នាយករដ្ឋមន្ត្រីចិន ប្រកាសពីបំណងលុបចោលរនាំងឧបសគ្គចំពោះក្រុមហ៊ុនវិនិយោគទុនបរទេស
25-មីនា-2024
ក្នុងឱកាសវេទិកាធុរកិច្ចចិន ថ្ងៃអាទិត្យ ទី២៤ មីនា នាយករដ្ឋមន្ត្រីចិន លី ឈាំង បានប្រកាសអំពី បំណងលុបចោលរនាំងឧបសគ្គក្នុងវិស័យមួយចំនួន ដែលរារាំងនិងរឹតត្បិតចំពោះក្រុមហ៊ុនវិនិយោគទុនបរទេស។ បំណងរបស់ថ្នាក់ដឹកនាំចិននេះ ស្របគ្នាទៅនឹងអនុសាសន៍របស់អង្គការរូបិយវត្ថុអន្តរជាតិ FMI ដែលបានផ្តល់យោបល់ឲ្យចិន កែទម្រង់សេដ្ឋកិច្ចឲ្យសម្របទៅតាមទីផ្សារ។ 
ឱកាសវេទិកាធុរកិច្ចចិន ថ្ងៃអាទិត្យទី២៤មីនា នាយករដ្ឋមន្ត្រីចិន លី ឈាំង បានប្រកាសបំណងលុបចោលរនាំងឧបសគ្គ ចំពោះក្រុមហ៊ុនវិនិយោគទុនបរទេស។ AP – Wu Hao
ឆ្លើយតបនឹងក្តីបារម្ភរក្នុងវិស័យវិនិយោគទុនបរទេស នៅស្រុកចិន នាយករដ្ឋមន្ត្រីចិន លី ឈាំង បានលើកឡើងចំពោះភ្ញៀវបរទេសក្នុងវេទិកាធុរកិច្ចថា នឹងបង្កើនតម្លាភាព ហើយនិងកាត់រនាំងឧបសគ្គចំពោះក្រុមហ៊ុនបរទេស។ ការលើកឡើងរបស់នាយករដ្ឋមន្ត្រីចិន ក៏ព្រោះតែចង់កែសម្រួលស្តារទំនុកចិត្តរបស់ឈ្មួញបរទេស។ ដ្បិតថា ការវិនិយោគទុនបរទេសនៅចិន ធ្លាក់ចុះខ្លាំង ៨% កាលពីឆ្នាំទៅមិញ ហើយបន្តចុះទៀត ដល់១១,៧% ក្នុងខែមករា។
ក្នុងឱកាសវេទិកាធុរកិច្ចថ្ងៃអាទិត្យ ទី២៤ មីនា នាយករដ្ឋមន្ត្រី លី ឈាំង អះអាងទៀតថា រដ្ឋបាលក្រុងប៉េកាំងនឹងមានចំណាត់ការថ្មី ដើម្បីលុបបំបាត់បទបញ្ញត្តិមួយចំនួន ដែលរាំងស្ទះដល់ក្រុមហ៊ុនបរទេស ដូចជាវិស័យបច្ចេកវិទ្យាព័ត៌មានវិទ្យា វិស័យធនាគារ និងធានារ៉ាប់រង ជាដើម។ លោក ធីម ខុក អគ្គនាយកក្រុមហ៊ុន Apple បានចូលរួមវេទិកាធុរកិច្ចចិន និងថ្លែងប្រាប់អ្នកកាសែតថា លោកសប្បាយចិត្ត បានទៅដល់ចិន ហើយនិងគិតថា ចិនបើកចំហពិតមែនចំពោះវិនិយោគបរទេស។ ដូច្នេះ ក្រុមហ៊ុន Apple នឹងបន្តវិនិយោគបន្ថែមទៀតនៅចិន។
