នាយករដ្ឋមន្ត្រីកម្ពុជា លោក ហ៊ុន ម៉ាណែត ថ្លែងថានវានុវត្តន៍ឌីជីថលមានសារៈសំខាន់សម្រាប់ការអភិឌ្ឍន៍ប្រកបដោយចីរភាព បរិយាបន្ន និងភាពធន់ ពិសេសនៅក្នុងការដោះស្រាយបញ្ហាវិសមភាពដែលបានបង្កឡើងដោយជំងឺកូវីដ-១៩។ ការថ្លែងរបស់ លោក ហ៊ុន ម៉ាណែត ដូច្នេះធ្វើឡើងនៅក្នុងឱកាសនៃសន្និបាតប្រចាំឆ្នាំលើកទី៨០ របស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី-ប៉ាស៊ីហ្វិក(ESCAP) នៅទីក្រុងបាងកកប្រទេសថៃក្នុងថ្ងៃទី២២ ខែមេសា ឆ្នាំ២០២៤នេះ។
សន្និបាតប្រចាំឆ្នាំលើកទី៨០ របស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី-ប៉ាស៊ីហ្វិក (ESCAP) រៀបចំក្នុងក្រុងបាងកក ប្រទេសថៃឆ្នាំ២០២៤ នេះធ្វើឡើងក្រោមប្រធានបទ «ការប្រើប្រាស់នវានុវត្តន៍ឌីជីថលសម្រាប់ការអភិវឌ្ឍន៍ប្រកបដោយចីរភាពនៅអាស៊ី-ប៉ាស៊ីហ្វិក»។
នៅក្នុងសុន្ទកថាប្រហែល ១០នាទី នាឱកាសនោះ នាយករដ្ឋមន្រ្តីកម្ពុជា លោក ហ៊ុន ម៉ាណែត បានរំលេចចំនួន ៣ចំណុចសំខាន់ៗរួមមានទី១ ភាពចាំបាច់បំផុតនៃការប្រើប្រាស់នវានុវត្តន៍ឌីជីថលសម្រាប់ការអភិវឌ្ឍន៍សង្គមសេដ្ឋកិច្ចឲ្យកាន់តែលឿនរហ័សនៅក្នុងតំបន់អាស៊ីប៉ាស៊ីហ្វិក ទី២ ការប្រើប្រាស់នវានុវត្តន៍ជាដំណោះស្រាយមួយនៃបញ្ហាវិសមភាពក្នុងការប្រើប្រាស់បច្ចេកវិទ្យាឌីជីថលនៅកម្ពុជា នៅអាស៊ាន និងនៅក្នុងតំបន់ ហើយចំណុចទី៣ គឺការបន្តខិតខំប្រឹងប្រែងរបស់រដ្ឋាភិបាលកម្ពុជាក្នុងការពង្រឹង និងពង្រីកការប្រើប្រាស់នវានុវត្តន៍ឌីជីថលនៅក្នុងប្រទេសកម្ពុជា នៅក្នុងអាស៊ាន និងនៅក្នុងក្របខណ្ឌសកលនៃអង្គការសហប្រជាជាតិ។
ប្រមុខរដ្ឋាភិបាលកម្ពុជាបានគូសបញ្ជាក់នៅក្នុងសុន្ទរកថាដដែលថា កម្ពុជាក៏ដូចជាប្រទេសនានាដែរ បានចាត់ទុកបច្ចេកវិទ្យាឌីជីថលជាចលករដ៏សំខាន់នៃដំណើរការអភិវឌ្ឍន៍សង្គម-សេដ្ឋកិច្ច ក្នុងបរិបទបដិវត្តន៍ឧស្សាហកម្ម ៤.០។ តាមលោក ហ៊ុន ម៉ាណែត បច្ចេកវិទ្យាឌីជីថលអាចបង្កើតក្បាលម៉ាស៊ីនជំរុញកំណើនសេដ្ឋកិច្ចថ្មីៗ និងបង្កើនការទទួលបានសេវាសាធារណៈចាំបាច់ក៏ដូចជាកសាងសង្គមទំនើប និងស៊ីវីល័យមួយដែលពលរដ្ឋអាចទទួលបាននូវផលប្រយោជន៍ប្រកបដោយបរិយាបន្ន ភាពជឿទុកចិត្តបាន និងសុវត្ថិភាពខ្ពស់។
ដោយឡែក លោក ហ្សង់ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រីបានបញ្ជាក់បន្ថែមនៅក្នុងសន្និសីទកាសែតមួយនៅព្រលានយន្តហោះអន្តរជាតិភ្នំពេញថា ប្រទេសកម្ពុជាមានការអភិវឌ្ឍន៍យ៉ាងលឿននូវបច្ចេកវិទ្យាឌីជីថលអំឡុងពេលនៃការឆ្លងរាតត្បាតជំងឺកូវីដ-១៩។ ជាការកត់សម្គាល់ បច្ចេកវិទ្យាឌីជីថលបានជំរុញឲ្យប្រទេសកម្ពុជាមានកំណើននៃការធ្វើពាណិជ្ជកម្ម និងការទូទាត់ប្រាក់តាមប្រព័ន្ធឌីជីថលក្នុងវិស័យធនាគារ។ នេះបើតាមលោករដ្ឋមន្ត្រីប្រតិភូ៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
