល មហាយក្សចិនក៏កំពុងតែជួបវិបត្តិជាច្រើននៅក្នុងស្រុក។ តួយ៉ាង បញ្ហាយុវជនអត់ការងារធ្វើ និងវិបត្តិអចលនទ្រព្យកំពុងជាប់គាំង ហើយនិងបញ្ហាការបញ្ជាទិញទំនិញចិន មិនសូវមានច្រើន។
ជាច្រើនខែមកហើយ ដែលឈ្មួញបរទេសថ្លែងក្តីបារម្ភនិងត្អូញត្អែរកង្វល់ពីមុខជំនួយរបស់ខ្លួននៅចិន ដោយសារតែឧបសគ្គនានាខាងផ្លូវច្បាប់ ហើយនិងការប្រកួតប្រជែងមិនស្មោះត្រង់។ រដ្ឋអំណាចចិនឲ្យតម្លៃនិងផ្តល់ឱកាសច្រើនដល់ក្រុមហ៊ុនក្នុងស្រុក និងក្រុមហ៊ុនសាធារណៈរបស់រដ្ឋចិន ហើយនិងធ្វើទុក្ខបុកម្នេញចំពោះក្រុមហ៊ុនបរទេស។ ការធ្វើទុក្ខបុកម្នេញច្រើនរូបភាព រាប់ចាប់តាំងពីការលួចកម្មសិទ្ធិបញ្ញា ជាដើម។ ប្រឈមនឹងការបាត់ទំនុកចិត្តរបស់ឈ្មួញបរទេស នៅខែមីនាកន្លងទៅ នាយករដ្ឋមន្ត្រីចិន លី ឈាំង ក៏បានប្រកាសក្នុងវេទិកាធុរកិច្ច អំពីបំណងលុបចោលរនាំងឧបសគ្គក្នុងវិស័យមួយចំនួនដែលរារាំងនិងរឹតត្បិតចំពោះក្រុមហ៊ុនវិនិយោគទុនបរទេស។
កាលពីថ្ងៃចន្ទ ដើមសប្តាហ៍នេះ ក្នុងដំណើរទស្សនកិច្ចរបស់លោក ស៊ី ជីនពីង នៅក្រុងប៉ារីស, ថ្នាក់ដឹកនាំបារាំងនិងអឺរ៉ុប ក៏បានស្នើឲ្យថ្នាក់ដឹកនាំចិន ថ្លឹងថ្លែងពីពាណិជ្ជកម្មអឺរ៉ុប-ចិន ហើយនិង ពិចារណាណាឡើងវិញពីការឧបត្ថម្ភធនជ្រុលហួសរបស់ចិន។ ក៏ប៉ុន្តែ បើតាមអ្នកជំនាញ, បើទោះបីជា ប្រធានាធិបីតបារាំង និងប្រធានគណៈកម្មការអឺរ៉ុប ខំល្បួងលួងចិត្តយ៉ាងណាក្តី ក៏ចិនហាក់ពុំបានបង្ហាញសញ្ញាផ្តល់សម្បទានអ្វីសោះ៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