ទោះជាយ៉ាងនេះក្តី នាយករដ្ឋមន្ត្រីចិន លី ឈាំង ទទួលស្គាល់ពីបញ្ហាបំណុលសាធារណៈរបស់រដ្ឋបាលថ្នាក់ក្រោម ដែលចេះតែកើនឡើង ច្រើនទៅៗ ហើយក៏ទទួលស្គាល់ពីកម្សោយនៃតម្រូវការបញ្ជាទិញ។ ទាំងនេះ ក៏ព្រោះតែប្រទេសចិន មានកំណើនសេដ្ឋកិច្ចស្ទុះឡើងទាប។ វិបត្តិច្រើនចេះតែបន្តអូសបន្លាយជាអាទិ៍ បញ្ហាអចលនាទ្រព្យកំពុងជាប់គាំង, បញ្ហាទំនិញ គ្មានតម្រូវការបញ្ជាទិញទាំងក្នុង និងក្រៅស្រុក, ហើយនិងកង្វះការងារធ្វើសម្រាប់យុវជន។ អត្រាយុវជនអត់ការងារធ្វើ ច្រើនឡើងៗ។ នេះនៅមិនទាន់គិតពីបញ្ហាឥទ្ធិពលជះមកពីសង្គ្រាមក្រៅស្រុកផងទេ។
អគ្គនាយិកាមូលនិធិរូបិយវត្ថុអន្តរជាតិ លោកស្រី គ្រីស្តាលីណា ហ្សកជីវ៉ា ថ្លែងក្នុងវេទិកាធុរកិច្ចចិន។ AP – Tatan Syuflana
ជុំវិញបញ្ហាទាំងនេះ អគ្គនាយិកាមូលនិធិរូបិយវត្ថុអន្តរជាតិ លោកស្រី គ្រីស្តាលីណា ហ្សកជីវ៉ា បានជំរុញឲ្យរដ្ឋអំណាចចិន កែសម្រួល បើកផ្លូវឲ្យមានភាពត្រឹមត្រូវក្នុងការប្រកួតប្រជែងទីផ្សារ និងឲ្យមានសមធម៌ រវាងក្រុមហ៊ុនឯកជន និងក្រុមសាធារណៈរបស់រដ្ឋចិន។ អគ្គនាយិកា FMI ឲ្យយោបល់ថ្នាក់ដឹកនាំចិន ត្រូវពង្រឹងពង្រីកលទ្ធភាពចំណាយ របស់ប្រជាជន(អំណាចទិញ), ពង្រីងប្រព័ន្ធចូលនិវត្តន៍របស់មនុស្សចាស់ ហើយនិងចាត់វិធានការកែលម្អឲ្យមានប្រសិទ្ធភាព ចំពោះប្រព័ន្ធសន្តិសុខសង្គមលើវិស័យសុខាភិបាល។
ចំណុច១ទៀតត្រូវយកចិត្តទុកដាក់ គឺការកែតម្រូវវិស័យអចលនាទ្រព្យ សំណង់នគរោបនីយកម្ម ឲ្យសមស្របនឹងតម្រូវការប្រើប្រាស់ និងស្នាក់នៅ។ កុំបង្កើនចំនួនតែអគារ តែគ្មានចំតម្រូវការជាក់ស្តែង ព្រោះវានាំឲ្យដាក់ទម្ងន់ដល់វិស័យអចលនាទ្រព្យ ដែលកំពុងតែជំពាក់បំណុលគេធ្ងន់កស្រាប់។ ត្រង់ចំណុចនេះ អ្នកឆ្លើយឆ្លងព័ត៌មានវិទ្យុបារាំងប្រចាំរដ្ឋធានីប៉េកាំង លោក ស្ទេហ្វាន ឡាហ្ការដ៍ ក៏បានកត់សម្គាល់ថា ជនជាតិចិនច្រើនឡើងៗ រាប់លាននាក់ ចាកចោលស្រុកស្រែចម្ការ មកធ្វើការនៅទីក្រុងធំៗ ប៉ុន្តែពួកគេត្រូវរស់នៅលំបាក ពពាក់ពពូនគ្នាឯជាយក្រុង ខណៈពេលអគារជាច្រើនទំនេរសល់ចោល៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
